معا حتى النهاية (المراهقة الفاتنة 3)

البارت 38

الزغاريد والأغاني الشعبية المشهورة فالدوار كاتسمع منين ومنين، الفرحة والسعادة باينا على كل الوجوه وكيف لا واليوم عقد قران بنت مراد وولد زهير، الأخوين المعروفين فوسط الدوار بحكامتهم وشهامتهم ورجولتهم وهبتهم، الكبير والصغير فرحان معاهم، الدار عامرا ومالين الدار دايرين جهدهم وكثر بالترحيب بالناس، فرحة ماقداتها فرحة كادور من جهة لجهة كي النحلة وترحب بهادا وداك، ومراد كذلك مع الرجال برا هو وخوه وولادو الذكورا والعريس وخوتو لي قطعو مسافات خصيصا باش يحضرو لعرس خوهم الصغير، لي ناشطين حيت اليوم ديالهم والعيالات للداخل حاميين الطرح بالتعارج والطارات والصواني والمعالق، العروسة جالسة فبيتها بقفطان بيض محجر وشعرها مجموع على شكل مشيطة سامبل مع تاج بيض ووجها مخدوم بمايكاب خفيف وفنفس الوقت متقون رجعها بحال الأميرات وخاصة أنها غزالة جامعة جمال ماماها وباباها فنفس الوقت والقبول ديالهم بجوج وفجنبها إيمان لي تاهي لا تقل عنها، جذابة بمعنى الكلمة بتكشيطة زرقة وشعرها مطلوق بوكلي ومايكاب صارخ، شادا فيد العروسة تاتربت عليها ..
إيمان : تهدني احبيبا ديالي، النهار نهارك ماكاين لاش توتري بالعكس خاصك تكوني فرحانة باش وجهك يزيد يتنور
ليليان : ماشي بيديا اختي ففففف دااابا تجربي تانتي ودك الساعة عاد اتحسي بيا
إيمان : هههههه ياااااربي، هاكي هاكي قرصيني باش نتبعك
ليليان : هه حمقة
إيمان : اححح خويا سعداتو والله وأخيرا أمنيتو تحققات وخذاك وتانتي سعداتك بيه والله يكمل عليكم بالخير ويعطيكم باش تفرحو ياااااربي
ليليان : هه لا لا باينا الفرحة غير من كيفاش ولا تايعاملني
إيمان : ومع ذلك كايبغيك وكايموت عليك وواخا لي دار غايبقى يبغيك الحمقة وتانتي وليتي كاتبغيه ياك ماتنكريييش حيت عينيك فاضحينك
ليليان : ماعرفتش والله، نكذب عليك يلا قلت ماولفتوش ووليت باغا غير ايمتا نشوفو واخا تايقصح معايا وتانصبر ليه
إيمان : حيت كاتبغيه ازبلة وكون كان العكس ماتقبليش بهادشي وديري أي حاجة باش تمنعي هاد الزواج ولكن نتي سكتي وكملتي فيه ماشي خوفا منو وإنما حبا فييه
ليليان : نتمنى ماندمش
إيمان : ماغاتندميش ازين بالعكس غاتشكري عمي مراد لي قرر يزوجك ليه، غير هو حاجة وحدة لي ماعجباتنيش فهادشي كامل
ليليان : شنو هي؟
إيمان : هي غاتبعدي عليا وتخليني بوحدي 😢 صبرت هاد شهراين ونتي هنا ولكن باش تعيشي فمدينة خرا لي جاتني صعيبة 😢
ليليان : تانا والله 😢 ماساخياش بيكم كاملين، لمن غانبقا نعاود ومعامن غانتناگر وندابز 😢
إيمان (كاتمسح دموعها وتاتنش على راسها) : شششش سكتي سكتي غايخسر لينا الماكياج، تسناي تاتعقدي وتسالي وديك الساعة أرى مانبكيو تانسخفو
عنقو بعضياتهم وتايحاولو ما أمكن يحاربو دموعهم لي على وشك الهطول، تحل الباب عليهم ودخلات فرحة بتكشيطة فالأحمر ومضمة ديال الذهب ودبالج والخاتم فيديها كلشي ذهب وشعرها مصاوباه خلاها مراد حيت ماغايدخلوش اليوم عندهم الرجال وبلغة فرجليها على قبل الحمل، بانت منورة والواحد لي شافها مايقولش والدة تبارك الله، شافتهم معانقات وأثرو فيها خاصة أنها غير على سبة وفكرة ان بنتها غاتزوج وتمشي عند راجلها مأثرة فيها، نزلات دمعة من عينيها وقربات عندهم عنقاتهم بجوجات، إيمان بعدات منهم شويا باش تخلي ليهم مساحة ووقفات خلات فرحة معنقة بنتها ومزيرة عليها ..
إيمان : خالتي بليييييز عاد سكتها ويلا بكات غايخسر ليها وجهها
فرحة (بعدات) : واخا واخا 😢 الله يحفظك من العين ابنتي، بنتي سمحي لينا على أي حاجة درناها خايبة فحقك وعرفي بلي كون ماكانتش فمصلحتك ماكناش نديروها، نتي طرف مننا ومانقدروش نآذيوك 😢
ليليان : بالعكس ا ماما أنا مامقلقاش منكم وعمري نتقلق، نتوما راكم والديا وطرف من قلبي اماما، نتوما كلشي عندي وماتانتخيلش راسي بلا بيكم، نتوما لي خاصكم تسامحوني على كل حاجة درتها وقلقاتكم مني سمحوليا بزاااااف ا ماما ورضيو عليا
فرحة : المسامحة ابنتي، وحنا راضيين عليك دنيا وآخرة، مغرشينك ومغطيينك بالرضا نتي وخوتك
باست ليها يديها وراسها وعاود عنقاتها وحطات يديها على كرشها ..
ليليان : تهلاي ليا فالبيبي ا ماما
فرحة : العقبة عندك ابنتي
دخلات دنيا تاهي عندهم ووراها نادية أم أمين وعمات ليليان تايزغرتو، فرحة دارت إشارة لليليان باش تنوض تسلم على عگوزتها وداكشي لي دارت واخا الاخرا منفخة وهازا قنانفها للسما ماداتش عليها ودارو كاملين على وجه أمين، هاد الأخير لي جالس مع الرجال بكومبلي وتايتلقى التهنئات والمباركات من عندهم وفجنبو باه وعمو بلباسهم التقليدي ..
وصل العدول ودخلهم مراد لواحد الصالون صغير قادوه لهادشي، وسيفط على فرحة تجيب العروسة وداكشي لي كان دارت ليها شبكة على وجهها وخرجوها من البيت بالصلاة والسلام على رسول الله تا لفين غايدار العقد، جلسوها مقابلة لأمين لي منين دخلات وهو حاضيها ومانزلش عينو عليها ..