معا حتى النهاية (المراهقة الفاتنة 3)

البارت 29

بقاو غير بجوجات فوسط الدار وليليان تاتبكي ودموعها تايقطرو قدامها فالأض وهي حادرا راسها وإيمان واقفة عليها ودك الحالة قطعات ليها قلبها، تحدرات عند ليليان عاوناتها تا وقفات وداتها لبيت أمين لي كان خاوي، دخلاتها وجلساتها فسريرو تا قادات الفراش وتكاتها فوقو وجلسات حداها كادوز يديها على شعرها وكاترجعو ليها اللول كاتحيد زغب لي نازل على وجهها وكاتمسح ليها دموعها، وليليان تكمشات فالبلاصة رجليها عند صدرها ويديها خاشياهم وسط منهم وكاتشوف قدامها وكاتبكي فصمت ..
إيمان : قطعتي ليا قلبي اختي، الله يستر عليك باراكا من البكا راك مازالة مريضة وزايدون عمي ماكانش قاصد يضربك، نتي استافزيتيه بكلامك داكشي علاش ولكن ماتنسايش راكي عزيزة عليه ومفضلك على كلشي وواخا ضربك راه كايبقا باباك يضربك ومايخلي لي يحط عليك يديه
ليليان : هو لي خلاني نتعامل معاه هاكاك، واش فنظرك هادشي لي دار عندو الصح فيه؟
إيمان : ليليان غاندوي معاك بصراحة، نتي غالطة من ثلاثة جهات، اللولة انك خبيتي عليه قضية جدك وهادي واخذ منك موقف بسببها وثاني حاجة تصرفك مع سلطان زعما راه خوك هاداك وتاهو مسكين مصدوم وفعوض ماتشرحي ليه بشويا غوتي عليه وماراعيتيش ليه ودفعتيه هاكاك، وثالث حاجة ولي كفستيها هي فاش غوتي على باباك قدامنا كاملين ونتي عارفا طبيعتو كي دايرا يدوز كلشي إلا الواحد يقلل عليه الاحترام ماعساك نتي لي بنتو ولي اكثر وحدة خاصها تحشم منو وتحتارمو، شوفي غير ماماك وبابا انا نيت وعماتنا ماكايقدروش يرفعو صوتهم قدامو احتراما ليه ونتي قد هاكاك ودرتيها حشومة والله، ماشي كانقول هاكاك باش تزيد عليك ولا نلومك لا، ولكن تانقول هاكا باش نبين ليك فين غلطتي وتعذريه تاهو والمشكل بيناتكم مايكبرش ونتي عارفاه يلا غضب عليك
ليليان (الصمت)
إيمان (تنهدات) : راك بعقلك ا ليليان، حضريه وفكري بيه مزيان، ونزيدك بالنسبة لموضوع زواجك بخويا نتي غير كبرتي المشكل وصافي، ليليان خويا كايبغيك والله تاكايبغيك وماغاتلقايش شي واحد يبغيك بحالو، علاش رافضاه؟ ويلا جيتي تفكري وتجلسي مع راسك وتحطي كلشي قدامك غاتوصلي لكلامي، وغاتشوفيه قداش كايحماق عليك وهو لي غايتعامل معاك مزيان ويتهلى فيك وروحو يلا طلبتيه ماغايتردد باش يوهبها ليك اختي، تمنيت انا لو يبغيني شي واحد بحالو هاكا، غاتقولي هادشي غير فالأفلام وغانقوليك خويا فالواقع 😉 جربي تعطيه فرصة شنو خاسرة؟ ماعرفتي تولي تانتي تبغيه فقط عطيه فرصة وحسي بيه وفكري فيه شويا، ومع الوقت يلا بغيتيه تبارك الله ماقدرتيش تبغيه صافي واخا انا على يقين غاتولي تموتي على تراب لي تحت رجليه
ليليان : لاتزيديش فيه
إيمان : بالعكس كانقوليك لي كاين والوقت تبين ليك ابنت عمي 😉 ونفكرك نهار عرفتيه غايتزوج كي ولات حالتك، نتي ماعقتيش براسك حيت مامدخلاش الفكرة لعقلك ولكن انا عقت بيك وفهمتك مزيان وأي واحد بلاصتي ديري قدامو داك رد الفعل غايتاكد بلي كاتحسي من جهة خويا بشي حاجة
ليليان سكتات وكادور هضرة إيمان فراسها .. شويا سمعو الحس برا وخطوات تايقربو من البيت تا دخل عليهم أمين لي تدهش فاش شافهم جالسات فبيتو، ليليان بقات متكية وإيمان ابتاسمات ليه ..
إيمان : خويا، جاب الله تعاوني نطيبو شي حاجة للغدا، ماما مشات لدار خالي وخالتي فرحة ناعسة وليليان هانتا كاتشوف فيها وانا عارفني مع الطياب ههههه
أمين : فين الواليد والعم؟
إيمان : غير خرجتي نتا تبعوك، يمكن مشاو يتمشاو شويا
أمين : واخا
شاف تاني فليليان ولقاها تاهي تاتحنزز فيها ووجها حمر من البكا وحناكها مصورين فيهم يدين مراد الشيء لي كرهو، عرف باللي هادا هو الوقت فين يدوي معاها ويفسر ليها اش كاين، قرب جهتهم وجلس فوق الطبلة قدامهم وشبك يديه ..
أمين : عارفك رافضة فكرة الزواج بحالي، تانا ماباغيهش وخاصة يلا كان ديال بزز
ليليان : وعلاش ماتدخلتيش قبيلة وقلتي ليهم تانتا ماموافقكش؟ علاش خليتيني بوحدي لي ندوي؟
أمين : دويتي وشوفي اش وقع ليك، كان خاص تا تبرد القضية عاد نهضرو معاهم ولكن نتي تسرعتي، تانا كنت غانهضر ولكن فاش شفت عمي معصب والواليد منعني تاهو
ليليان : وشنو المعمول دابا؟
أمين : فاش نرجعو للدوار غاندوي معاهم ماتخافيش، وزايدون عاطي الكلمة لبنت خرا يعني غير نعسي على جنب الراحة، زواجنا مامنو والو
حركات ليه راسها ونزلات عينيها للأرض، ماحملاتوش يجبد موضوع ديك البنت ورجعات تاني هضرة إيمان تاضور فراسها وشافت فيها والاخرى دارت ليها آشارة مافهماتهاش، أمين تاهو وقف وهضر مع ختو ..
أمين : زيدي نشوفو اش كاين
إيمان : واخا ههه ليلي غانمشيو نصاوبو الغدا نتي تكاي شويا بينما وجد راك ماكلتي والو منين جيتي من السبيطار
درعات خوها وخرجات هي وياه وليليان غمضات عينيها ونعسات حيت كانت بصح عيانة ..