معا حتى النهاية (المراهقة الفاتنة 3)

البارت 15

نخليو هادوك ونمشيو لبلاصة خرى فين كاينين عشاقنا الاولين ولي تاحد مايجي بلاصتهم ..
فرحة وجدات العشا وطفات عليه ومشات وجدات الدوش لراجلها، الدار ولات عصرية ماتقولش كاينا فالعروبية نهاائيا من غير برا لي فيه الطبيعة أما الداخل خدم عليها مراد مزيان ورجعها كي بغات فرحة باش تلقى راحتها كثر وماتبقاش تعذب كي قبل واخا مازال حالفة مايجيبش لي تعاونها ولكن الشغل قلال وسهال عندها حيت الحوايج الصعاب حيدهم ليها، وكثر فيها البيوت بزاف منهم ديال النعاس الخاصين بولادهم وولاد خوه ومنهم صالونات لي فرشاتهم على ذوقها هي وخلات البيوت القدام بفراش تقليدي ديال الناس دالبادية مابغاتش تغير كلشي وماتخلي تاحاجة تفكرهم فلي فات ولي مازال مامات بالنسبة ليهم ..
إيمان هاد النهار كانت عندها ندوة فمدينة اخرى، داكشي علاش تسنات غير راجلها ولوسها وولدها ادريس تا دخلو من برا وغسلو يديهم وحطات العشا حيت جاو جيعانين ومراد العادة هي العادة كي يدخل للدار خاص الماكلة تحط، تجمعو كاملين على الطبلة والتويميات فارقهم باباهم جالس وسطهم باش مايتشادوش تاني واخا ماتايبينوش وتايبقاو يتحاربو فالماكلة بلا حس ولكن عايق بيهم داكشي علاش فرقهم باش مايخسرش ليهم خاطرهم فالليل، هند كي ديما جالسة تاكل فصمت وهدوء تامين تقول ديك البنت ماعايشاش معاهم صوتها تا كايتوحشوه ..
ادريس : الله يعطيك الصحة امي هادشي بنين
فرحة : بصحتك اولدي
باس ليها يدها ورضات عليه أمام نظرات مراد الراضية، كانت مقادة ليهم طاجين ديال اللحم بالبرقوق واللوز، كالو وحيدوه البنات وجابو سلة ديال الفواكه الموسمية قصرو عليهم شويا تايتذاكرو وأكيد براد ديال أتاي باش يهضمو 😂 هادي العادة فالبليدة كاين لي مايجيهش النعاس يلا ماشرب أتاي فالليل .. كل واحد قصد محلو ينعس فيه وفرحة دخلات مع مراد عاوناتو فالدوش وعطاتو الفوطة ينشف وبدات تمد ليه حوايجو بياسة ببياسة وهو مبتاسم وفرحان بيها برغم السنين لي دازو ولكن مازالها رادة ليه البال ومهلية فيه ومامخليا تا حاجة تلهيها عليه ولا تشغلها كثر منو ومن راحتو لي هي أهم عندها، لبس حوايجو ولوا على راسو فوطة صغيرة وباست ليه جبهتو ..
فرحة : بالصحة والراحة احبيبي
مراد (بابتسامة) : الله يعطيك الصحة، لهلا يحرمني منك
فرحة : ولا منك اراجلي العزيز، يالاه سبقني للبيت باش مايضربك البرد، غير نطرف هنا ونتبعك
مراد : خلي هادشي تا للصباج ويالاه ترتاحي
فرحة : لا لا مايجينيش النعاس ونتا عارف خاص كلشي يكون مقاد
مراد : وااخا الالة غير ماتعطليش عليا 😉
غمزها وهي تضحك وحركات راسها بالنفي وخوات ليه الطريق دازت وسدات الباب عليها فالدوش بالساروت وتنهدات ..
فرحة (حاطة يديها على كرشها) : دابا غانديرو علاش تافقنا أنا وياك احبيبي ونقولو لباباك المفاجأة، واش فنظرك غايفرح كي قالت خالتك؟ ياااربي يكون خير ويتقبل الأمر، راني راضية بأمرك اسيدي ربي
حلات مجر وجبدات تخوس ديالها وبدات خدمتها تاهي، دوشات ونقات راسها والزايد حيداتو وتعطرات ودهنات اللحم رطباتو كثر ولبسات شوميز كحلة مشبكة كلشي تايبان مع سترينغ ديالها ومن فوقها بينوار ديالها عاد كسوة طويلة باش تخرج ونشفات شعرها ولواتو، ودارت بالدوش نقاتو وطفات الضو عاد خرجات منو نيشان للبيت، دخلات ولقات مراد متكي فوق الناموسية ومخلي غير ضو خفيف شاعل، تبسمات ليه وجلسات فالكرسي ديالها قدام المرايا وحيدات خرقتها سرحات شعرها وعكرات 😂 عاد وقفات حيدات الكسوة وقربات عندو وهو حاضيها، تا طلعات فوق الفراش على ركابيها وكلشي عريان وتحدرات عليه باستو ففمو ..
