معا حتى النهاية (المراهقة الفاتنة 3)

البارت 19

كلمة "حفيدي" بقات كاترن فالاوذان، دنيا مافهمات والو وغير حالة فمها فيهم وكاتساءل فسرها على اشمن حفيد تايدوي عليه باها، سعدية سمعاتو وتخطف لونها وبدات تقفقف، رجليها حساتهم فشلو عليها ومابقاوش هازينها شدات فيد الكرسي وبقات كاتجر فيهم تاوصلات للكنابي وجلسات مخبوطة عليه وعينيها على جلال، هاد الأخير لي مطلع فيها حاجبو وكايتسناها تجاوبو ..
جلال : فين حفيدي؟
سعدية (دارت راسها مافاهماش) : على اشمن حفيد تاتسول ا جلال؟ مافهمتش
جلال : هه بلا ماديري فيها معلمة وتنكريني سمعتي، ياكما نسيتي شكون هادا لي واقف قدامك، راه جلال سمعتي جلااااال ولد خالك ماظنيش أن السنين لي دازو هرسوني بالعكس ماتبدل فيا والو وخاصة دابا مابقى عندي مانخسر
دنيا : بابا شنو هادشي كانسمع فهمني راني مافهمت تاحاجة
جلال (دار عندها) : هانا غانفهمك ابنتي واخا هادشي لي غانقوليك صعيب وخطير وغايصدمك ولكن جا الوقت فين تبان الحقيقة كلها، فرحة نهار ولدات ولدها الاول ماماتش، ولدها عايش وأنا لي رسلت لي يسرقو من السبيطار لي ولدات فيه وبدلتو ليها بولد آخر ميت شريتو من تم نيت، والديه مافحالهمش وعرفو الولد مات ومامشاوش بيديهم خاويين، عطيتهم مبلغ غراهم وعطاوني الجثة ورشيت تا الطبيب لي تكلف بالولادة
دنيا (بصدمة) : شنووووو (دارت يدها على فمها ودموعها نازلين) شنوو تاتقول نتا هااا شنووووووو
سعدية : ماتيقيش بيه، باك كبر وبدا يخرف، أنا ماعندي تا ولد هنا خرجوووو عليا فحالكم من داري يااالااه خرجووو ولا نعيط للبوليس جايين هاجمين عليا
جلال : عيطي ليهم يالاه شنو تاتسناي، عيطي ليهم باش نمشيو كاملين ولا نسيتي تانتي مشاركة معايا وبنتك هي لي حطات داك الدوا لبنتي باش ولدات بكري ومرات ولدك تاهي وراجلك صالح، كلنا غانمشيو
سعدية : كذاااااب
جلال : قولي كذاابين كااملين، كلنا كذبنا على ولادي وضميري فاااق وتانتي نصحك تعتارفي وتعاودي كلشي وخلي الموضوع يتكشف
سعدية : خرج فحالك عليااا
جلال : ماخارجش من هنا، تا نشوف حفيدي ونعاود ليه كلشي
سعدية : قلت ليك شير بحالك
بدا صوتهم كايعلى والخدامة جات كاتجري وقفات حداهم ودنيا باقا تحت تأثير الصدمة وجلال كايغوت تاتقطع فيه النفس ثاني وبدا يكحب، تقج وصوتو خرج متقطع كايطلب من الخدامة تجيب ليه الما، شافتو هاكاك وتخلعات وطارت جابت كاس عامر عطاتو ليه شرب عاد تنفس وسعدية مازال طالقة زواكتها تا سكتاتها دنيا ..
دنيا : سكتووووووووووووو، سكتووو عليااا، شنوو هادشي وقع شنووو هادشي درتوو هااا، دويي نتا شنو درتييي دويييي واش وصلات بيك لهاد الدرجة هااا وصلات بيك تسرق ولد بنتك وتشويها فيه، وصلات بيك تحرمها من فرحتها وتغامر بحياتها، واااااش نتا ماشفتيش شنو وقع ليهاااا فاش شربات داك الدوا را كانت غاتموووووووووووووت كثر من سيمانة وهي غيبووووبة تافقدنا الأمل أنها غاتعيش، وفاش فاقت كانت بحاااااال الميتة، شهوووورا وهي مصدومة وحازنة على ولدها لي مافرحاتش بييه، شهوووورا وهي عايشة فالعذاب ومعذبة تا راجلها معااااااها
جلال (تايبكي) : نداااامت ابنتي نداااااااامت
دنيا : ششش ماتبقاش تقول بنتي سكت ماتقولش هاد الكلمة حيت نتا ماعارفش معناااها، ماحنيتي فراسك تحن فولادك، نفسك مارحمتيهااااش وغرقتيها ذنووووب فذنوووب
جلس فكرسي حادر راسو التحت ودموعو تايطيحو فالأرض وسعدية مقابلة معاه تاهي تاتبكي وخايفة مرعودة من هادشي لي مادارتش ليه الحساب، ودنيا كاتشوف فيهم باحتقار ..
دنيا : بااااز ليييكم بااااز لقلبكم بااااااز، نتوما ماشي بناااادم يستحيل تكونو بناااادم ههه وزايدها جالس تاطلب فيا نجيب ليك خوتي يشوفوك وتسامح معاهم ههه علاياش غاتسامح معاهم علاياااش نتا راك ضيعتي ليهم حياتهم وفاش تهناو منك بيتي ترحع تنكدها عليييهم علاااش رجعتي علااااااش كون غير بقيتي فداك الحبس، ندمت علاش عاونتك ندمت علاش وقفت معاك وندمت كثر لاش جبت ليك ليليان وخليتها معاك، كيفاش أمنتك علييها كيفاااااش غامرت بيها تاهي (هبطات على ركابيها وهزات ليه راسو بجهد) دويي درتي شي حاجة لبنت ختي تاااهي هاااا هضر اش درتي ليها
جلال : نموت ومانآذيهاش، ليليان ولات كلشي عندي وهي لي رجعاتني للحياة، بسببها هي ضمير صحا وفاق وبدا يأنبني وبيت نكفر على ذنوووبي
دنيا : من بعد ااااش؟ من بعد هاد الفعلة ديااالك واش كاين شي أب يدير هادشي فبنتووووو
وقفات وقربات لسعدية مخنزرة فيها ..
دنيا : فين ولد ختي؟ فين ديتيه
سعدية : قلت ليك ماعندي حد
دنيا : دويي قبل مانبلغ بيكم كلكم ودك ساعة تعتارفو بلهلا يطريه ليكم
سعدية : هئهئ جلااال علاش درتي هادشي علااش، ياك واعدتيني تاحد مايعرف بهادشي وعمرك ترجع عليه
جلال : ندمت، ندمت حيت مافكرتش فالعواقب، مافكرتش بلي الدنيا صغيرة وتقدر تلاقي الناس، واش عرفتي شنو كان غايوقع؟ كااااان الولد غايتزوج بختووووووو سمعتي غايتزوج بختوووووو ..