معا حتى النهاية (المراهقة الفاتنة 3)

البارت 33

الكليكة تفرقات منين غادراتها ليليان، مابقاوش تجمعو، أمير لي ساق الخبار بالصدفة من أشرف وحزن على لي وقع، وأشرف لي وقتو ولا عامر بين الشركة لي ولات على ظهرو بوحدو وبين القرايا مابقاش لقا الوقت يخرج ولا ينشط، سلطان لقا خدمة ففندق مزيانا وموفق بينها وبين قرايتو واخا فؤاد عيا معاه يرجع للشركة مابغاش وقرر يكون راسو براسو بلا مايحتاج المساعدة ديال شي حد ..
واليوم كباقي أيام الأسبوع وكي عادتها إيمان فطرات فجو مرح مع ياقوت وتعاونات معاها جمعو روينة مابقاتش كاتخليها تشقا بوحدها وولات دايرا معاها يديها وفيوم الأحد كادخل معاها للكوزينة باش تعلم منها .. سالاو شغلهم ودخلو للبيت يبدلو حوايجهم ..
ياقوت : كون غا خليتيني فالدار، قرايتكم مانفهم فيها شاي وماعندي لاش نمشي
إيمان : وا غير زيدي اصاحبتي ونسيني، راكي عارفا بعد ليليان وليت كانمشي ونجي بوحدي وتا الصحاب مابقيتش شفتهم شحال هادا كل واحد تلها فجهة وجاني الملل لدرجة مابقيتش حملت ندخل لديك لافاك والمحاضرات مهمين واش بغيتيني نضيع هاا؟
ياقوت : لا ياخيتي ماضيعي شاي
إيمان : اوا هي لامشيتي معايا عاااااافاااك غايعجبك الحال والله وفاش نسالي المحاضرة نتغداو فشي قنت بلا ماطيبي وندورو شويا ونرجعو فالعشية للدار اش قلتي؟
ياقوت : ماخليتي ليا مانگول وگطعتي ليا گليبي وتي عارفاه هشيش
إيمان : هههه عارفا عارفا يا مو قلب هشيش
ترمات عليها عنقاتها وياقوت تاضحك عاجبها راسها
لبسو حوايجهم ودارو بالحالة وخرجو من الدار، وإيمان طالقة شعرها الطويل ودايرا مايكاب خفيف وعيونها الزرقاء تايلمعو، وياقوت جنبها تاهي مبوگسة ومابايناش فيها نهائيا من الدوار من غير لهجتها لي فاضحاها ..
وقف طاكسي صغير قدام لافاك ونزلو منو بجوجات بعدما خلصوه، دخلو للداخل هازين ريوسهم للسما والابتسامة مزينا وجوههم وياقوت واخا مخلوعة من هاد العالم الجديد لي أول مرة تشوفو ولكن مامبيناش وكاتحاول تبان طبيعية .. شدوها نيشان للمدرج لي عند إيمان ودخلو من بين الناس اللولين خداو بلايصهم قراب للدكتور باش تنتابه معاه مزيان ويسهال عليها السمع وتدوين بعض النقاط المهمة، كان الهرج والمرج فيه والناس اشكال وانواع وياقوت غير حالة فمها وكاتبرقق بعينيها ..
ياقوت : هأ هاد الناس كولهم تايقراو عماك؟
إيمان : معاااك ا ياقوت معاااك شحال من مرة خاصني نصحح ليك، المهم اه
ياقوت : واخيتي راني نسها ونتلف ماديش عليا، هادشي عدكم فشي شكل عجيب غريب
إيمان : دابا تولفيه راك غاتولي تجي معايا دايما فالمحاضرات تا الامتحانات وشدي رجليك فالدار، ودابا سكتي ها البخوف جا وغايبدا
دخل الأستاذ والطلبة غير شافوه وكلها شد بلاصتو، حط كتوبو والحاسوب ديالو وهز الميكرو نقر عليه بصباعو عاد قربو لفمو وبدا يدوي ..
الأستاذ : السلام عليكم جميعا
غير تسمع صوتو فالمدرج وهي تقفز ياقوت ..
ياقوت : واهيا سيدي المعاشي وها سيدي مزل البگر توما شهادشي
إيمان : ششششش مالك كارثة مع راسك مالك؟ عمرك سمعتي الجوق تايغني؟
ياقوت : وهادا بايغني تاهو؟
إيمان : لواه غايشطح، ياقوت خليني نتصنت الله يستر عليك وراه جينا قدامو غايسمع حسنا غايطردنا وتهناي نتي ديك الساع
دارت ياقوت يديها بجوج على فمها وصقلات، خلات غير عينيها لي تايدورو تما، وكاتشوف فكل جهة، تا من الناس لي جالسين وراها حنززات فيهم مزيان شويا مشاو عينيها لجهة الباب وهو يبان ليها أشرف داخل مع جوج بنات تايضحكو، شافها وجمع الضحكة وضيق عينيه تايتحقق منها مزيان وهي بزربة دورات وجهها وخشاتو وسط دفتر عطاتو ليها إيمان، بقات هاكاك تا شافت خيال وقت عليهم وسمعات صوتو ..
أشرف : أهلا أهلا وانهار كبير هادا لي شفناكم
إيمان : صبحنا على الله
ياقوت : وعلى ملايكة الرحمان 😡
أشرف : صباح النور
جلس حدا إيمان تايضحك وهي ساطت بجهد وقلبات عينيها ..
أشرف (كايطلعها ويهبطها) : احححح على التوت مع الصباح 😍 زين هادشي الالة إيمان فين كنتي مخبياه علينا اممم
إيمان : أشرف ماتبداش تاني ديك الحموضة ديالك وخليني متابعة
أشرف : ناس تالقراية بثثثثث، لا لا شي حاجة زايدا هاد النهار، لالة ماهو سر الجمال؟
إيمان : أشرف لاتعصبنيش
أشرف : اوهوووي التيتيز ماتاتحيش معاه تقليقة (رجع باللور باش يشوف ياقوت) فليفلة لاباس عليك؟
ياقوت : فليفلة هي لي غاتحررها عليك هاد الصباح يلا مافرقتينيش عليك
أشرف : ههههههههه ومالكم معايا هاد الصباح هاا؟ زعما مدة هادي ماتشاوفنا، هاكا تايقولو توحشتك فبلادكم ولا، لا لا بصح ا إيمان شنو السر اليوما؟ احححح ذبت أنا ذبت، الشوكلاط اعمي الحاج
بقا تايتغزل فيها وهي منخلاها وياقوت تاتصنت وفكل مرة تسيفط ليه كلمة، بقاو بجوج شد ليا نقطع ليك تا شوشو على الأستاذ وجرا عليهم بجوج من المحاضرة وياقوق مافاهما والو تاقالت ليها إيمان تخرج تسناها حدا الباب وماتحركش من تما ..
أشرف : هانا اكبيدة حدا الباب ماتعطليش عليا
غمزها وتبع ياقوت تايضحك ..