معا حتى النهاية (المراهقة الفاتنة 3)

البارت 12

اليوم ككل نهار فاقت ياقوت بكري قبل منهم ومشات للكوزينة وجدات الفطور ولي وسخات فالماعن تاتغسلها دك الساع ماتاتلمش عليها الشغل وكايخصها البلاصة فين غاتشقى تكون نقية ماكاتبغيش الروينة والوسخ، حطات كلشي فوق الطبلة والفطور تايشهي ومتول، المسمن والبطبوط وطبيسلات الزبدة البلدية والعسل والزيت تالعود والزيتون الكحل، وصينية أتاي ومانساتش تا القهوى لإيمان تاتبغي تفطر بيها والعصير والحليب تاهو حطاتو ليهم، وصايا فرحة مامشاوش غير هاكاك قراتها مزيان وعلماتها بشنو كايبغيو البنات وشنو خاصها توجد ليهم ولي غايساعدهم على قرايتهم ..
جبدات خرقتها ورا وذنيها وزغيباتها زعرين كايبانو فالقدام وطلقات كسوتها لي كانت عاقدة فاش كانت تجفف ومشات للبيت فين ناعسين البنات حلاتو كامل وهزات الريدو وطلقات حلوقها باش يفيقو، فزعاتهم ..
ياقوت : وااا توما نوووضوو هاااه نوووضو تكعدووو وتوما بولكم خمر تحتكم، هي هي هي بزاااف على العكز توما را فشلتو بصح نييت
بدات تغوت تا ناضو قافزات تايحكو عينيهم وشعرهم مشعكك وحالين فمهم تايتفوهو ..
إيمان : ناري اختي شي نهار تسكتي لينا القلب بهاد الغوات ديالك، ىا تانكونو ناعسين اصاحبتي وتاتخلعينا واش بيتي تحمقينا ولا شنو
ياقوت : سكتي سكتي من التبوحيط ونوضي توكدي نتي وياها، واش توما تا بيضة ماتعرفو تصلقوها واااه، خوفي عليكم طيحو فشي عكوزة دوزكم من عين البرا
ليليان : ا لالة زواج خليناه ليك نتي لي غاتموتي عليه
إيمان : وزايدون حنا يلا بينا نتزوجو راه غايديونا عروسات ماشي خدامات الالة، نسااااي عليك حياة الدوار
ياقوت : اهاااه واخا داابا نفكركم فهاد الهضرا غا بلاتي (لحسات صبعها ومسحاتو فالحيط) وگولو ياقوت گالت
ليليان : واخااا ففف مانعرف شحال هادي
ياقوت : 7 هاادي مابقيتوش خارجات هاا؟ ياك گلتو ليا نفيقكم بكري
إيمان : ويلي ويلي غانتعطلو على دراري
ياقوت : دراري؟!
ليليان : اربي اياقوت لاما سكتي شويا، اااه ونزيدك تانتي خارحا معانا ياك باغا دوري وتفوجي؟
ياقوت : اييه
ليليان : مزيان غانديوك غير هو بشرط فمك تزميه سمعتي، وماديريش لينا تاني مادرتي داك النهار فالمول الله يرضي عليك را غايكونو معانا ناس تايقراو معانا ماتحشميناش معاهم
ياقوت : يااااك اخيتي دابا وليت أنا نحشم بيكم، اوا صافي الالة غاخرجو تونا دورو وانا خليوني غا فالدار بين ربعة الحيوط قاابلين عليا، راني عاارفا راسي صگعة وماعند بويا سويرتي
إيمان (تأثرت ووقفات عندها عنقاتها) : ويلي على الهبيلة را ماشي هادشي لي قصدنا ونتي فهمتيها عوجة، را دابا دوك الناس من هنا ياك وماغايفهموكش وهوما فشي شكل مبعكين ومابيناش شي واحد يدوي ونتي ماتصبريش ليه وتصدقو فشي طاب وشي طاب
ياقوت (الصمت قالبة وجهها ونافخة قنانفها)
ليليان : وي هادشي لي بيت نقول ازين، نتي راك الفنون وعزيزة علينا يا الحمقة ومابيناش شي واحد يدوي فيك ناقص بالعكس وبيناك تانتي تعلمي معانا ونتقبو ليهم العينين وتا لارجعتي للدوار تعطيهم علاش يقلبو غير بالفن 😉 وتخلي بنادم حال فمو فيك
ياقوت : لا اخيتي غا خليني هوكايا، الله يخليني فصباغتي، ماعلينا غاندير راسي مكلخة وماتانفهمش ونخرج معاكم وفمي هوك (زماتو ودوزات عليه ساروت) ودابا نوضو تحنجرو
خرجات من البيت وخلاتهم بجوجات تايشوفو فبعضياتهم وإيمان تاتحمر فيها ..
ليليان : فففف لاتبدايش ثاني عافاك
إيمان : ماتاتعرفيش دوي وماتتبلعيش لسانك
ليليان : وا هي لي تقرصات
إيمان : ماشي كلامك المسموم لي قرصها، ليليان يا خوفي عليك والله
خرجات تاهي وخلات ليليان كاتسوط وتجمع شعرها على وجهها، يالاه غاتحط رجليها فالأرض وهي تسمع صوت تيليفون إيمان وقربات ليه يحسابها واحد من الدراري، شافت الاسم ولقات بلي أمين لي تايتاصل، استغربات من اتصالو فهاد الوقت ويالاه غادور فحالها وعاود رجعات تاني وهزاتو فيديها وجاوبات ..
ليليان : ألو
أمين سمع صوتها وعرفها هي وغمض عينيه ولسانو تعقد ..
ليليان : ألووو أمين
ماجاهاش الرد فقط صوت نفسو لي كاتسمع، وتاهي سكتات وبقات حاطا فالفون على وذنيها شحاال ديال الوقت تا واحد فيهم ماقطع تا دخلات عليها إيمان تاتنشف فشعرها بالفوطة ولقاتها واقفة عاطياها بالظهر، عيطات ليها المرة اللولة والثانية عاد فاقت الاخرى وجاوبات ..
إيمان : من الصباح وأنا تاندوي معاك، قلت ليك را ساليت من الدوش يلا بيتي دخلي دغيا تعطلنا (شافت تيليفونها) شكون؟
ليليان : اا احم اه خوك ولكن ماتايجاوبش يمكن داز الاتصال بالغلط
إيمان : اراي نشوف (شداتو) ألو أميين .. أميين .... وي خويا لاباس عليك اه اه الحمد لله، لا اخويا ماغانمشيوش هاد المرة راك عارف ياقوت عاد جات ..... احم ااا اه اه اليوم قلنا نديو ياقوت لل*** راك عارف الربيع هادا وغايكون زوين تما ..... لا لا بالعكس ماشي بكري والجو زوين منها نتمشاو شويا ..... اممم صافي غير نرجع ونصوني ليك .... أمين واش بيك شي حاجة؟ واش الموضوع مهم؟ ..