معا حتى النهاية (المراهقة الفاتنة 3)

البارت 50

تعصب من الكلام لي عاودات ليه وتطلق تايسب فأمين وفالظروف لي خلاتها تشيط ليه وهي تاتقرا ودموعها فعينيها، الدموع لي كانت حابساهم دابا خرجو ..
أمير : Lili chufi ghanel9aw hel lhadchi ok
ليليان : makayn ta hel a Amir men gher nsber u nkmel m3ah mab9ach lia fen netraje3 w ta walidia maghayssebruch wnas atebda dwi yalah dazt une semaine 3la zwajna u netfare9 m3ah ghaygulu la faute fia ana wzid 3liha wakha nebghi ana Amine maghaybghich, kaybghini a Amir may9derch ib3ed 3lia wla ykhellini nemchi
أمير : w men be3d? Safi hit kaybghik diri lih khatru u teb9ay bzzez mnnek m3ah, Lili ana kanebghik u bzzaf kter mennu huwa wmsat3d ndir ay haja 3la 9blek, 3afak fekri fklami u khellini ntdkhel bitk lia a Lili
قرات الميساج ديالو وحلات عينيها، كانت شاكا فيه كايبغيها ودابا قالها ليها نيشان وباغيها واخا عارفها ولات ملك راجل آخر مازال تابعها، لهاد الدرجة؟ مسحات دموعها وتقادات فالجلسة، شافها طلعات Vu وماجاوباتوش وهو يعاود يسيفط ليها ميساج ..
أمير : Lili?
ليليان : Oui
أمير : fekri mzian fklami u ana mesta3d n3awnek, b ichara mnek twelli m3aya ana u may9der hed iw9ef ftri9na gher nti 9ebli, ghankhellik tfekri u jawbini
ليليان : ok
أمير : Kanebghik
قرات الكلمة وتنهدات بعمق، شافت الساعة ولقات الوقت لي غايرجع فيه أمين قرب ومازال مادارت العشا وتا الغذا ماتغذاتوش نسات راسها، حطات الفون فوق السداري ووقفات مشات لبيت النعاس هو اللول بدلات حوايجها ولبسات بيجامة ديال الدار ودازت للكوزينة تشوف شنو طيب ليه، حلات الثلاجة جبدات الدجاج حطاتو فبانيو صغير وطلقات عليه الما باش يطلق، وهزات هي طرف ديال بسبوسة وطحنات نص لافوكا والبنان مع الحليب عمرات كاس كبير وجلسات كلاتو تقضي بيه بينما جا راجلها ويتعشاو بجوج، نصبات الدجاج بالبصلة والقرفة وردات الكوكوت فوق البوطة وطرفات من وراها سمعات رنة تيليفونها ومشات للصالون تاتزرب فين خلاتو لقاتها نمرة أمين وجاوباتو بالزربة ..
ليليان : ألووو
أمين : وي حبيبا سافا؟
ليليان : سافا
أمين : مقلقة ولا؟ شنو درتي منين خرجت
ليليان : مليت شويا احبيبي، جمعت الدار وتفرجت ودابا لقيتيني شادا تيليفون مكونيكطيا مع إيمان وسلطان تايسلمو عليك
أمين : امم يسلم عليهم الخير
ليليان : ايمتا غاترجع؟ العشية هادي ا أمين
أمين : غانتعطل شويا احبيبا، نتي تعشاي ماتسناينيش ولا جاك النعاس نعسي واخا حياتي
ليليان : يعني اليوم ماكاين خروج
أمين : وا حبيبا صبري عليا شويا، الويكاند نديك فيما بغيتي
ليليان : صافي واخا
أمين : كنبغيك، بسلامة
قطع معاه ولاحت الفون تاتسوط وجلسات ثاني تاتفرج لقات فيلم تركي مدبلج "سامحيني" وبقات متبعا معاه والحلقة جاتها حامضة وواحد الدبلجة ركبات فيها العصاب ..
طاب العشا وملات بوحدها غير تاتمشي وتجي، الشهية تسدات ليها مامولفاش تاكل بوحدها، بقات غير تاتمشي وتجي فالدار وتمشي للشرجم تحلو تبقا طل على زنقة لي خاويا من الناس من غير طموبيلات لي تايدوزو، الحي فين سكن هادي وخاوي مافيهش قوة البشري، وصل نص الليل وسمعات الباب تحل عرفاتو هو لي جا، سدات الشرجم وخرجات عندو وقفات عليه لقاتو يالاه حط السوارت ..
ليليان : على السلامة
أمين : الله يسلمك
قرب منها بغا يبوسها وهي تبعد وجهها وعقدات حجبانها، شافيها باستغراب كيفاش مربعة يديها عند صدرها وتاتخنزر فيه ..
أمين : مالك؟
ليليان : شوف نتا، أمين مليت عرفتي شنو هي مليت؟ النهار كامل وأنا محبوسة بين ربعة الحيوط مامولفاش هاكا وهادا غير النهار اللول واش وقع ليا فيه كيفاش غانصبر الحياة كلها؟
أمين : شنو غاندير ليك أنا؟ نجلس حداك تيتي نيني ونخلي شغلي واش نتي سافا فعقلك، ليليان بدلي ساعة بخرا هاد اليل جاي عيان ونقبتيني فالباب هاكا تايستقبلو الناس رجالهم؟ حطي ليا ماناكل
داز فيها للدوش يغسل ويبدل حوايجو ومشات هي للكوزينة سخنات العشا، طل عليها ولقاها واقفة على البوطة وشادا معلقة تاتنقر بيها على البوطاجي ..
أمين : جيبيه ليا للصالون
ماتسناهاش تجاوبو وكمل طريقو للصالون وهي بقات تما ونقصات البوطة بزاف باش تعطل وتعصبو حيت عارفاه فيه الجوع، شافت الماكلة قربات تاطبخ وقربات تنشف وهي طفي عليها وجبدات طبسيل وبدات تحط فيه .. شويا سمعات صوتو لي زلزلها وخلاها تقفز وطيحات مغرفة بمرقتها ..
أمين (بالغوات) : ليليااااااااااااااااااااان
جمدات بلاصتها ماقدراتش تحرك، تا وقف عليها وجهو حمر ومزير غايطرطق وعينيه ظلامو، حدرات عينيها ليديه وشافت تيليفونها شادو مزير عليه ..
ليليان : ا ا أمين
أمين : الييوووووم معااامن دويتي هاااا؟ معاااااامن
ليليان : دويت مع إيمان وسلطان ياك قلتها ليك
أمين (تايقرب منها) : وشكون آخر؟
ليليان : تاحد
أمين : متأكدة هااا؟