معا حتى النهاية (المراهقة الفاتنة 3)

البارت 70

وبنات الدوار حسدوها على سعدها وقابلوها غير بالنميمة مع بعضياتهم ..
البنت 1: هاتي شوفي امي سعد ياقوت الهبيلة
البنت2: راحنا لي هبالات ماشي هي، شوفي العريس لي طاحت عليه
البنت 1: كانت ظل دور فالدوار وتلقط الدعاوي ومامشات تازوجات بسيد الرجال وأنا موي تبقا حابساني فالدار وتگول تركني تاتزوجني وهانا بقيت واحلة فعنگگ
الأم : لا ابنيتي على هاد القبال كي تحلي عينيك خرجي دلحي تايظلام الحال ونشوف السعد لي هاتجيبي، الله ينعل لي مايحشم
فرحة هازا محمد علي وجالسة فكرسي قدام البرزة تاتشوف فولدها لي بارز حدا عروستو ومرة مرة بدوي ليها فوذنها وتبدا ضحك، ليليان ماخلاتهاش بنتها تبرز ودخلاتها لبيت أمين حيدات قفطانها وتكات هي وياها فوق الفراش وعطاتها البزولة تنعس، أمين قلب عليها وقالو ليه فين كاينا ومشا عندها، تخشا من وراها معنقها وهز راسو تايطل على بنتو مغمضة عويناتها وتاترضع فالبزولة ..
ليليان : ماخلاتنيش نجلس
أمين : عارفها عذباتك شفت، العرس بقا ليه غير شويا ويسالي، الدنيا بدات تخوا غير خليك حداها وتانا دخلت فحالي نعس
ليليان : واخا، داز غزال الله يكمل عليهم
أمين : آمييين
بقا معنقهم بجوج ونعسو هاكا .. والعرس سالا وأخيرا ياقوت ولات لسلطان وشكون كان يظن أن هاد الجوج يتفاهمو ويتزوجو .. دخلو لبيتهم لي قادوه ليهم وسدو وراهم الباب، ياقوت وقفات الوسط تاتفرك فيديها وسلطان عنقها من اللور خاشيها فيه ..
سلطان : وأخيرا صفينا بوحدنا
دورها عندو وباسها فراسها وهي حشمانة ماهزاتش فيه عينيها ..
سلطان : عييتي ياك؟ بدلي عليك واجي تنعسي ترتاحي
حركات ليه راسها وعطاها بالظهر تابدلات مابغاش يحرجها وبدل تاهو وتخشاو فالسرير وهي مبعدة منو ومكمشة فالجنب ..
سلطان : هه مالك مبعدا، قربي
ياقوت : لا غير خليني مرتاحة هوكايا
تبسم وجرها عندو بزز منها دارها بين رجليها زير عليها وخشا وجهها فعنقو ماخلاش ليها فين تفنفن ..
ياقوت : سلطااان بعد
سلطان : الله كي خارجا سميتي من فمك، أول مرة تنطقيها هاا
ياقوت : واعافاك
سلطان : لا هاكا غاتنعسي غير ولفي
رصات ولا نقولو استحلاتها وهو خاشي صباعو فشعرها تايحكو، غمضو عينيهم ونعسو .. وفالصباح ودعوهم وشدو الطريق للمدينة فين غايقضيو شي يامات قبل مايرجعو لدارهم .. وياقوت قالت بايباي للدوار وعيشتها غاتكون فالمدينة ..
دخلتهم كانت عالام، حتا شيباتو عاد استسلمات ليه 😂 ..
--------------------------
فساعة متأخرة من الليل .. دخل لدارو لي غاب عليها النهار كامل بسبب ضغط الخدمة، لقا الظلام قدامو والسقيل عرف مرتو وبنتو غايكونو نعسو، مشا نيشان للكوزينة شعل الضو وبدا يقلب فالماعن لقاهم مستفين مجموعين مغسولين وعقد حجبانو، حل الثلاجة كايقلب فيها تا جات عينو على بواطا باينا فيها المرقا جبدها وعرفها ديال البارح حيت هي لي كلا منها وبقا، هز قرعة شرب وخرج لبيت النعاس وفالطريق سمع صوت لغا ديال بنتو، دفع باب البيت ودخل لقا غير ضو الفايوز لي مشعول، شاف جهة السرير وهي تبان ليه بنتو ذات 8 أشهر جالسة كاتلعب بتيليفون فيديها وكاتلاغي وتقول بابا ومرتو ناعسة حداها على جنبها يديها تحت حنكها ويد لاخرى فوق كرشها لي بارزة قدامها، لابسة بيجامة سخونة ديال الدار سروال طويل وتريكو فوقو ديال القطن فالبيض والازرق مفتوح ومزوقة برسوم كارتونية لي كايعجبوها منين وهي صغيرة وتقيشرات بيضين فرجليها وشعرها الطويل مسرح فوق المخذة وشي شعيرات شاداهم البنيتة فيديها دايراهم ففمها، كان باين عليها العيا وعرفها كي ديما فاش تبغي تنعس البنيتة كاتصدق هي لي ناعسة، شاف البنت جالسة ومامسندة على والو وجات فجنب السرير يعني حركة بسيطة منها تقدر تجيبها على راسها نيشان فالأرض، زفر بغيظ وقرب جهتهم بخطوات بطيئة وعينيه مافارقاتش وجه مرتو الفاتن، تحنى على ركابيه قدام بنتو كايضحك معاها وتاهي نفس الشي فاش شافتو وعرفاتو، حلات فمها على وسعو كاضحك وسنيناتها جوج تحتانيين كايلمعو وتحرك وتشطح بيديها فرحانة بيه ومولفاه بزاف وكلمة "بابا" لي ففمها، شاف الفون فيديها كبير عليها وثقيل ومع ذلك هازاه للفوق، شويا قلبات وجهها جهة ماماها وجات تهبط الفون ديريكت على كرشها الحركة لي خلاتو يقفز ومد يديه بسرعة شدها وهو كايدوي معاها بصوت مسموع بحال يلا كاتفهمو شنو كايقول ..
أمين اهياا، بيتي ضربي خوك المجرمة هااا .. دوي ماحشمتيش اراي داك المشقوف من يديك وهو كبر منك اري لهنا
حيدو ليها من يديها بزز وهي تكسيري بالغوات ورجعات راسها اللور تلاحت على المخذة كاتجبد وتغوت ..
ريحان : اععععععععععع هئهئ عععععععععع
شافها هاكاك وشداتو الضحكة وبغا يجرها عندو وهي كاتجبد تا ضربات ماماها برجليها وداكشي لي خاف منو طاح فيه، نقل عينيه جيهتها وبانت ليه تقلبات على ظهرها كاتنين ومخسرة وجهها وهو يمد يديه عندها بدا يحركها ففخذها باش تفيق ..
أمين : فيقي الالة هيييي فيقي
بقا تاينغزها بصباعو تا حلات عينيها فالسقف ..