فرحة : توحشتك
مراد (كايدوز يديه على وجهها وقرب من لحيتها باسها) : أنا كثر، شنو السر هاد النهار هاا 😉
فرحة : هه ضروري شي سر؟ توحشتك وصافي
مراد : اححح كون ماكنتش تانعرف
فرحة : هههه تاتفهمني دغيا
مراد : وعلاه شنو، راك تربية يدي أولا؟
فرحة : اييه اييه
غرسات صباعها فشعرو بلطف وقربات باستو فيه وهو مد يديه وبدا يضسار هههه ..
فرحة : حبيبي عندي ليك واحد الخير وحشمت نقولو والله، ماعرفتش واش غايعجبك ولا لا!
مراد (باستغراب) : شنو كاين؟ قولي ماعندك وعلاش غاتحشمي بسلامة فين عمرك كااع حشمتي
فرحة : واصااافي، احم مراد أنا اممم أنا
هزات يديه وحطاتها على كرشها وبقات كاتشوف فعينيه وعاضة على شفايفها ومراقبة ملامحو، بان ليها فاللول عادي غير حال عينيه وصافي تاقالت ماعجبوش الحال ونزلات عينيها بحزن والدموع تجمعو ويالاه غاتبعد منو وهو يجرها رجعها فين كانت ويديه مازال محطوطة على كرشها لي حسات بيها كاتملس عليها، هز ليها راسها عندو وضحك ..
مراد : هه مالك علاش هاد الدموع هاا؟ واش نتي حمقة كاين شي حد ماكايفرحش لهادشي هااا؟ ياك من شحال هادي وأنا تانقوليك ياغي نزيد باغي ولاد كثااار باش يعمرو عليا والعائلة تزيد تكبر
فرحة : ولكن العمر وولادنا كبرو

مراد : شششش أنا هادشي ماتايهمنيش سمعتي، الاولاد يلا كبرو راه كبرو لراسهم غدا ولا بعدو يخويو عليا ويمشيو لديورهم غانبقا غير أنا وياك وهادشي لي جاي فالطريق ان شاء الله، عمرك تفكري هاكا الله يهديك يا هاد المرا لي سمعك يقول هادي دارت جوج دراهم وفاتهم لهيه وهادا لي قدامك موطورو حفا ههه أنا فرحاااان الالة واحسن خبار سمعت هي هادي وبيت كلشي يعرف ويعرفو مراد علاش قاد 😉
فرحة : ههه نتا هو نتا عمرك تبدل
مراد : الله يخلينا فصباغتنا احبيبا، اوا (بدا ينصل ليها شوميز) ماتجيش نماركيو تما شي بيت وندخلو الثاني يونس خوه 😉
طلقات ضحكة عالية وتكات عليه وطلعو عليهم المانطة باش مانشوفهومش أنا 😢 ماباونيش ناخذ تجربة ولاد الحرام .. اوا خليوهم يعيشو الحياة من حد المشاكل مازالهم بعاد ..
ونمشيو عند بطلتنا لي منين خرجات من الدار شدات طاكسي لعند جدها نيشان وصلات ولقات تاني العساس تما شافها وناض بزربة سلم عليها ..
العساس : بنتي لاباس؟ فين غبورك شحال هادا مابقيتي جيتي
ليليان : غير مع الامتحانات اعمي، جدي لاباس عليه؟
العساس : الحمد لله هاد الساعة ابنتي، راني أنا ومولات الدار ديما نطلو عليه وهي طلع ليه الماكلة وتا من الدوا را عطاني الورقة وجبتو ليه وتايشربو فالوقت غير هو كل مرة يسولنا عليك
ليليان : لهلا يخطيكم اعمي شكرا بزاف
سلمات عليه وطلعات للدار فتحاتها بالساروت الثاني لي عندها ودخلات بشويا، لقات كي العادة غير الظلام من غير ضوء بيت النعاس لي شاعل والباب مردود، حلاتو كامل ودخلات عندو لقاتو جالس وسط سريرو وظهيرو متكيه على الكادر ومغطي تا لعنقو وعينيه مغمضين، سدات الباب وقربات منو تا وقفات عند راسو ..
