معا حتى النهاية (المراهقة الفاتنة 3)

البارت 10

إيمان : ماتحسسيهاش بلي هي قل مننا حنا
ليليان : والله مانويت هادشي راكي عارفاني زعما عمري نقصت من شي حد ولا جرحتو
إيمان : وا حيت عارفاك داكشي علاش نبهتك دابا لاتزلقي فهاد الخطأ ونتي ماديالوش
ليليان : واخا واخا
بدلو حوايجهم وتبعوها للكوزينا لقاوها حطات ليهم طاجين اللحم بالجلبانة والقوق، والخبز مقطع ومصاوب فالشبكة والما تاهو والعصير ديال الليمون وخيزو والخيار، عجبهم الحال وغسلو يديهم وجلسو بثلاثة كاياكلو ويضحكو وياقوت كي ديما هي لي مصدر النشاط تاتعاود ليهم على زبايلها فالدوار وكمية الشكاوي لي كانت تجي لباها فالنهار ..
ياقوت : هيوا دابا يكونو تهناو شويا مني بينما عگبت رجعت تاني
إيمان : هههه والله يلا نتي علااامة اياقوت
ليليان : هههه بصح احم ياقوت بغيت نعتاذر منك على قبيلة سمحيليا
ياقوت : واتي دنيا هااانيا ابتي، انا گاع ماتانهز فخاطري
إيمان : حيت قلبك كبير احبيبا وبيض داكشي علاش وربي ماغايخليكش، وعلى هادشي الالة غانخرجوك هاد العشية ندوروك شويا
ياقوت : ربي ربي هاتخرجوني نشوف تايانا المدينة
ليليان : اييه، عارفين راسنا معذبينك معانا
ياقوت : تي شسايرا تگولي اخيتي، ماكاين لا عذاب لا والو راني مولفا وزايدون هنا ماكاينا تمارا ماشي بحال دوار عدنا تي را كنت نفيق مع النبوري ونخرج نسرح البهايم ونحلب البگرات ونعجن ونخبز ونصب وزيد وزيد هنا را نواااور
إيمان : علاش ماكملتيش قرايتك اياقوت؟
ياقوت : ماكنت نحملها ولا نقبلها، كان را مسكين يديني بزز مني ونخليه تايخرج ونهرب للجنانات نضل فيهم  تا توصل الوقت ونرجع للدار تا عاق بيا وعطاني طرحة العصا ومن تم حلفت لاحطيت فيها رجلي وهو ماصاب مايدير مازال وخلاني بخاطري (تنهدات) هيييه ساعا ندمت عليها، كوراني دابا تانا نقرا معاكم ونخدم تايانا ونجي للمدينة ونولي بحال الناس هن
إيمان : نتي راك حسن من هادو لي هنا والله، مايغروكش المظاهر
ياقوت : واخا الواحد يكون عقلو عامر بشي حاجة تالنفع ماشي بالتحرايميات بحالي يانا
ليليان : ونالنا حنا كرهنا نكونو بحالك هاكا زعيمات وتاحاجة ماتغلبنا ولا تخلعنا
إيمان : واييه خليك هاكا على طبيعتك ماتبدليش را تربحي والله المهم ثيقي فراسك ومايهمك كحل الراس يعيا يدوي ماديهاش فيه
ياقوت : لا لا ياخيتي انا مامسوقة لحد
ليليان : اوا هاكا نبغيك، الحمد لله شبعت الله يعطيك الصحة على هاد الغديوة
إيمان : وي صبيعاتك كايخرجو الذهب والله
ليليان : صغر مني وتاتعرفي ديري العجب ماشي بحالي فنيانة خلاها خويا دريس
ياقوت : وهانا شنو تاندير؟ يلا بيتو نعلمكم مرحبااا ونيت يلا جاكم شي زمان تكونو تعرفو تشقاو وديرو حساب تجيو فشي عگوزة سااامة ولا لوسة قبيحة دوزها منكم
إيمان : ومالي غانمشي خدامة عندهم ولا؟ بناقص منو زواج كااع
ياقوت : غا تاتدوي اخيتي داكشي ضروري منو، يحسابك مني توصلي لوقتو غايزگلك خالي زهير؟ واخا تبقاي تحلمي تم
ليليان : هههههه صافي باراكا اياقوت خلعتي البنت
ياقوت : واهانا ها گلت وصافي
جمعو الطبلة بالضحك مطلعينها على إيمان وهي معبسة دايرا فيها زعما تقلقات، سالاو ومشاو للبيت يتكاو شويا بينما وصلات العشية ويخرجو ..
نخليوهم ونمشيو عند بطلنا لي واقف فالكوزينا تاينقي فالبطاطا والبوطة قدامو خدامة فوقها گميلة ديال زوافريا، رما البطاطا والزيتون والمصير فوق داك الدجاج لي طبخ وغطاها وخرج للصالون ترما فوق الفوتوي الاسود الجلدي أمام التلفازة، هز التيليكوموند وبقا تايقلب فقنوات الرياضة تا رصا على ماتش معاود وبقا تايتفرج فيه بعينيه وعقلو طاير لجهة خرا تايفكر فيها وتايتخايلها معاه فالدار وهي لي تاتوجد ليه ماياكل، فاش يرجع عيان من الخدمة يلقاها ملقيا ليه وتمص تعب يوم طويل، تضيف حيوية لحياتو الروتينية تنهد بعمق وعرف بلي الخيال تايبقا خيال، دار لجنبو وهز صورة لي مقابلة معاه، بقا كايتأملها وجاس بالخنقة ..
أمين : غانساااك، ماعرفتش علاش مازالك فبالي واخا فعايلك الخايبين لي دازو على عينيا بفففف
حيد الصورة من الكادر وقطعها طريفات صغار باش يصعاب عليه يجمعها ويلصقها، جلس شويا وناض للكوزينا رما الزيل وطفا البوطة وحط ليه فطبسيل وهز الخبز، جلس فالطبلة تما وبدا تاياكل .. سالا وطرف الحالة حيت عزيز عليه النقا ويكون كلشي مقاد ومرتب وماكايبغيش الوسخ والروينة، دارو لي دخل ليها مايثيقش بلي عايش فيها غير بوحدو، ماكاتبانش نهاائيا ديال واحد عازب مفرشة وفيها كل مايحتاج الواحد، 3 بيوت ديال النعاس وصالون كبير بلدي مقاد معاه واحد صغير فيه التلفازة ومفرش بالفوتويات وكوزينا وحمام، كان كايحلم تدخل ليها ليليان بصفتها مراتو ويعيش هو وياها تحت سقفها وفينما يجيب شي فرشة جديدة تايتفكرها هي تا من البيوتا دارهم بالالوان لي تايعجبوها والماريو ديالو مخلط بحوايجها لي كان يهز من عندها على غفلة منها ويجيبهم يخبيهم عندو، واخا كانت تنوض دابز مع خواتاتها عليهم وتاهمهم بلي هوما لي وضروهم ..