معا حتى النهاية (المراهقة الفاتنة 3)

البارت 53

فبيتهم متكيين مخشيين فبعضياتهم وهي حاطة يديها على صدرو ووجهها مقابل لوجهو مبتاسمة ليه ..
ليليان : تاتبغيني؟
أمين : هه عرفتي شحال من مرة سولتي هاد السؤال فهاد الشهر كامل لي داز
ليليان : وا قووووليا عاااافاااك
أمين : مابايناش فيا؟
ليليان : وا بيت نسمعها من فمك، نتا كاع ماتاتقولها ليا دييما، تا كانسولك عاد تاتقولها
أمين : ماعزيزش عليا الشفوي احبيبا، تانبي التطبيقي، نوريك واش تانبغيك؟
ليليان : ههههه لاااا ماشي اليوم عياااانة
أمين : وشنو عياك الحب؟ ظليتي ناعسة هاد النهار گاع ماتوگضتي تا من الدار رجعت لقيتها كي خليتها الصباح تا حاجة مامجموعة لي غايتعييك والعشا جبتو من الزنقة
ليليان : ماعرفتش مالي حاسة براسي مهدووودة وفاااشلة ماقادة ندير تا حاجة وباغا غير نعس وصافي
أمين : رجعتي لعادتك المعگازة
ليليان : ياااك أنا معگازة
أمين : نسيتي راسك كي كنتي؟ عاطياها غير للسريط والنعاس وماكنتي تعرفي تسلقي تا بيضة وكلشي تايجيك تا لقدامك، غير فاش تزوجنا وحداگيتي شويا
ليليان : حداگيت على قبلك
أمين : سعداتي
ليليان : اممم اوا قوليا دابا كانبغيك
أمين (تنهد) : كااانبييغك الالة وتانتوفى عليك صافي؟
ليليان : ومالك تاتقولها بزز 😢
أمين : دابا جاتك هادي ديال بزز؟
ليليان : اه وتاتنفخ عليا صافي ماتبقاش تقولها وتانا مابقيتش نبغيك
غضبات ودلات قنانفها وهو ضحك وتگعد شويا تاخطف قبلة من شفايفها ورجع تكا ..
أمين : ههه غاتبغيني بزز منك
ليليان : يااااك
أمين : اييييه
ليليان : عرفتي توحشت ماما وبابا وخوتي وكلهم ايمتا غاتديني نشوفهم؟
أمين : ماشي دابا احبيبا راكي عارفا الواليدا جايا غدا
ليليان : واهي ديما تاتقول غانجي اليوم غدا وماتاتجيش
أمين : لا أكدات عليا غدا نتعرض ليها فالمحطة
ليليان : امم اوك، الله يجيبها على خير
أمين : آمين
ليليان : يعني دابا غايخصني نفيق بكري باش نوجد
أمين : هي غاتجي فوقت الغدا
ليليان : مزيان باش نتا تبقا معايا الصباح تعاوني
أمين : فاش بسلامة
ليليان : فكلشي، غدا نتا ماخدامش وموالف تخرجني ودابا فاش اتجي ماماك غانبقاو غير فالدار ونتا ماغايكون عندك مايدار وحسن تعاوني
أمين : ههه نوضي ابرهوشتي تنعسي ياك قلتي عيانة
ليليان (خشات وجهها فعنقو) : اااه بزااااف
زاد عنقها كثر ونصها الفوقاني حاطاه فوق صدرو، جر عليهم الغطا وبقا تايشوف فالظلام تايتفكر كيفاش داز الشهر عليهم وهوما فرحانين وهانيين وتا المشاكل مابقاتش بيناتهم نهاائيا ومرتو ولات معاه كثر من مزيان ومفششاه وكل نهار تايزيد يبغيها كثر وكثر وتاهي نفس الشي وهادشي واضح فعينيها ..

🌞صبح الصباح والشمس شرقات والحيبان مازال ففراشهم ناعسين معانقين، تسمع صوت رنة الهاتف فيقات أمين من نومو، تحرك بشويا باش مايفيقهاش وطول يديه هز تيليفونو شاف الرقم من بين رموشو وجاوب بصوت مبحوح بالنعاس ..
أمين : ألوو .... وي ....... واخا هانا جاي
قطع ودار لعند ليليان لي شانقة عليه من تيشورت ديالو خايفاه يهرب وشعرها مطلوق على وجهها مغطيه، بعدو بيديه وبدا يفيقها وهي تاتنين ..
أمين : ليليان، فيقي احبيبا
ليليان : اننممم
أمين : فيقي را الصباح هادا
حلات عينيها بشويا عاقدة حجبانها تاتشوف فيه ..
أمين : غانخرج دابا عندي مانقضي فالخدمة ومن تما ندوز نجيب الواليدة
ليليان : فففف ياك اليوم ماكاينا خدمة
أمين : عاد دورو ليا مايمكنش مانمشيش
ناض من حداها للدوش طرف حالتو وتوضا وصلى الصبح ولبس حوايجو وهي متبعاه بعينيها مشبحة فوق السرير ..
أمين : هانا مشيت وعنداك ترجعي تنعسي وتخلينا بلا غدا
خرج وهي نعسات على كرشها وخشات وجهها فمخذتو تا سمعات الباب تحل وعاود تسد عرفاتو خرج، يالاه غاتغمض عينيهت وهي تحس بالمرار طلع ليها وناضت بزربا للدوش تكفات على لافابو تاتقيا وحاسا بدوارتها اتخرج من فمها، هزات راسها ثقيل تاتشوف فالمرايا والروبيني مطلوق على يديها تاتغسل فيهم، غسلات وجهها ودوزات يديها فازگة على عنقها وهزات فوطة مسحات وخرجات شادة فالحيط وحاسا بالبيت تايمشي ويجي بيها، جلسات جنب السرير حادرا راسها تاتسنى الدوخة تفوتها ..
الصباح دوزاتو غير فالدوش تاترجع وتا الفطور ماقدراتش عليه، الوقت داز عليها ومازال ماوجدات والو وماحاساش براسها مزيان وخافت تدور ليه تعلمو ومايبغيش وخاصة مو جايا وهو تايوصي ويعاود، كابرات وتحاملات على نفسها ودارت بالدار طرفاتها وسيقاتها مزيان وبدات توجد فالغذا وتاتبكي فنفس الوقت معدتها مقلوبة وراسها ثقيل وباغا غير تنعس ترتاح وماقداتش خوفا من الصداع معاه لي تهنات منو شهر على قدو .. طفات البوطة ومشات لبيتها جبدات فراشة فالصومو لبساتها ودارت مايكاب خفيف يغطي صفورية وجهها وسرحات شعرها طلقاتو، سمعات الساروت تايدور فالباب وناضت باش تستقبل عگوزتها .. شافت راجلها داخل هاز صاك كبير فيديه وشي بلاستيكات باين فيهم الديسير حط كلشي ودار الطريق لمو دخلات، شافتها ورسمات ابتسامة بزز ..