معا حتى النهاية (المراهقة الفاتنة 3)

البارت 35

بكات تا ضرها راسها وبدا يحرقها وعينيها تنفخو وولاو جغمة من الدم، كانت معنقة رجليها ولاوية عليهم يديها وكاتمشي وتجي تا سمعات الدوقان فالبيت ووحدة من خواتاتها تاتعيط ليها تخرج تعشى، وقفات وهي كاتسمح وجهها من آثار الدموع وجمعات شعرها ورمات عليها كاب من فوق البيجامة وخرجات من البيت، لقات قدامها صفاء مازال تاتسنى فيها ..
صفاء : من قبيلة تاندق ونعيط ليك مالك كنتي منخلاني؟
ليليان : كنت ناعسة ماسمعتكش
صفاء : ومال عينيك هاكاك؟
ليليان : والو غير تايضروني شويا
صفاء : ليلي ايمتا غايجي خويا سلطان توحشتو؟
ليليان : مانعرف
صفاء : نتي هاتزوجي بأمين وهاتسافري معاه وشكون غايبقا يغوت علينا حنا؟
ليليان : را ادريس
صفاء : تا ادريس بغا يتزوج بفاطنة
ليليان : وعلاش نتوما عزيز عليكم لي يغوت عليكم؟ علاش ناديروش عقلكم وتهنيو بنادم وديوها فقرايتكم ونتوما مقابلين غير تاحرايميات والبسالة
صفاء : وماشتي راسك تي 😡 يخخ على بشر انا لي حمارة جايا عدك وانخليوك نيت بجوع باش تعلمي تقمعي لالياتك
قلبات فيها عينيها ومشات تاتقلب فتريمتها وليليان متبعة ليها العين ولأول مرة تاتغلب عليها الضحكة فهاد الموقف وعجبها الحال وقالت مع راسها غاتوحش هاد الفصعونات لي كانو مشيبينها، تبعاتها من اللور، مشات غسلات يديها ولحقات عليهم للصالون فين حاطين العشا حيت برا كان البرد محرك شويا، لقات السلام ودخلات، كان عمها وباها وفرحة وخوتها وبنت عمها الصغيرة، جلسات بيناتهم وفرحة عرات الطاجين الكبير لي مطيبة وطلع البخار والريحة ديالتو البنينة عطات، قسمات الخبز وبداو ياكلو ويتبننو ويشكروها وهي مبتاسمة ليهم وعاجبها راسها ومفتاخرة بيه، ليليان ماكانش عندها النفس تاكل غير هازا الخبز تادور فيه ومرة مرة تهز عينيها فمراد لي كان حادر راسو وتاياكل وحجبانو كي ديما معقودين  لوهلة سهات فيها وهي كاترجع ذكرياتها معاه منين كانت صغيرة وكيفاش كان تايعزها ومعلق بيها كثر من فرحة ومفضلها على الكل وليليان هي لي كاينا عندو، ماشعراتش بدموعها لي شقو طريقهم فخذها ولا يديها لي كايترعدو، ماكرهاتش تعيط ليه بابا وتنوض تعنقو وتطلب منو السماحة، فرحة كانت تاتاكل وانتابهات لبلاصة ليليان لي ماتقاستش وشافت فيها لقاتها حاطا عينيها على مراد وتاتبكي، عرفاتها فشنو تاتفكر وأنها توحشات باها وكيف لا وهي لي كانت بنتو وصاحبتو وكلشي فيها وماكانش يرتاح تاتكون هي مرتاحة، بقات فيها بنتها وهي تنغز مراد ففخذو، هاد الأخير لي شاف فيها مخنزر ودوا بشويا باش مايسمعوهش الاخرين ..
مراد : مابيتيش تحيدي منك هاد القاعدة ديال النغيز هاا؟ ماعدكش فمك دوي بيه وتشدي يدك عندك، شي نهار نگرضهم ليك مافيهاش المزاح
فرحة : وا تانسا
مراد : خاصك شي طرح باش عمرك ماتنساي
فرحة : واصافي دابا ماتزيدش فيه، شوف ليليان
مراد : علاش غانشوف فيها مالها؟
فرحة : واغير شوف فيها وصافي راها ساهية ماغاتحسش بيه
دور راسو جهة بنتو وشافها هاكا حالة عينيها ودموعها دايزين وباينا تاتفكر شي حاجة، استغرب ودار عند فرحة ثاني ..
