معا حتى النهاية (المراهقة الفاتنة 3)

البارت 21

فؤاد تاسيمع ومامصدقش وذنيه وسلطان كثر منو مصدوم، طلق من سعدية وبعد منها شويا كايحرك راسو ب لا ماقادرش يصدق وفؤاد بقا جامد بلاصتو وكايرجع سينتا اللور وتايتفكر نهار لي خبراتو نجلاء فالتيليفون بلي حاملة وشحال فرح وماكرهش يطير ويجي عندها ولكن باه زادو الخدمة وسفرو لبلايص خرى باش يلاهيه والأمر خذا منو 6 شهور عاد اتاصلو بيه وقالو ليه رجع راه مرتك ولدات، ماتيقش راسو وشد أول طيارة للمغرب، من المطار للمصحة فين كانت ناعسة دخل عندها مرفوع وقلبو كايدق بجهد مشتاق يشوف فلذة كبدو، باس ليها راسها وبغا يشوف الولد وقالو ليه فالقرعة حيت تزاد على سبع شهور، وداوه للغرفة فين كان مع بقية الأطفال ودخلوه عندو، تفكر الدموع لي نزلو ليه فاش شافو، تفكر اللحظات لي قضاها معاها من صغرو تا ولا شاب، بلا مايحس نفس دموع طاحو ليه ولكن هاد المرة دموع اليأس والخذلان، اييه عائلتو خذلاتو وكذبات عليه وعيشاتو فوهم كبير ودابا فيقوه ناس غراب بصفعة قوية جاتو على غفلة وماكانش داير ليها الحساب، غمض عينيه بألم وزير عليهم ورخف الكرافات حيت حس بنفسو ضاقت عليه، سلطان شاف دموعو وحس هو الأخير بألم فقلبو، تلف وحار وكاع الاحاسيس تجمعو عليه تلخبط ومابقا عرف لا مايقدم ولا يوخر ..
سلطان : لا لا هادشي ماشي معقول (دمعة حية نازلة مع خذو لقات منفاها فلحيتو النامية) واش كانحلم ولا شنوووو (غمض عينيه) اه اه كانحلم كانحلم كانحلم
جلال : للأسف ماكاتحلمش اولدي 😢 هادا الواقع ونتا خاصك تقبلو، نتا حفيدي أنا ولد بنتي، بنتي لي هي أكثر وحدة ظلمت فهاد الدنيا ويلا ماسمحات ليا ماعندي فين نعس، بنتي لي عيشتها فالعذاب وعمري حنيت عليها من نهار تزادت، بنتي لي تكرفست عليها وهي صغيرة وقللت منها، بنتي لي رميت ونهار فرحات نغصت عليها حياتها هي وراجلها، راجلها لي بغاها كثر مني أنا وحماها من كلشي تا مني أنا، راجلها لي حطها فعينيه وطلع رااااااااااااجل 😢 وأنا باش نخليهم يعيشو حياتهم كي بغاو الطمع عما ليا عينيا وماخلاني نشوف والو قدامي، نساني تا فلي خلقني، قسيت عليكم بزاف 😢 وهاني دابا تانخلص
دنيا : نتا راك قتلتينا، قتلتيييييينا، شنو درنا تا نتجازاو بأب بحالك شنووو؟ أنا لي بقا فيا هي ختي، ختي لي طرف منها عايش فأحضان عائلة خرا وهي محرومة منو وفبالها بلي مات، عرفتي شحال وهي حازنة عليه وتبكي عليه، بكات عليه الدم سمعتيي الدم ومرضات فيها، ولحد داااابا مازال مانساااتو وفيينما تكون كادوي كاتجبدو لينا وتقول هاشنو كنت غاندير لولدي كون بقا عااايش، هااا قداش ولدي كان غايكووون، هااا اش تمنيت ولدي يصير فالمستقبل كون بقاااا، هه علاش تانعاود ليك أنا هادشي دابا؟ ماعرفتش علاش، ونتا أصلا ماعندك قلب لي غاتحس بيه
جلال : بنتي الله..
دنيا : شششش سكت سكت ماتقولش بنتي، أنا با مات ومن هاد اللحظة غاتنسانا عليك
فؤاد (شاف فمو) : عمري تخيلت تكوني بهاد البشاعة
سعدية : ولديي أنا درت هادشي علىىى قبلك 😢 كنت ديما تانشوفك تاتشوى على وليدات وتاحنا كانت أمنيتنا فحفيد يعمر علينا ويهز باسم العائلة
فؤاد : هادشي لي هامكم غير المال والجاه والاسم 😡 علاااااش درتو هادشي علااااش؟ ياااك ماشي أنا لي كان فيا ديييفووو، ياااك كان بامكااااني نولد
سعدية : ماسخيناش بنجلاء اولدي، نتا عارفها أمانة من عمك
فؤاد : هه وعمي قالكم توليو مجرمين باش تحافظو على أمانتووو؟
شي تايحاسب شي، شي تايتغاوت مع شي وشي حاقد وكاره شي، ناسيين الشخص لي واقف حداهم كايسمع ليهم ومراقبهم كيفاش تايدابزو، تاحد مافكر ليه هو، ولا لمشاعرو ولا بشنو تايحس فديك اللحظة، تخنق وحس براسو مجهول بلا هوية، حياتو عبارة على كذبة ودابا تفضحات والسلام، عائلتو ماهي عائلتو، والديه ماهوما والديه وخوه ماهو خوه، شكون هو ماعرفش؟! ماقدرش باقي يزيد دقيقة تما حداهم ودار عاطيهم بالظهر وخرج من الفيلا مخليهم وراه باقي دايرين فدائرة الاتهامات لي باينا ماغاتساليش وماليهاش الحد لدرجة مانتابهوش ليه فاش خرج، وقف قدام الفيلا وعينيه كايدور على حيوطها وكايسول راسو واش هنا عاش وكيفاش وشكون ناس لي عاش معاهم، شاف فراسو وبدا يقيس فحوايجو ويبعدهم علة لحمو هادوك ديالمن؟ هادو ديال ولدهم ولكن هو ماشي ولدهم باشمن حق لابسهم؟ جبد سوارت اللوطو من جيبو والبزطام وحلو تايقلب فيه هاد الفلوس ديال ولدهم وهاد الكارتات دالبانكا تاهوما واللوطو تاهي ديال ولدهم وشنو عندو هو؟ علاش هو بالضبط تهز من بلاصة وتحط فبلاصة غيرو؟ رماهم عند رجليه وحيد جاكيت وشوميز لاحهم وحيد سباطو تاهو وتقاشر وبقا حفيان، جا يحيد سروال وتفكر بلي ماغايبقا لابس شاي؟ يعني هو ماحماقش وباقي عندو العقل فكر بيه! شنو غايدير دابا كلشي حيدو وهاد اللحم لي على كتافو كي يدير يحيدو؟ رباه على ظهر غيرو هادشي من حق ولدهم هوما ماشي من حقو هو، حس براسو غايطرطق وعطاه الصداع وكشي تجمع عليه شد فيه بيديه بجوج وهز راسو للفوق كايغوت بأعلى صوتو ..