معا حتى النهاية (المراهقة الفاتنة 3)

البارت 32

جملة بقات كاطلع وتنزل ففرحة، فكراتها فيها نهار زوجها باها لمراد بزز منها وباش كانت كاتحس فديك الوقت ولكن الوضع مختالف، ليليان ماغلطاتش بحالها ولكن قدرها هادا، وباش يتفادى مراد الحساسية بين الخوت بزز منو خاصو يزوجها ويبعدها شويا بينما تنسى الحدث، عكس فرحة لي كانت ففترة مراهقة وكانت غاتجيب لجلال فضيحة داكشي باش اضطر أنه يزوجها ولو كان وقف غير عند هاد الحد كانت شكراتو على هاد الفعلة لي خلاتها ترتابط بشخص بحال مراد وتعيش معاه قصة حب نقية وصافية، جلسات فوق السداري ويديها على صدرها كاتبكي وتقول "سمحيليا ابنتي" دنيا بقات فيها ختها وقربات عندها حضناتها كاتربت على شعرها ..
دنيا : ششش باراكا من البكا، ماتديش عليها افرحة الأمور تخلطات عليها وخاصنا نعذروها وان شاء الله يجي الوقت لي تشكركم فيه على هادشي، أمين حنا عارفينو مزيان وتربية يدينا غايتهلى فيها وزايدون كلنا عارفينو كايبغيها وكايموت على تراب رجليها يعني ماكاين لاش تهزي الهم
فرحة : ماهازاش الهم لهادشي ادنيا هئهئ أنا ثايقة فأمين ومن اللول بغيتو ليها حيت هو الوحيد لي يستاهلها وقادر يسعدها، ولكن لي بقا فيا الطريقة باش تزوجو 😢 بنتي دابا مصور ليها عقلها أننا تانعاقبوها ومابقيناش مهتمين بيها وبغينا غير ايمتا نسيفطوها، ماعارفاش بلي هادشي فمصلحتها هي أولا وخوها ثانيا، مراد ماجاش وقرر زواجها
دنيا : عارفا عارفا وتاهي غاتفهم هادشي غير عطيوها وقت وصافي
أمين جالس حداهم وعقلو غايب كايفكر وفنفس الوقت شاد اليد لي فيها الخاتم وكايدورو فصبعو، تفكر كيفاش لبساتو ليه بزز ويديها كانو تايترعدو وشفايفها كذلك، ماكرهش فديك اللحظة يعنقها ويقوليها على قبل سعادتك مستاعد نخليك وواخا نتعذب فبعدي عليك المهم عندي تكوني فرحانة وضاحكة ولكن ماقدرش، ماينكرش تاهو باغيها واخا ماتبغيهش المهم تعيش تحت ظلو وتكون قريبة ليه يسمع صوتها ويشم ريحتها ويتنفس الهوا لي كاتنفسو هي واخا جرحاتو مامرة ما جوج ودابا ذبحاتو بسكين حافي فاش رافضاه، رجع للواقع على اثر يد تحطات على فخذو، دار لجنبو ولقاها مرات عمو لي جالسة حداه ووجهها وعينيها حمرين، حط يديه على ديالها بحال يلا تايقوليها غير تهناي ..
فرحة : ولدي أمين مابيتكش تقلق، عارفا الوضع كامل ماعاجبكش ولكن باش ترضي عمك وباك قبلتي بيه، من صغرك مرضي وغاتبقا مرضي اولدي، وعارفاك كاتبغي بنتي وتاهي غاتبغيك مع الوقت أنا متأكدة، شكون هادي لي ماتبغيكش؟ غير يلا كانت حمقة والعقل ماتكسابوش هي لي ماتفكرش فيك، راااجل وسيد الرجال اولدي وأنا فرحانة حيت غاتكون من نصيب ليليان، شحال وأنا نتمنى هاد النهار يجي والحمد لله ربي ماخيبنيش واخا ماجاش بالطريقة لي بغينا ولكن المهم جا والسلام، نتا بعقلك ومرزن وغاتعرف كيفاش تربحها اولدي، هي صغيرة ولكن حنينة واخا كاتبغي تبين القصوحية ولكن كاتبقا هشة وأقل حاجة تهرسها
أمين : عارف عارف
فرحة : عندي طلب واحد صافي هو ديرها فعينيك وتهلى فيها صافي هادشي لي بغيت منك اولدي
أمين : يدير الله خير، تصبحو على خير
جملة قالها ووقف باس ليها راسها وخرج من البيت ومن الدار كلها، كان محتاج يكون بوحدو ويفكر فلي جاي وشنو غايوقع فحياتو هو وليليان، تمشا فالأرض لي قدام الدار مسافة طويلة شويا تا للشجرة لي كان يجلس تحتها فاش كان صغير، شجرة من عمالقة الشجر فالدوار فينما خاصم عليه زهير ولا توحش نادية كان يمشي ليها ويجلس تما يبكي تا يتنفس ويتعلق فيها ويطلع تا الفوق ويبقا يتفرج على الدوار من العالي وبعد المرات تايديه نعاس فيها وينسا راسو تا كايخرجو يقلبو عليه وعمو بوحدو لي قلع بلاصتو وولا فينما غبر أمين تايجي ليه مراد ويرجعو للدار، تكا بظهرو عليها وسرح رجل ورجل بقا طاويها وجبد كارو شعلو وبدا يبخ، كل بخة تابعاها تنهيدة، واحد تابع واحد تا سالا داك النص لي بقا فالباكية عاد ناض رجع فحالو، داز على البيت فين ناعسة ليليان لقا الضو مازال مشعول فيه عرفها تاهي فايقة ونعاس جافاها ..
أمين : شنو لي بغيتي ومالقيتيهش فيا؟! ولا يمكن حبي ليك رجعني مذلول قدامك وميت القلب هادشي علاش دافعا كبير! غانقلب الآية ا ليليان، كانقسم ليك بالله تا غانقلبها وغانوليو متعادلين وغاتعيشي نفس الشي لي عشتو أنا وغاتعرفي شحال كانبغيك ومازال، هاد القلب لي ذلني ليك غانعفط عليه وندوز ..
كمل لبيتو بدل حوايجو ويجمع اش محتاج وعمر تيليفونو على الساعة لي غايفيق فيها الصباح باش يشد الطريق فحالو ويرجع لخدمتو ومنها يدفع الطلب ..
وفبيت آخر وبالضبط عند فرحة ومراد، كانو وسط فراشهم وفرحة كي عادتها متوسدة صدر حبيبها وراجليها وأب ولادها، وهو محاوطها بيديه وكل شويا يبوس راسها ويديها ويحط يدو على كرشها ويحركها دائريا ..
مراد : المشاكل لي وقعو نساونا نگولو ليهم على الحمل
فرحة : اه بصح، تايبان ليا ماغايعرفو تاتقنبل كرشي
مراد : لا لا قريب كلشي يولي هو هاداك
فرحة : ماكاين لي بقا فيا قد بنتي وأمين ..