معا حتى النهاية (المراهقة الفاتنة 3)

البارت 52

البنت : تاتفلى عليا؟
أشرف : مسالي قبي نتفلا عليك ولا على غيرك؟ واش طلبت منك شي حاجة؟ واش عطيتك أنا شي كلمة؟ ياك غير تسارينا مع الكليكة وضحكنا شويا والسلام وكلشي فحدود نتي لي كان خاصك غير فيمن تلصقي
إيمان : بارااااكا، شنو هاد الكلام تاتقول للبنت هااا شكون نتا فملك الله واش يحسابك البنات لعبة فيديك شد هادي طلق هادي
أشرف : اشمن بنات تانتي الله يهديك، غير هادي دويت معاها عادي وتحلات
إيمان : نتا راك مريض سمعتي مرييييض وحيد دابا من قدامي خليني ندوز فحالي
أشرف : ماغاتحركي من هنا تانهضرو
إيمان : وشكون نتا لي تمنعني، حيد لانغوت ونجمع عليك لافاك كلها والله تاندير ليك الشوهة واحيد خليني
دفعاتو وزادت مع الطريق وهو خنزر فالبنت وخلاها وتبع إيمان تايعيط ليها وهي منخلاه وتاتزرب فالمشية ولافاك عامرا كاع الطلبة دخلات فيهم وتكمل بلا مادور أو تعتاذر، ماتاتشوف والو قدامها، أشرف ماشدها تا للباب وقفها تاينهج ومزير على ذراعها باش ماتحركش ..
أشرف : إيمان الله يهديك غير سمعيني، هاديك مابيني وبينها والو تانحلف ليك
إيمان : نتا تبرهشتي ا أشرف ماكنتيش هاكا شنو صرالك؟ ماشي أشرف لي تانعرف نتا واحد خور أول مرة نشوفو
أشرف : هادا هو أنا ماتبدلتش فقط غيرت من أسلوبي معاك لعل وعسى تحسي بيا وتبادليني نفس الشعور
إيمان : هههه هاد الكلام خليه عندك ماعندو باش ينفعك معايا صاااافي، بنتي على حقيقتك
أشرف : كيفاش بنت على حقيقتي، عاد شويا كنتي تبكي حيت شديت فهاديك وفاش جيت عندك ندوي معاك رجعتي لطبيعتك ثاني وبديتي تعفري كي عوايدك
إيمان : نتا لي خليتيني نتعامل معاك هاكا بأفعالك الصبيانية، ماحشوماش داكشي لي درتي للبنت؟
أشرف : هي لي دارتو لراسها
إيمان : نتاااا لي طمعتيها، نتا لي بينتي ليها أنك باغيها واخا بطريقة غير مباشرة المهم عطيتيها الأوكي تقرب منك
أشرف : هي لي طايحة أنا مالي فيها
إيمان : ماباغيش تعتارف بغلطك غير مازايد فيه
أشرف : نساي علينا هاديك وخلينا فينا حنا
إيمان : مايمكنش نساها وندير بحال يلا تاحاجة ماوقعات، حيت كيما درتي ليها هي ممكن ديرو ليا أنا
أشرف : واش نتي مزعزعة فراسك؟ نتي غييييير، واش ماباغاش تفهمي ولا دايراها بلعاااني، وااا كانبغيييك ابنت النااااس كانبغيك غير نتي وداك الفيلم درتو غير باش تغيري عليا ونتأكد تانا
إيمان : هاداك تبرهيييش ماشي فيلم ودابا قيلني عليك
أشرف : والله مانقيلك، ماشي تاعرفتك تاتبغيني تانتي ونعطيك بالتيساع ماتحلميش بهادشي يوقع
إيمان : اوا شغلك هاداك بقا تابعني كي كنتي نتا الضايع
أشرف : إيمان الله يرضي عليك غير فهميني ماتخليش مشكل تافه يأثر علينا، تا قلت غانتقادو صافي وبديتي تكبري راسك
إيمان : نتا لي قلبتي عليها ودابا فوتني وسير تاوكان دير عقلك وتبدا تميز بين الصح والغلط واجي هضر معايا
مشات فحالها وخلاتو بلاكة بغا ياكل راسو بالفقسة، دار يديه على راسو وقبس حجرة قدامو وضرب رجلو مع الأرض تاينعل زهرو المكوز ..
أشرف : تفووووو مررررض، زهير كي داير، ايمتا غادير عقلك تانتا ايييمتا تاطاحت فشبكتك ونتا تخورها فاللخر، ولكن ماغانحبسش هنا
تكا على واحد اللوطو كانت حداه مربع يديه عند صدرو تايگدد فشفايفو وعاض على لسانو من شدة الغيظ، بدا يفكر فشي حل يعتق بيه لالقى مايعتق ..
أشرف : هو لي قادر يعاوني، غاندوي معاه يفتي عليا شي ري
جبد تيليفونو وصونا على خوه لقاه مشغول وسب فخاطرو بحال يلا كلشي ضدو هاد النهار، دار للباركينغ هز اللوطو ديالو وتحرك فحالو للشركة يكمل خدمتو لي مأجلها للعشية وعقلو غايب عند حبيبتو تايفكر كيفاش يصالحها ويخليها ترضي عليه ..