مراد : مال هادي تادمع؟
فرحة : ماعرفتيها كاع علاش؟ شوف كيفاش ساهية فيك وتاتبكي باينا فيها ندمانة وتوحشاتك، حنن قلبك عليها امراد عافاك واش مابقاتش فيك؟
مراد : ومالي دابا شنو درت ليها؟ هي لي مقصحة راسها ومنفخة مالها ماتدوي معايا ولا باتني انا ندويها ونحزرها
فرحة : مافيها باس هادي غير بنتك ومازال صغيرة
مراد : وتانا راه باها ماشي شي حد آخر لي تشد معاه الضد وتسناه هو يدوي، ودابا خليني نكمل عشايا لاندير بناقص منو
ضربات الطم وخلاتو يرجع يكمل ماكلتو وهي تسدات ليها الشهية ورجعات باللور ..
تا كملو وناضو يغسلو يديهم وتا مراد كان نايض وهي توقف ليليان قدامو ماخلاتوش يدوز ..
ليليان : بابا 😢
دور وجهو عليها وتلاحت عليه عنقاتو من كرشو بجهد وكاتبوس ليه صدرو حيت طويل عليها ..
ليليان : سمحليا ابابا عافاك هئهئهئ مانبقاش نعاود غير سمح ليا 😢، توحشتك بزاف ابابا هئهئهئ عافاك سمح ليا ورضي عليا الله يستر عليك والله مانبقا نعاود ولا نرفع عليك صوتي غير سمح ليا هئهئهئ ندير لي بيتي وأي حاجة طلبتيها نفذها غير نتا تكون راضي عليا 😢
ماطلقاتش منو وبقات مزيرة عليه وهو كايشوف قدامو وعينيه دمعو ليه وماكرهش تاهو يعنقها، فرحة تاهي بكات ووقفات قربات منهم وحطات يديها على ذراعو وزيرات، دار شافيها وحركات ليه راسها باش يدوي معاها وداكشي لي دار باس ليها راسها وعنقها تايطبطب عليها ..
مراد : ششش صافي سكتي، الله يسامح ابنتي، اواا صافي سكتي من البكا ماوقع والو شششش وأنا راضي عليك
بقات تاتنفسات عاد بعدات عليه وهزات يديه كاتبوسها ..
ليليان : سمحتي ليا ا بابا؟
مراد : المسامحة ابنتي
ليليان : الله يخليك ليا ومايحرمنيش منك ياربي
فرحة : وأنا ابنتي شفتك نسيتيني
مراد : جاتك الغيرة ولا؟

بداو تايضحكو وعنقهم بجوجات تايبوس راسهم تا هجمو عليهم التويميات دخلو وسطهم تاهوما تاينقزو ..
فرحة : يا رصاو ماتنقزوش
مراد : زگاو تا ضابا تقيسو مكم لكرشها
ليليان (باستغراب) : مالك اماما واش كاضرك كرشك؟
فرحة ومراد شافو فبعضياتهم وادريس دخل تاهو عندهم تايمسح يديه فالفوطة، فرحة حدرات راسها حشمات ومراد ابتاسم ..
مراد : مكم حاملة
الاولاد : حاااااملة 😮
مراد : اه حاملة، مالكم تصدمتو هههه قريب يتزاد عليكم شي ولد ولا بنت
صفاء : بصح ابابا؟ غايتزاد تاني بيبي صغيور ويييييييييييي
ادريس : اوااااه كي درتي ليها الواليدة
ليليان قرصاتو تا غوت وغمزاتو يسكت وفرحة تزنگات ومراد تايضحك والتويميات فرحو وتايغوتو ..
ليليان : مبروك عليك ا ماما 😘 الله يفكك على خير
فرحة : آمين ابنتي
مروى وصفا : وييي غاتولدي لينا لي يلعب معانا وييي
ادريس ماقال والو غير تايشوف وساكت وليليان فرحات معاهم وعنقات ماماها ويديها حاطاهم على كرشها تاضحك ومراد تاهو فرحان حيت الله حقق ليه أمنيتو ف ستة الاولاد لي كان قال لفرحة ..
مراد : تصبحو على خير
الكل : وانت من أهل الخير
مشا مراد وتا ادريس مشا ينعس والتويميات شعلو التلفازة وتكاو على السدادر تايتفرجو وليليان جمعات الطبلة ماخلاتش ماماها تحط فيها يديها وغسلات الماعن عاد رجعات حداهم تكات فوق فخذ ماماها ..
