معا حتى النهاية (المراهقة الفاتنة 3)

البارت 64

دخلو من عند الكوافورة بالصلاة والسلام على رسول الله، إيمان مغطيين ليها وجهها وجنبها ليليان مصاوبة تاهي وطلعات غزالة بشعر بوكلي وماكياج صارخ ودنيا فالجهة الاخرى وياقوت وراهم تاتزغرت، تعرضات ليهم فرحة بالحليب والريحة فيدها، دخلو لبيت إيمان وجلسوها فوق سريرها حدا القفطان لي غاتلبس مسرح تما هو والاكسسوارات ديالو والصباط حداه، دنيا ماقاداها فرحة ببنتها وفرحة ماتقلش عليها واخا ولات مثقلة ولكن واقفا على كلشي بيديها وحالفا كي دارت لبنتها دير لبنت ختها بدون تمييز، ياقوت نفس الشي غير طالقا حلوقها تغني وتزغرت وتجدب فرحانا بشعرها لي مصاوبة ..
فرحة : بدلي ابنتي حوايجك وها البنات يعاونوك باش غير يجيو الناس يلقاوك موجودة
دنيا : اه قربو ياك
فرحة : ضياء مشا يتعرض ليهم فالطريق ومراد وزهير لبسو وسالاو وجالسين باب الدار تايهضرو، العشا واجد وكلشي هو هاداك خاصانا غير العروسة توجد تاهي
خرجات فرحة ودنيا من البيت وبقاو البنات بثلاثة وجراو تا على البرهوشات الصغار بزز باش تهناو منهم لصقوهم تاهوما بغاو يصاوبو ويديرو الماكياج ولكن ليليان هدداتهم تعيط لمراد تقولها ليه وهوما يهربو ودارو بالناقص ..
ليليان : ياقوت اجي عاونيني
حيدو ليها الجلابة لي كانت لابسة ولأول مرة فالتاريخ إيمان تلبس جلابة، خلاوها غير ديباردور وشورط، هزات ليليان القفطان ديال الخطبة ولي كان فالأبيض منبت بحجيرات ورديين، حلات ليه الكول ولبساتو ليها بشويا باش ماتخسرش ليها المشطة، تا سالات ليها عاد عرات ليها وجهها ورمات الشال بعيد وبداو يصليوه على النبي، كانت زوينة بزاف والمشيطية لي دايرا جات معاها والوريدات متبتينها والمايكاب ماكثروهش ليها وخلاوها فطبيعتها ..
ليليان : غزالة تبارك الله، اليوم أشرف يهبل
ياقوت : واراه هبيل خلوق، ربي لما گولي ليا شنو عجبك فيه؟ ياك كتي ماتحمليه ماتشميه اش طرا وجرا تا طحتي فيه دروك
إيمان : الحب مايشاور ازين، ودابا نشوفوك تانتي فيمن غاطيحي
غمزات ليليان وبداو يضحكو عليها وهي تاتمصمص فشفايفها وتقلب عينيها، ناضت تا ليليان لبسات عليها قفطان دالموبرا فالأزرق مغلوق وياقوت بقات بكسوتها لي لابسة حيت غاتبقا غير تنقل من هنا لهنا ماتايخليوهاش تجلس وغير هي لي تحلى ليهم يسخروها ..
سمعو الزغاريد برا وعرفو أن الخطاب وصلو وإيمان توترات وبدات تفرك فيديها وقلبها تايضرب فالتسعين وليليان تاتهدن فيها، ياقوت خرجات من عندهم وطارت لوسط الدار تجيب ليهم التبرگيگة، لقات أشرف بالكومبلي والبابيون يالالة واليد مازال مهزوزة بالبانضة واقف وسط باه ومو هاز فيديه مشموم ديال الورد وسلطان هاز شي كارطونات فيديه لابس شوميز بيضة مع دجين ومطلع التشاوك وريحتو عاطيا فالبلاصة وحليمة لابسة جلابة فالخضيضر مفتوح ومقادة شال بطريقة زوينة ومامكثراش الماكياج وفؤاد لابس كومبلي فالقهوي، دخلوهم للصالون تايرحبو بيهم ومراد وزهير وراهم لابسين جلالبهم، جلسو كاملين وبعد سلام وكلام عادي بيناتهم والطبلة قدامهم عامرا حلاوي وعواصر وفاكية لي ماتاتخطاش ناس البادية، دخل فؤاد فالموضوع نيشان ..
فؤاد : اوا اسيادي كي تاتعرفو ولينا عائلة وحدة ومشاركين ولد هههه
مراد : هههه الله ياودي
فؤاد : وتعرفتو علينا وتعرفنا عليكم وطلعتو الله يعمر ليكم الدار، ناس كرما وهمة وشان وأخلاق ماعندي مانگول
مراد : الله يستر العيب اسي فؤاد
فؤاد : داكشي علاش گلنا مانلقاوش بحالكم نتناسبو معاهم، واليوم جينا طالبين راغبين فيد بنتكم لالة إيمان لولدنا أشرف، ولدنا هو ولدكم وبنتكم هي بنتنا
زهير : مرحبا وألف مرحبا وتاحنا ماغانلقاو نساب حسن منكم وعريس لبنتنا حسن من ولدكم، ومن جهتنا حنا غير الله يكمل بالخير ولكن فاللول واللخر القرار بيد صاحبة الأمر
فؤاد : زين الكلام اسي زهير، ماقلتي عيب
زهير : دنيا كلمي إيمان
دنيا : هي اللولة
مشات دنيا لعند البنات دخلات عليهم وعينيها مدمعين، جلسات حدا بنتها وطبعات قبلة حنينة على جبهتها ..
دنيا : ماشاء الله، غزالة ابنتي ربي يحجبك، الحمد لله لي طول ليا فعمري تاحضرت لهاد النهار
ليليان : وان شاء الله غاتشوفي حفايد حفايدك اخالتي
دنيا : ان شاء الله ابنتي الله يرضي عليك وينور طريقك، إيمان الناس تايسولو عليك يالاه
شدات بيديها وخرجوها من البيت وخذاوها للصالون، دخلات دنيا هي اللولة تابعاها إيمان لي غاتموت بالحشمة داخلة حادرا راسها للارض ومتبعة غير جلايل مها فين غاتجلس وليليان من وراهم جلسات حدا فرحة ..
زهير : اجي ابنتي حدايا
مشات جلسات بين باها وعمها مراد لي طبطب على ظهرها ورضا عليها ..
زهير : بنتي هاد الناس جاو طالبين يدك لولدهم، شنو گلتي ابنتي؟
إيمان (بهمس) : لي درتي ا بابا أنا قابلة عليه
زهير : الله يرضي عليك
فؤاد : اوا سي زهير نقرا الفاتحة
هز يديهم وبداو يقراو سورة الفاتحة وأشرف عينيه مانزلهومش على إيمان وباغيها غير تهز راسها وتشوف جهتو ولو نظرة مخطوفة ووالو مسكين خلاتو يتشوط ..