معا حتى النهاية (المراهقة الفاتنة 3)

البارت 51

وهي كاتبكي وتغوت حسات بشي يد تاتحركها من كتفها وسمعات صوت تاينادي بسميتها وهاد الصوت عارفاه مزيااان ..
أمين : ليليان ليلياااان
فتحات عينيها تاترمش بيهم والدموع شلال وتاتشهق، لقاتو واقف وتايطل عليها من الفوق والخوف فعينيه وتايحرك فيها، ناضت بشويا معاونها تادور فراسها ..
ليليان : فين أنا هئهئ بابا فين ماما أمييين نتا هنا
أمين : مالك؟ نتي فدارك كنتي تاتحلمي؟
ليليان : تانحلم!
وقفات على رجليها وتأكدات بلي بصح كانت تحلم، ترمات فحضنو عنقاتو مزيرا عليه وتاتبوس فصدرو وتمخشش فيه وهو مافاهم والو ..
أمين : ليليان مالك ياك لاباس
ليليان : هئهئهئ نتا ماطلقتينيش ياااك وبابا ماتبراش مني وكلهم مالامونيش ياك ا أمين هئهئ الحمد لله ياربي الحمد لله
أمين : شنو تاتقولي؟
بعدات راسها ووقفات على قرون صباعها ودارت وجهو بين يديها مقرباه عندها وشفايفها تايترعدو ..
ليليان : نتا عمرك اتخليني ياك؟ هئهئهئ سمحليا احبيبي سمحليا عافاااك أنا كانبغيك بزاااف
أمين : شنو حلمتي هاا؟ شنو شفتي تا خلاك تگولي ليا تانبغيك دابا
ليليان : كابوووس ا أمين، والحمد لله لي ماتحققش بصح كون انتاحرت هئهئ مانقدرش نتصور راسي بلا عائلتي، بلا بيكم نتوما
عاود عنقاتو وتاهو زير عليها وتايدوز يديه على شعرها وتايهدن فيها وهي تاتعاود تفكر شنو حلمات وتغمض عينيها باش تطرد دوك الأحداث من راسها، وتاتحمد الله فسرها وتشكرو، هادي كانت بمثابة تنبيه ليها من الله سبحانه، صفعة فيقاتها فآخر لحظة، بعد عليها أمين وطبع قبلة على جبينها ..
أمين : غانمشي نبدل عليا
ليليان : واخا حبيبي وأنا غانسخن العشا
ابتاسم ليها ومشا وهي تنهدات وجلسات فوق السداري، بان ليها تيليفونها حدا فخذها العاري وهزاتو فيديها شعلاتو، لقات صفحة الفيسبوك مازال خدامة والميساجات بزاف جاوها، مشات للمحادثة لي سبب كابوسها وبدات تقراها وعرفات بلي بصح أمير هضر معاها وقاليها بلي كايبغيها وهي فديك الساعة اتاصل بيها أمين وناضت للكوزينة طيبات العشا وفاش رجعات نسات التيليفون وداتها عينيها، فاش ماجاوباتوش لقاتو مسيفط ليها ميساج ..
أمير : ليليان فكري عافاك غير قولي ليا شنو ندير ونديرو
ليليان : أمير أنا دويت معاك بصفتك صديق ديالي وفتحت ليك قلبي وفشيتو عليك، كلام ماقدرتش نعاودو لتا حد من صحابي وعاودتو ليك نتا حيت ديما كنتي تفهمني وتنصحني وتوقف معايا، أمير ماكنتش عارفا بلي نتا كاتحس بشي حاجة من جهتي وخاصة الحب وماشي أي حب ونتا فاهمني، أنا لحد الآن معتابراك صديق وصافي نتمنى تفهمني عمري شفت فيك كثر من هاكا، اييه أنا تزوجت بالغصب وباش ندير الخاطر لوالديا ولكن ولد عمي تايبغيني، اييه ماننكرش ان معاملتو ليا كانت خايبة وبزااف ووصلات بيه للضرب وأنا ماغانسامحوش عليها بالساهل وغانرجعها ليه باش مايبقاش يحط عليا يديه ولكن هاد الأسبوع اللخر فاش مشيت معاه فالخط ومابقيتش تاندير شي حاجة خايبة ولا تعصبو تاهو تهدن وشد معايا الخاطر وعاملني فيه كأميرة، أمير تانا ماكنتش معاه مزيانة ودوزتها عليه مسكين وكنت نحتارقرو ونضحك عليه ونستهزء بحبو ليا وصبر عليا وعلاش تانا مانصبرش عليه دابا؟ مانقدرش نغدرو ا أمير كيما كان الحال تايبقى ولد عمي وكبر معايا، فراسك ندمت علاش عاودت ليك هادشي؟ نسيت شنو قالت ليا ماما وأكداتو عليا أن أسراري الزوجية مانخرجهاش ولكن فاش دويت معاك كان قلبي طايب وخويتو وندمت دابا عافاك ا أمير يلا كنت بصح عندي مكانة ومعزة فقلبك نسا هضرتنا ونسا كلشي تقال دابا وخلينا كي كنا قبل، عافاك مسح المحادثة ديالنا وتانا غانمسحها دابا، أنا مرا مزوجة وماكانش عليا نتعدا حدودي مع شي راجل ونبوح يشنو تايوقع بيني وبين راجلي احم وأنا دابا عرفت بقيمتو، أنا وليت كانبغيه وبزاااف، راجلي ولا هو حياتي بعد والديا ولا كلشي ومانلقاش لي يبغيني بحالو واخا ندور العالم كامل، ونتا الله يجيب ليك شي بنت الناس لي تبغيك وتبغيها تانتا وفاش غاتلاقا بيها غايجيك هادشي لي حسيتيه ناحيتيه فقط اعجاب وماشي حب، تهلى فراسك وعافاك حذف هادشي يلا مابغيتيش ليا المضرة، بسلامة عليك
بقا شحاااال وطلع ليها بلي تايكتب وفديك اللحظة سمعات أمين تايعيط ليها وهي تمسح المحادثة وبلوكاتو وبلوكات الكونط ديالها وفضلات تكتفي فقط بالواتساب بعدما تبدل نمرة وتدير وحدة جديدة لي غاتكون فقط عند عائلتها، حسات براحة بعد هادشي لي دارت، طفات تيليفونها وناضت عند راجلها للكوزينة ..
أمين : شنو كنتي كاديري
ليليان : والو احبيبي غير تسنيتك تاتبدل
سخنات العشا وهو جالس فالطبلة وتاتسولو على نهارو وهو تايعاود ليها ..
أمين :  اااه نسيت دورات ليا الواليدة اليوم تسول علينا وگالت ليا اتجي تزورنا فهاد اليامات
ليليان : واااه
أمين : اييه مالك؟ واش مابيتيهاش تجي
ليليان : لا لا حاشا، تجي مرحبا بيها دار ولدها هادي
أمين : ودارك تانتي، داكشي راه شعلات فيه العافية ..