معا حتى النهاية (المراهقة الفاتنة 3)

البارت 28

ليليان تعصبات ومابقات تاتشوف قدامها والو، إيمان شافتها غاتزبلها وحاولات تبردها ..
إيمان : ليليان صافي تقبلي الأمر مالك هاكا دايرا؟
ليليان : مايمكنش نتقبل هادشي، كيفاش يفرض عليا شي حاجة مابغيتهاش وباشمن حق يقرر بلاصتي، غانخرج دابا عندو ونقوليه ماموافقاش ولي فجهدو يديرو
دفعات إيمان من قدامها وهزات الريدو بجهد وخرجات عندهم كي الاعصار، كلهم دارو شافو فيها وهي كاتنفس بجهد وعاقدة حجبانها ووجها ولا حمر وشعرها متناثر، عرفوها سمعات الكلام لي قال باها ولكن ماتوقعوش تكون بهاد الجرأة وتخرج عندهم بعصبية وعينيها على مراد بشوفات قاصحين، هاد الأخير لي فاش شاف نظراتها مصوبة جهتو الشيء لي ماعجبوش كيفاش بنتو تخنزر فيه، وقف وهو ناوي على خزيت، أمين تنهد وهز راسو للسما ويديه عرسها فخصلات شعرو رجعو اللور ونزلها على گفاه، زهير بقا جالس بلاصتو مراقب الوضع وتايتسنى فاللحظة المناسبة لي غايتدخل فيها وهادشي يلا هضر ولدو، فرحة رجليها فاشلين عليها شافت فبنتها وعاود رجعات شافت فسلطان لي مخرج عينيه بصدمة فليليان، ماعرفش شنو كادير هنا وشنو علاقتها بهاد العائلة، رجع سينتة اللور وخدم عقلو وتفكر بلي هادي هي الحومة لي كان نعت ليه امير ساكنا فيها كيفاش ماردش البال فاش كان داخل؟ لهاد الدرجة أثرات عليه الصدمة ونسا فين تاتسكن حبيبتو؟ ولكن اش كادير هنا هادشي لي مافهمش ..
سلطان : ليليان!!
سمعاتو قال سميتها ولكن ماعبراتوش وماشافتش فيه نهائيا ..
سلطان : ليليان شنو كاديري هنا؟
مراد : احم هادي هي ختك ليليان اولدي
سلطان : كيفااااااااش؟
مراد : هادي هي ختك لي صغر منك اولدي
حس بالعرق بارد تكب عليه ودقات قلبو كاتسارع تا ألماتو، فرحة باقا شادا ليه فيديه وزيرات عليه وقلبها تايتقطع على ولدها هادشي بزاف عليه كيفاش غايتحمل هاد الأمور كلها وهو باقي صغير والحقيقة غاتزيدو سنين كثيرة على عمرو، كلهم حسو بالشفقة عليه وزهير تايردد "لا حول ولا قوة إلا بالله" وسلطان، آآآه من سلطان فين هو عينيه غير على ديك لي واقفة قدامو، كيفاش طلعات ختو كيفاش؟ واش كاينين الصدف فالحياة لهاد الدرجة، لدرجة البنت لي عجباتو ونوا معاها الحلال تصدق ختو شقيقتو، فعلا الدنيا غريبة وتاحد مايقدر يفهمها ولا يتوقع شنو مخبية لينا، شويا بدا يضحك بهيستيرية ..
سلطان : ههههههههه لا لا بزاااف هادشي ههههههه
تايضحك ويحرك راسو ب "لا" ..
سلطان : ههه اوااااه ليليان ختي هههههه
مراد : ايه ختك اولدي هادي هي الحقيقة
سلطان : واش تاضحكو علياا ولا شنوو؟ أكيد تاتفلاو معايا وعرفتوني غانتزوج هاد البنت وقلتو ارا نديرو ليه مقلب، أشرف لي قالها ليكم ياك ههههه ولكن صراحة برااافو عرفتو كيفاش ضحكو عليا والكاميرا صرعتوها ماعندي مانتسالكم ههههههه ليليان هادو هوما عائلتك ياك؟ عاودتي ليهم واتافقتي معاهم على هادشي هههه عفريتة صافي وأنا نيت لي داير فيكم راسي وتا من الواليد (على فؤاد) دار جنازة هههه وعرف يمثل
ولا كايدخل ويخرج فالهضرة ورجع ليهم هادشي كامل غير مقلب داروه ليه، طلق من فرحة وقرب جهة ليليان ..
سلطان : ههه طلعتي ماساهلاش
ليليان لقاها على سبة وهي أصلا ماطايقا تا راسها فديك اللحظة ومعصبة لأقصى درجة وكلامو والضحك ديالو زاد جهلها كثر وهي تنفاجر فوجهو ..
ليليان : اشمن ضحك ولا كاميرا ولا زبل تانتا؟ واااا فييييييق راك خووويا سمعتي خووووويا وأنا ختك وهادشي كامل لي عرفتي صحيح وهي الحقيقة نتا خويا شقيقي تقبلها صااافي، الضحك هو لي بقا ليا هاد الساعة حيد من قدامي دابا
دفعاتو وواجهات مراد ..
ليليان : بابا شنو هادشي سمعت؟ كيفاش امين خطيبي؟ ياااك كلشي تعرف وماوقع تا مشكل علااااااش مكبر الموضوع؟ هاااهو ولدك قدامك صافي راه عرفني ختو ومابقا والو
فرحة : ليليان سكتي
ليليان : ليليان ليليان سكتي سكتي سكتي، عيييييت من السكااات عيييت فكل مرة تقمعوني وتسكتوني علاااش؟ مابغيتش نسكت وغانقول لي فقلبي هادي حياتي سمعتووو حياتي أنا وأنا بووووووحدي لي عندي الحق نقرر فيها، تا حد آخر ماعندو الحق يتدخل فيا ولا يبزز عليا شي حاجة، الزواج ماغانتزوجش والعيشة فالعروبية معاكم ماغانعيشهاش وقرايتي غانكملها وغانخدم فشنو بغيت وغانكون مستقلة، ونتوما ماغادخلوش فهادشي، ياريت لو بقا جدي عايش ياريت، هو الوحيد لي كان فاهمني ماشي بحالكم نتوما لدرجة وليت نحس بلي ماشي والديا الحقيقيين باراكا لحد هنا وسطووووب
صوتها غادي وكايزيد يرتافع ومراد مزير على يديه وكايسمع ليها، اول مرة تهز عليه صوتها الحاجة لي ماتقبلهاش ومارضاش قدام البقية، زاد قرب منها كثر وهي كاتشوف فعينيه نيشان مارمشاتش ولا حشمات فهمها بلي كاتحداه وتا هو ماشي من العاجزين غير وصل عندها وهز يديه تا الفوق ونزل عليها تا دارت وعاودها الثانية والثالثة تا طاحت لي عند رجليه وكلمها بركلة تا غوتات من الحر، وكون ما أمين لي تدخل وشد عمو بعدو عليها بزز كان يقتلها بلا مايشعر ..