معا حتى النهاية (المراهقة الفاتنة 3)

البارت 40

ليليان تلقات النصائح باهتمام كبير، كانت محتاجة ليهم وفرحة دارت لي عليها .. وبعدما سالاو كلامهم دخلات عندهم دنيا بابتسامة كبيرة ..
دنيا : كي صبحات عروستنا الغزالة
ليليان : طاتي الحبيبة
دنيا : عيون وقلب طاتها، فرحتي كبيرة ابنتي ومضوبلة، بولدي وببنتي (عنقاتها وباستها) واجدة؟ الكوافورة قربات تجي، مشا ادريس قبيلة يتعرض ليها هي والبنات لي جايبا معاها يعاونو حيت كلنا غانصايبو
ليليان : اه واجدة
فرحة (سمعات الآذان) : ويلي ويلي العصر هادا، داتنا الهضرة ابنتي ونسينا ريوسنا
دنيا : غير بشويا عليك، كلشي واجد بقا غير نوجدو راسنا حنا وصافي
فرحة : أنا واجدة بقيتو غير نتوما
ليليان : علاش اماما غاتبقاي بالبيجامة ولا؟
فرحة : اييه ابنتي هادو العادات ديالنا هنا، الأم ماتاتلبس مزيان ماتاتقاد، كاوبقى ببيجامتها وتعاون بيديها
ليليان : العجب
دنيا : هههه بلا ماتعجبي ابنتي، ماماك تبلدات صافي
فرحة : ههه وعلاه شنو ماشي عمر على قدو وأنا عايشا هنا، ضروري نولف كلشي
ليليان : بصح اماما، عرفتي تانحييك على هاد الصبر لي فيك والشجاعة ديالك لي سمحتي فشحال من حاجة وعشتي هنا ووليتي بحال هاد الناس
فرحة : ماشي أنا اللولة ولا الاخرة ابنتي لي تاتزوج فالعروبية، وكلها كيفاش تايتصرف وتايأسس الحياة من جديد
دنيا : اه ماماك قادة بقدودها ماشي بحالي أنا واخا تزوجت هنا ولكن ماتانجلسش فيه بزاف
فرحة : نتي بحكم خدمتك وزيدي عليها زهير متفهم، أما أنا فماعندي مايدار فالمدينة وهنا راجلي وداري وولادي
دنيا : اه ترفع لك القبعة يا أختاه
فرحة : ههههه، اوا نمشي أنا نشوف دوك الطباخات، اجي ولدي كاع مابقيت سولت فيه واش كال
دنيا : كااال مع الرجال قبيلة، مراد شادو بجنبو فينما يتحرك يديه معاه، فرحان بيه الله يدومها
فرحة : آمين، ليليان جلسي ابنتي هنا فبيتك تانسيفط ليك إيمان تبقا حداك
ليليان : واخا ا ماما
خرجات فرحة وتبعاتها دنيا من اللور وليليان جلسات فبلاصتها وعينيها تايدورو فبيتها لي غاتوحش، شافت الباليزات والصيكان ديالها حدا الماريو لي خوا كاملو، حوايجها لي جمعاتهم هي وفرحة هادي يومين باش يتهناو منهم ومايخليوش تا الليلة بليلتها ويداهمهم الوقت وتصدق ناسيا بزاف الحاجات ديالها، يعني هادشي لي غاتدي معاها وماغاتبقا تاحاجة هنا تفكرهم بيها، بين ليلية ونهار كلشي تبدل، غير البارح كانت تاتقرا وتاتحلم ببزاف ديرو فاش تخرج وهاهي دابا بلا قرايا وغاتزوج، تفكرات موضوع القرايا لي ماجبدوش معاها أمين واخا عطاها الكلمة غير يرجع ويهضرو فيه ولكن نساها فهادشي غير بالفن وتاهي راسها قاصح وماغاتنازلش وغاتبقى معاه تايقتانع يخليها تكمل واخا ماتخدمش المهم تكمل وتشد إجازتها وعلاش لي ماطلع للماستر والدكتوراه كي دارت خالتها، شنو الفرق بينها وبين دنيا واالو وها زهير لي باه وتاهو صعيب خلاها تكمل وتخدم من الفوق، شكون هو لي مايخليهاش تاهي ويوقف قدام أحلامها وطموحاتها ..
داز الوقت ووصلات الكوافورة والمساعدات ديالها، دخلوهم نيشان عند ليليان وبداو تايقادو ليها وفنفس الوقت مجمعين معاها وتايمدحو فجمالها الطبيعي، بنات عماتها وخالتها تا هوما جاو كاملين باش يقادو وجاوبو حوايجهم للبيت المجاور لينا يبدلو فيه باش مايزاحموهاش هي وخاصة أن النگافة فاش غاتجي ماغاتبغي زحام وغاتبغي فقط العرسان لي يبقاو فالبيت، أمين تاهو كايلبس فبيتو ومعاه خوتو مطلعينها عليه وتايقشبو معاه حيت غايدخل بحالهم للقفص الذهبي ههه .. ادريس وسلطان وأشرف ماجلسوش النهار كامل دايرين يديهم، ووصل وقت تفارقو فيه سلطان وأشرف مشاو يتعرضو لفؤاد وحليمة، وادريس مشا يتعرض للنكافة والجوق مشا ليهم صالح خو ياقوت ومراد دخل دوش وبدل عليه وتعطر وزهير تاهو وخرجو للخزانة ..
الكوافورة سالات لليليان لي طلعات غزالة وأميرة كثر من البارح، جالسة فوق سريرها بقفطان بيض والغطا على وجهها وإيمان تاتقاد وياقوت لي فضلو يقادو حداها هي والبقية ينتاقلو لبيت آخر حيت وصلات النگافة وجرات عليهم وعطاتهم مهلة ديال تقاد البرزة وترجع ماتلقاهمش ههه، دخل سلطان عندها حادر راسو ومتوتر وخايف من رد فعلها، لقاها جالسة حانية راسها وغير حسات بالحركة حداها هزات راسها وتدهشات فاش شافتو حيت ماكانتش متوقعاه غايجي عندها يشوفها، حنحن وتقدم جهتها ..
سلطان : ليليان
نطق سميتها وغمضات هي عينيها وقلبها تايضرب بجهد، واش بصح هادا خوها الكبير؟ لا طالما تمنات يكون عندها وماكانش عاجبها راسها هي الكبيرة وهاهو ربي حقق ليها أمنيتها ماشي بالطريقة لي بغات وكانت خايبا شويا ولكن المهم تحققات، وقفات مقابلة معاه تاتشوف فيه من تحت الغطا وكاتحاول تفرز احساسها جهتو ولي كان مية فالمية حب أخوي فقط لا أكثر، تاهو ماعرف مايقول وبقا ساكت وماحسش تا لقاها معنقاه ومزيرا عليه وكلمة "خويا" تاترددها، حس بحضنها دافي وحنين وبادلها إياه وتاهو تايقول "ختي" ..