جلال : جيتي؟
حل عينيه وشاف فيها، تحدرات باست ليه راسو وطولات فيها كاتشوم ريحتو لي توحشات ودموعها غير على سبة، بعدات شويا وجلسات جنبو وخرج هو يديه من تحت الغطا شد فيها ..
ليليان : علاش مازال فايق تا لدابا؟
جلال : وفين عمري نعست فهاد الوقيتة، ديما كانبقى حال عينيا نتسنى فيك تجي تا كايأذن الفجر ونشرب الدار لي كايدوخني ونعس، تعطلتي عليا هاد المرة
ليليان : كانو الامتحانات احبيبي ومن قبل وقعو شي حوايج خلاوني مانجيش
جلال : عاودات ليا خالتك، قالت ليا تخاصمتي مع ربيبها
ليليان :اه حصلني مع أمير وفهم غلط وتخاصمنا وكان غايعاود كلشي لبابا تا دوات معاه خالتي وتهدن
جلال : امم خليوه يعاود، أنا بغيتهم يعرفو بغيت نشوف ولادي الاخرين ابنتي بغيت نتسامح معاهم، راه كل ليلة كانحسها هي اللخرة عندي، خايف نموت وهوما غضبانين عليا
ليليان : الله يطول ليا فعمرك اجدي 😢 أنا غاندوي مع ماما ماتخافش وغانجيبها تا لعندك وتا خالي وجداتي تاهي نجيبها ليك واخا نعرف نركع ليهم عند رجليهم ونترجاهم يسمعو ليك ويريحوك، أنا غانوقف معاك واخا نضطر نوقف ضدهم نتا لي عندي اجدي أنا كانبغيك بزاف ومابغيتكش تمشي وتخليني شكون غايحن عليا بعدك ويفهمني وينصحني شكووون اجدي؟ غايتهرسو ليا الجنحين اجدي بلا بيك اهئهئهئ نتا وليتي كلشي 😢 شكون غايحضر ليا فعرسي ويعطيني لراجلي ويوصيه عليا شكوون؟ شكون غايفرح بولادي ويهزهم ويلعب معاهم ويتصاحب معاهم اجدي شكووون من غيرك
جلال : بنتي عاودي ليا شنو ضارك؟ حالتك هادي ماطبيعياش شنو عندك؟ مقصحاك شي حاجة
ليليان : شفتي علاش مابغيتكش تمشي وتخليني حيت نتا الوحيد لي تاتحس بيا بوووووحدك لي تاتقراني
جلال : كاينين والديك لي أقرب ليك مني أنا
ليليان : لا لا نتا لي قريب ليا من كلشي، هوما واخا والديا ولكن نتا ماشي بحالهم هئهئ نتا حاجة خرااا
جلال : تقربي منهم ابنتي قبل مايفوت الفوت
ليليان : لا هوما ماتايفهمونيش بحالك نتا 😢
زير ليها على يديها وشار ليها بعينيه باش تدوي ..
ليليان : اليوم داز صباحو زوين بزاف فرحت فيه وضحكت وتفاجأت بخبر كنت منتاظراه بفارغ الصبر ولكن فالعشية كحالت الدنيا فوجهي ونكدت اجدي 😢
عاودات ليه بالتفاصيل شنو وقع وكل شويا تبدا تبكي ويتسناها تا تهدى وتكمل ليه وهو تايتصنت ليها باهتمام ويربت على يديها بحنان ..
ليليان : شفتي على زهير عندي اجدي 😢 بنت خالتي وعمي فنفس الوقت ولي معتابراها كثر من ختي هاجماتني حيت قلت ليها خوك كذاب ومنافق واش كذبت فشي حاجة؟
جلال : غلطتي ابنتي، أي واحد مايبغيش تجريح فشخص قريب ليه وخاصة لي من دمو وكي تاتعاودي بنت دنيا علاقتها بخوها قوية بزاف ومتينة وهنا راها صبرات وضغطات على نفسها باش ماتجرحكش ابنتي وبجوج بيكم كنتو معصبات ونفاجرتو فوجه بعض، ونتي علاش بقا فيك الحال حيت بغا يتزوج؟
ليليان : قلت ليك السبب اجدي
جلال : سبب غير مقنع، حيت كون بصح ماكانش يهمك وكنتي بغيتيه يتفرق معاك كنتي تفرحي ليه حيت لقا فاش يتلها بعيد عليك ولكن نتي تقرصتي
ليليان : لا لا غير حيت نافقني وصافي وانا نيت فرحت ليه صافي الله يكمل عليه غير يعطيني التيساع أنا
جلال : اممم، قلتي ليا داك الولد طلبك للزواج ..يتبع