معا حتى النهاية (المراهقة الفاتنة 3)

البارت 11

دخلو للمول وهي تشوف قدامها دروج للفوق ولكن فشكل تعجبات فيهم كانو طالعين بوحدهم وبشكل غريب وهي واقفة تاتحقق فيهم جروها البنات من يديها وداوها ليهم باش يطلعو ..
إيمان : ياقوت حطي رجليك بحالي ووقفي را غانطلعو عادي اوك؟
ياقوت : هااا سيدي رحال 😮 توما شهاد العجب لا لا اخيتي غاخاطيوني وخليوني فالضس حسن ليا
ليليان : اشمن ضس الله يهديك، زيدي نطلعو را الفوق غايعحبك بزاااف وكاينين محلات ونيت بينا ندخلو نتقداو شي حوايج
شدو فيها ودارو رجليهم وهي جات تحطها وكلها تاتقفقف وحطاتها فالقنت وغير تطوات الدرجة وهي تفلت اللور زلقات وجات على شاب وراها لي حكمها مزيان وطلقات زواكتها تما خلات كلشي دار شاف جيهتها وهي كاتولول والبنات حشمو وتابسكتو فيها ..
ياقوت : واااهياويلي حي وااا مي واا باااا واابويا عومااار واااهيااا سيدي المعاااشي
إيمان (ميتة بالضحك) : ههههههههههههههههههه الله ياربي الله هههههه
ليليان (خنزرات فيها) : عجبك الحال تاضحكي هاا؟ شدي معايا هاد الموصيبة راها عنكشات السيد
حيدو ليها يديها من حوايج الولد بزز وهي كاتولول وإيمان فشلات بالضحد وليليان طلع ليها الدم حيت ماعزيزش عليها الشوهة، داروها وسطهم وكملو وهي حادرا راسها للتحت تاتشوف بعجب تا كملو الدروج والبنات هزو رجليهم وهي تعكلات فالقنت وطاحت على ركابيها ..
ليليان (بعصبية): بفففففف ندمتوتي لاش خرجت والله
سبقاتهم كاتنفخ وإيمان عاونات ياقوت تا ناضت وتبعوها والناس تما تايضحكو على ياقوت ماسكتاتش من التولويل مينما دازت خاصها طلق شي مصطلح عجيب ولا دير شي حركة فشكل، ليليان حالة عينيها فالمحلات وتاتشوف الحوايج لي فالواجهة وتوقف تا تحقق مزيان تا وقفات قدام واحد بان ليها فيه مايدار ودخلات وهوما بجوجات وراها، إيمان واحلة مع ياقوت فينما تهز صبعها تنعت فشي حد تاتنزلو ليها شحفاتها، بدات ليليان تاضور فالمحل وتاتهز الحوايج تقلبهم ولي عجباتها تاتحطها فوق ذراعها باش دخل تقيسها وإيمان بحالها ..
إيمان : ياقوت شوفي تانتي يلا عجباتك شي حاجة هزيها
ياقوت : نهزها! اااهيا ربي الكريم واش تايصدقو الحوايج هاد الناس لي گداتنا نديوها فابور زعما
إيمان : وا شديها فيديك تانمشيو لبلاصة التقياس ويلا قداتنا ندوزو لاكيس نخلصوها فهمتي تما فين كاينة ديك البنت هي لي تاتشد الفلوس
ياقوت : هاكااااك
بعد مدة ..
ليليان : إيمي غاندخل نقيس هادو
إيمان : اوك تانا غاندخل وياقوت معايا
ليليان : مزيان
مشاو لجهة التقياس ودخلو بثلاثة ليليان فغرفة وياقوت وإيمي فغرفة ..
إيمان : يالاه حيدي حوايجك وقيسي داكشي
ياقوت : شناااواا نحيد حوايجي لا لا ياخيتي مامحيداش
إيمان : وعلاش بسلامة؟
ياقوت : هووكاااك عمرني تعريت ولا هانتعرى فالزنقا اوا صافي هادشي لي بقااا لياا، يلا ساق با لخبار يفضيها ليا
إيمان : وباك فين شافك؟ وزايدون مالكي غاتعراي قدام الناس را غي أنا وياك هنا وتانا غانقيس بحالك عااادي
ياقوت : لا اخيتي ماعاديش، تي ماتاتشوفيش التلفازة ولا؟ يمشيو يكونو دايرين هنا دوك الكامارات لا لا
إيمان : واش نتي حمقة؟ الكاميرات هناا كااع هاكا ماعندهم مايدار ينوضو يغامرو بسمعتهم باش يشوفوك نتي عريانة
ياقوت : اوهووي ماكاينا ثقة والله لاتعريت صافي حلفت ومافيا لي يصوم
إيمان : اهاااه وشنو المعمول؟
ياقوت : ساااهلة، غانشدو بحال هووكااا ونلصقو معايا ونشوف القياس صااافي
إيمان : دبري لراسك اختي، سخفتيني هاد النهار مابقاش عندي الجهد ليك
حيدات إيمان حوايجها وبدات تقيس وياقوت حاضياها وتاندب حناكها وتقلب فجنابها وطلعات فوق كرسي تما تاتقلب فالسقف وتشعبط وتفلي الحيط تا سالات الاخرى وجراتها براا، لقاو ليليان تاتسناهم مشاو لا كيس خلصو وشدو ليها داكشي لي بغات وغير قدرو مقاسها وخرجو فحالهم كملو ضورانهم ونخلوها هي مابقاوش مصدعين راسهم معاها خلاوها دير لي بغات، داز لمطعم قريب للمول تعشاو ورجعو فحالهم بكري شويا طرفو حالتهم وبدلو حوايجهم ونعسو ..
كملو البنات الامتحانات وكل نهار كانو يتلاقاو مع أشرف وسلطان فاش يخرجو من لافاك والنهار اللخر لقاو تا أمير لي استفرد بليليان واعتاذر منها على لي وقع وتاهي اعتاذرات نيابة على أمين ومابغاتش ضيع صداقتها بيه بسبب داك المشكل ..
الخرجة لي اقتارح سلطان خططو ليها مزيان واتافقو على كلشي وخلاوها بالويكاند وديك سمانة لي شدو من لافاك بين الدورتين قررو يقضيوها غير فالمدينة ومايرجعوش للدوار تا لمن بعد وخاصة ياقوت مادازش عليها بزاف باش جات عندهم وماباتش ترجع ليهم ثاني .. إيمان مرة مرة تادوي مع خوها وتايسولها فقط على صحتها ودراستها وبعض المرات تاتلصق فيها ياقوت باش دوي معاه وماتايبغيش يحشمها ولكن كاتندمو وكاتبقى شاداه بالهضرة تاكايدير السبة بالخدمة ويقطع، ليليان كاتبقى غير تصنت ليهم تاكايساليو وولات تاتجيها فشكل يهضر مع ختو ومايسولش فيها ولا يطلب باش يدوي معاها وهي تكبر عليه، قلب عليها فمرة ..