معا حتى النهاية (المراهقة الفاتنة 3)

البارت 30

وقف قدامهم وخبرهم بقرارو الشيء لي تفهمو مراد وفرحو ان ولدو راجل يعتمد عليه من غير نقطة لي قلقاتو أن سلطان مازال معتابرهم غرباء عليه ولكن اضطر يتفهمو على أساس مازال ماولف وعاد عرف الحقيقة وخاصو الوقت، فرحة دارت ليهم ثاني جنازة بالبكا والنحيط، مابغاتوش يبقا هنا يسكن بوحدو ومايرجعش معاهم ..
مراد : الله يهديك يا هاد المرا، الولد بغا يكون نفسو ويعتامد عليها ويدير مستقبلو ونتي باغا تشديه حداك وقرايتو؟
فرحة : عاد لقيتو هئهئهى وماشبعتش منو وبغا يخليني تاني
مراد : شكون قاليك غايخليك؟ مالنا غانشدو الطيارة لابينا نشوفوه؟ هو هنا فالمدينة وحنا فالدوار ساعة ديال الطريق ماكاملة وهاحنا عندو ولا هو عندنا
تبكي وتقول مابكات مابغاتش تسكت ليهم، سلطان بقات فيه وركع على ركابيه عندها باس ليها راسها وحاول ما امكن يتعامل معاها عادي ..
سلطان : العلاقة ماغاتقطعش، قرايتي هنا مايمكنش ليا نمشي لشي قنت آخر وتانا محتاج وقت باش نتعايش معاكم كعائلتي الحقيقية فهميني الله يخليك
جراتو عندها وعنقاتو وماسكتاتش من البكا ومراد دار يديه وراه تايشوفيهم ..
فرحة : نبقا معاك انا هنا هئهئ 😢
مراد : مايمكنش تبقاي، مانخليكش ورايا فين نكون انا تكوني نتي وهادشي راكي عارفاه مزيان ودابا سكتي باراكا دوك العينين عميتيهم 😡
حمر فيها وسكتات "الله يعز الحكام ههه" ..
مراد : صافي اولدي على خاطرك، لي مسلكك ديرو ولكن ضروري تمشي معانا للدوار غدا ان شاء الله تشوف تما وتعرف على عماتك وولادهم، بيت كلشي يعرفك مازال حي
زيرات عليه فرحة وحركات ليه راسها باش يقبل يمشي معاهم وسلطان ماقدرش يخسر ليها ووافق بزز، ليليان ماجاتش جهتهم بقات مخشية فبيت أمين لي اضطر ديك الليلة يمشي للفندق يبات ويخلي كلشي على راحتو، العشا جابوه من برا وفرحة جلسات ولدها حداه تاتوكلو بيديها واخا مابغاش ولكن بززات عليه مابغاتش تفرق منو، معذورة أم .. كملو ودنيا رجعات عندهم على أساس صباح بكري يشدو الطريق مجموعين، نعسات مع ختها فبيت وزهير ومراد وسلطان فبيت بوحدهم وإيمان مع ليليان تا صبح الصباح وناضو كاملين بكري، فطرو وبداو يوجدو راسهم وتحت امر مراد، جمعات فرحة حوايج ليليان كاملين ماخلات والو، سالاو وشدو الطريق ..
زهير ركب فاللوطو ديال دنيا صايكها وهي حداه ومن اللور إيمان وليليان، ومراد مع فرحة وسلطان وامين بوحدو "مسكين حاكرينو ليا ولكن غير تسناو بلاتي يلا مايخرجها منكم كاملين ويوريكم أمين علاش قاد 😂 وخاصة ليليان لي محلف عليها واخا تايبين ليها العكس ههه" ..
وصلو للدوار ودخلو كاملين للدار وسلطان تايتامل البلاصة فين حا وفين عايشين والديه وخوتو، عجبو المنظر وتا الدار كانت عصرية ماكانش باين باللي فالعروبية كلها مقادة مصاوبة الله يخلف على سي مراد، فرحة شداتو من يديه وبدات دورو تما وهو غير تابعها وحاس بلهفتها، ليليان دخلات نيشان لبيتها تكمشات فيه ماستحملاتش مقاطعة مراد ليها، تا من الشوفة مابقاش شافيها بحال يلا ماكايناش حداه وهادشي قلقها وماعجبهاش وتا من أمين ماعبرهاش، ومها لي منين شافت ولدها مابقات اهتمات بيها وبقات داياها فيه غير هو "الغيرة غاتبدا"، دنيا دخلات مع راجلها للبيت وتگرع عليها تا بكاها عاد خرج، ادريس شافهم من الأرض رجعو وجا تايجري عندهم، دخل بعجاجتو باس لوالديه على ريوسهم وسلم على سلطان ومستغرب شكون هو ومتعجب تا من الشبه لي بينو وبين مراد .. وسلطان طلعو من الفوق للتحت وشاف حوايجو لي فيهم تراب والبوط لي لابس عامر غيس ..
ادريس : على سلامتكم
فرحة : الله يسلمك اولدي، فين خواتاتك؟
ادريس : كاينين عد عمتي خدوج
فرحة : ياك لاباس عليهم
ادريس : راهم گد الغولات ماخاصهم والو غا تهناي الواليدة، شكون هاد الضيف؟
مراد : دابا تعرف شكون، ولكن قبل سير جيب خواتاتك وجيب تا عماتك بثلاثة ورجالتهم وولادهم، بيت كلشي يحضر هنا
ادريس : ياك لاباس الواليد؟
مراد : دويت لا؟ سير وباراكا من الهضرة
حدر ادريس راسو ومشا دار داكشي لي قاليه باه، جمعهم كاملين وجايبهم معاه وهوما مخلوعين وماعارفين اش واقع، خاصة ان مراد ماتايعجمعهم تا كاتكون شي مناسبة وتايعلمهم بيها ولكن هاد المرة قال غير الموضوع مهم ولازم يحضرو صافي..
رابحة : وا ادريس، وتا بوك ماگالش علاش جامعنا؟
ادريس : لا اعمتي ماگال والو وتانا بحالي بحالكم مافراسي مايتعاود
فوزية : الليسمعنا خبار الخير
ادريس : ورا جابو معاهم واحد الضيف
خدوج : ضيف وشكون هادا؟
ادريس : مانعرف ليه ولكن يلا شتو اتگولو غير با محطوط، وا فوطوكوبي ديال
رابحة : هأ ياااكما ولدو واااهيا ناري يكون تزوج وولد ورا فرحة
خدوج : تي بعقلك لا؟ شسايرا تخربقي تم، خويا مايديرهاش فاين عمرو دار شي حاجة بتخبيا
ادريس : ههههه يتزوج ويجيب ولدو ومي تبقا ساكتة لا وشاداه معنگاه من الفوق
خدوج : سكتو باراكا خليو تا نوصلو عدهم وهوما يگولو لينا اش كاين
بداو يزربو تا دخلو للدار ..