ليليان : اميتا عرفتي اماما؟
فرحة : قبل مانشميو للمدينة
ليليان : وبقيتو مخبيينها
فرحة : المشاكل لي وقعو ماخلاونا نفكرو فتاحاجة خرا وزيدي عليها حشمت والله
ليليان : وعلاش غاتحشمي؟ مالك جايباه من زنقة اويلي
فرحة : وا العمر ابنتي ونتي وخوتك كبرتو ومابقا والو ويتزادو عندي الحفايد جات ناقصة
ليليان : عاااااادي ا ماما نتي مازال صغيرة وهاد الهضرة ماتبقايش تقوليها بالعكس حمدي الله وشكريه على نعمتو را كاين لي بغاهم ومارزقهمش ليه الله ونتي كرمك، طلبي غير الفكاكة بيخير والصورة الحسنة
فرحة : عندك الحق ابنتي (تنهدات) تا اليوم عاد رتاحيت فاش رجعات المياه لمجاريها بينك وبين باك
ليليان : اه بصح تانا حسيت براحة كبيرة فاش تصالحت معاه (باست ليها يديها) الله يخليكم ليا ياربي
فرحة : ويخليكم ليا، صفا مروى نوضو باراكا عليكم من التلفازة هادي وقت النعاس يالاااه
صفا : غير شويا ا ماما عافاك تايكمل المش والفار
فرحة : مليون مرة عاودتوه، نوضو تا للصباح وارى ماتفرجو، اجيو كتوبكم نيستوهم هااا شفتكم هاد العطلة ماهزيتو تا كتاب
مروى : وا ماعندنا وااالو
فرحة : ماشي ضروري تايكونو التمارين عاد تهزوهم، راجعو شويا والسلام، يالاه طفيو ديك المشقوفة ونوضو تمرگدو
ليليان : هههههههه
طفاوها وباسوها ومشاو ينعسو وتا ليليان ناضت باستها وخرجات هي ويالها بعدما طفاو الضو، كل وحدة فيهم مشات لبيتها، فرحة لي لقات مراد سارح عجول الاخرة تخشات حداه عنقاتو ونعسات وليليان سدات عليها فبيتها وتخشات فبلاصتها يالاه بغات تغمض عينيها وصونا تيليفونها معلنا على وصول رسالة، شعلاتو ولقاتها من عند أمين ..
✉ جالس وعقلي معاك تانفكر فالليلة لي غاتنعسي فيها بين يديا مابقا والو وتكوني معايا، تصبحي على خير حبيبا، كانبغيك ❤
قراتها وعاوداتها وكل كلمة كاتبقا تمعن فيها مزيان وتبتاسم، شي حاجة حساتها فديك اللحظة ماقدراتش تفسرها شعور جديد تملكها، عنقات تيليفونها وغمضات عينيها ..

💥بعد مرور شهر💥
شهر فات على أبطالنا .. شهر فات على إيمان فالقرايا والمراجعة وسلطان بين القرايا والخدمة وحياتو لي بداها من زيرو وتايأسسها شويا بشويا، وليليان لي دخلات للكوزينة وفكل مرة تاتعلمها فرحة حاجة وحبباتها فالطياب وكل ليلة تايتاصل بيها أمين وتاتبقى مجمعة معاه واخا بعض المرات تايسخن عليها راسها وتاتبغي تنفخ عليه وتايقطع فوجهها ويخليها تبات مغددة ومع ذلك ولفات تدوي معاه قبل ماتنعس وبالخصوص تقرا رسائلو لي أدمنتهم، عقدهم بقات ليه أيام قليلة وفرحة ودنيا بداو فالتحضيرات وليليان دخلات معاهم تاهيا وتاتختار معاهم ورطابت على كي كانت تا تعجبو ليها كاملين ولكن عجباتهم طبيعتها الجديدة وتقبلها للأمر ..
واليوم كغير الأيام كانت غير بوحدها فالدار وبالضبط فالكوزينة تاتجرب فواحد الحلوى تصاوبها والطابليت قدامها مخدمة فيديو متبعة معاه وهي مندامجة حسات بيدين حاوطوها وتحطو على كرشها وجسم لصق عليها من اللور ونفس سخونة فعنقها وصوت حفظاتو عن ظهر قلب تايهمس فوذنيها ..
أمين : ماكرهتش هاد الوقفة توقفيها فكوزينتك فدارك (باسها فعنقها) فدارنا بجوج احبيبا ..يتبع