معا حتى النهاية (المراهقة الفاتنة 3)

البارت 65

سلطان : ياقوت واخا تسكتي شويا تخليني ندوي، أنا أصلا جيت نهضر معاك تاوقع هادشي
ياقوت : واسيدي لادوينيش خليني عليك فالتيقار، تا راماغاتمشي تادير ليا شي مونتيف مع عمي يصدق نافيني من هاد الدوار
سلطان : أنا لي غانفيك ماشي هو
ياقوت : شنااااوا
سلطان : ياقوت أنا باغي نتزوج بيك
حلات عينيها على وسعهم ودلات فمها كي الهبيلة وهزات صبعها دارتو فوذنها وبدات تحكها مزيان ..
ياقوت : عاود شنو گلتي، ماسمعتش مزيان
سلطان : راكي سمعتيني مزياااان، باغي نتزوج بيك
ياقوت : تا واش داوي من نيتك
سلطان : لا من ريتي، راه معاك بصح
ياقوت : وعلاش اخيي؟ اش عجبك فيا
سلطان : كلشي وخاصة تشيطينك
ياقوت : واهتا گلتيها أنا شيطانة شنو تبعك ليا؟ بيتي تولي تاتا بليس
سلطان : وادابا خلينا ندويو بالمعقول، أنا باغيك ونتي؟ شنو رأيك فيا؟ يلا موافقة نفاتح والديا ونجيو ندويو فيك
ياقوت : لا لا نتا باااينا سايط ليك البرد فوذنيك ولا ديك فرارة طلعات ليك للراس صوطات ليك الفيزيبلات ووليتي غير تخرمز، حيد عليا من گدامي مامساليا لضحكك، گاليك يتزوجني اوا صفات
خنزرات فيهوگودات بهايمها وزادت مع الطريق خلاتو جالس تايشوف ويتنهد ..
سلطان : طحت فحمقة ماعندي ماندير من غير الصبر، اوا نحطك أمام الأمر الواقع باش تيقي نيت
ناض تاهو راجع لدارهم وفالطريق تلاقا بختو ليليان خارجا تمشى، لابسة كسيوة طويلة فالرمادي كم ولاصقة شويا وكريشتها لي بدات تبان، وفرجليها كونفيرس بيضة وشعرها جامعاه كعكة مهملة ..
سلطان : ليليان فين غادا
ليليان : غانسرح رجليا تالعند بابا، توحشت داك القنت، تمشي معايا؟
سلطان : يالاه نيت بيت نهضر معاه فشي حاجة
عنقها من كتفها وتمشى جنبها شادين الطريق لعند مراد ..
سلطان : ماناوياش تگولي لراجلك على لي فكرشك؟
ليليان : ماسولش فيا باش نقولها ليه، هانتا شفتيه خلاني هنا معلقة مانا مزوجة مانا مطلقة
سلطان : ليليان أنا لحد دابا مازال ماعارف أصل المشكل لي بيناتكم، قضية ماتفاهمتوش مادخلاتش لراسي وحاس كاينا شي حاجة كبيرة فرقاتكم
ليليان : الحاجة هي مو، ماتفاهمتش معاها وهو جا من جهتها وظلمني هادا ماكان
سلطان : ويلا كان هاكا الأمر بسيط زعما مايستاهلش هاد المدة كاملها مقاطعاه، يعني جا عندك اعتاذر صافي شرطي عليه اش بغيتي وفكري فالولد لي جاي
ليليان (فخاطرها) : اودي نتا مافاهم شاي غاسكت
وصلو عند مراد لي كان واقف على الخدامة، سلمو عليه ودخلو معاه للبراكة لي تما، ليليان بقات معاهم شويا وخرجات مع زهير لعند العود وبقا الأب وولدو تايدويو على ياقوت ..
مراد : صافي قررتي؟
سلطان : صافي الواليد، ندويو فيها دابا والعرس تاوكان نقاد أموري
مراد : وعليه، غاندوي مع باها ومن ورا عرس بنت عمك نمشيو نخطبو
سلطان : ان شاء الله
جلس شويا وناض رجع لدارهم وخلا ختو تما تاترجع مع باها وعمها، تلاقا بإيمان قدام الباب تادوي فالتيليفون داز من حداها دخل فحالو وهي بقات غادا جايا تاضحك ..
إيمان : هههه واخا ماجيتيش حضرتي للخطبة ديالي ولكن هانيا، غير هو العرس والله مانتعاتق معاك
أمين : ان شاء الله نجي، ومبروك عليك مرة خرى
إيمان : الله يبارك فيك اخويا ومبروك عليك تانتا
أمين : علاياش؟
إيمان : احم واخا كان عليا نقولها ليك شحال هادا ولكن دابا وصل الوقت لي تعرف فيه، ليليان مازال مقصحة راسها مابغاتش تتاصل بيك هي وتسناتك نتا تتاصل
أمين : شنو غاتقوليا؟ مالها ياك لاباس
إيمان : مامالها والو، غير هو اخويا مرتك حاملة، قريب يتزاد عندك شي خنفوس ولا خنفوسة
أمين : حاملة!!
إيمان : ايه اخويا، خاصك تلقا حل دغيا، البنت كرشها بدات تبان ونتوما مازال مخاصمين وهي واخذة قرارها طلق منك وعمي واقف معاها فلي بغات
أمين : وعلاش تاحد ماعلمني هااا؟ واش مامنحقيش نعرف مرتي حاملة، دابا هاد الناس تايقلبو عليا ولا شنو؟ شافوني سكت وخليتها عندهم واحتارمتهم بغاو يركبو فوق ظهري، مابغاوش يخليوني نحشم منهم
إيمان : هانا علمتك أنا ونتا شوف كي دير تجي تحل المشكل وماتجبدش ليهم سميتي ماقادا على صداع معاهم، نتا جي عادي دير بحال يلا مافراسك والو تاتشوف بعينيك ودوي ديك الساعة ونزيدك بدا بعمي وخالتي هوما اللولين دوي معاهم وخلي ليليان من بعد حيت يلا رضاو عليك هوما غايكون حالها ساهل هي، العرس ديالي بقات ليه غير سميانة، قاد فيها أمورك وجي وأنا نعاونك فلي حتاجيتي، فكو علينا الحريرة ديالكم باراكا علينا من المشاكل بغينا نرتاحو شويا فراسنا وبغينا من العرس مايبقا تا مشكل وكلشي يتصلح باذن الله، سمعتي اخويا، والحاجة لي تانأكد عليها وهي برد رااااسك سمعتي خلي عصبيتك فجنب راه يلا مشيتي تاترينفيتي ولا زلقتي ثاني عرفها اللخرة ليك، وبدا تشد يديك شويا وماتبقاش طالقها، على الله تكون درتي عقلك من هادشي لي وقع ليك وهاد البعد لي قرب يكمل مدة شهراين
هي تادوي معاه وتقريه وهو تايسمع ليها وتايزفر بجهد، ماتقبلش أن مرتو حاملة وهو آخر من يعلم ..