معا حتى النهاية (المراهقة الفاتنة 3)

البارت 45

حلات الزكروم ودفعات الباب تا لصق مع الحيط ورجعات اللور مخلية الخرفان تايدخلو واحد من ورا واحد وهي تاتحسب فيهم تا دخلو كاملين وسدات عليهم ودارت لباب دارهم الرئيسي دخلات منو تاتنفض فحوايجها من التراب، لقات الضو مشعول فالكوزينة والبيت لي حداها فين تايتجمعو يتعشاو، عرفات كلشي دخل للدار إلا هي تعطلات وغاتقفرها ثاني من عندهم وخاصة خوها صالح، بقات واقفة تاتفكر كيفاش تخرج راسها وتبرر ليهم تأخيرها تا لهاد الوقت، خدوج كانت مقابلة الگدرة نقصات عليها البوطة وخرجات من الكوزينة وهي تلقاها واقفة قدامها شادا فطرف تشاميرتها تاتعقد فيه وتلويه على صبعها، خنزرات فيها وقربات عندها ..
خدوج : فاااين كتيي؟ هااا فاين هاد التعطيلة تا ظلام الحالة عادا جايا يا الصلگوطة، يااا دوي مالك صقلتي
ياقوت : مووي را النعاج لي هربو ليا لزرع با الحسااين وبزز باش خرجتهم من تم
خدوج : شوفي زفطة خرى أما هادي مادخلش للعقل، شوف تاني فاين كتي دالحة ونسيتي راسك كتي عد ديك طامو يااك
ياقوت : لا اموي والله ماشتها
خدوج : حمدي الله خوك ماكاينش أما يگنفك
ياقوت : وبا كاين؟
خدوج : باك كي كاين كي لا گاع ماتايدويك وهاد فشوشو لي خرج علك ورجعك هووكا ولكن ها صبري عليا بلاتي نفوتو العشا ونگلس ليه لارض ياا يربيك ويگودك مع الطريق يا تكون هضرا خرى
ياقوت : موي علاش تاديري معايا هوكا شنو درتلك؟ 😢
خدوج : بلا ماتبداي دمعي عليا تم را والله ماتبقاي فيا، ديريها يزلگ فيها حمار وطيحي دميعاتك وتمسكني يا سليعفانة راني عايقة بيك رانا ولدتك وكبرتك وحافظاك مزيان، سيري غسلي حالتك وطرفيها من تراب الدوار وبدلي عليا ديك تشاميرة رديتيها جفاف، الحوايج تجلسي فيهم سيمانة على گدها واش ماتاتجيكش الضيقة؟ تاتبدلي ها من الحمام للحمام يخليها سلعة معفونة
ياقوت : ياك اموي ياك تاتعايري فيا دروك ووليت معفونة وااخا اموي مقبولة منك
دارت راسها تقلقات ومشات هزات بيدو ديال الما من قاع الدار ظل فالشمس تاولا سخون، داتو للحمام البلدي ديالهم هزات الخامية ودخلات وفيديها شمعة شاعلاها، قطراتها فالجنب وتبتاتها وگفدات سراول لي لابسة وهزات محكة وصابونة وبدات تحك فوجهها ويديها ورجليها تا حمدو الله وشللات وغسلات تا صابوها من التراب، لبساتو وطرفات الحمام وطفات الشمعة وخرجات للبيت ديالها بدلات تشاميرتها بوحدة جديدة ومشات لبيت الگعاد لقات باها متكي على جنبو وفيديه تسبيح وعينيه على التلفازة مقابل الأخبار، باست ليه راسو هو اللول ورضى عليها وربعات رجليها حداه وخدوج تاتخنزر فيها، بقاو شحال تايتسناو فصالح يدخل باش يتعشاو وتعطل تا أذنات العشا ..
الأب : ها العشا تاتوذن وداك الصعلوك ديال ولدك مازال مادخل
خدوج : واشوف فين دالح تاهو، را گبيلة جا بدل حوايجو وگال لاعب كورة ومعاه ولد خالو الكبير وتا لدابا ماعگبش رجع
الأب : الكرة تا العشا؟ نوض نمشي للجامع نصلي ولا رجعت خطي لينا نجدغو وخلي بوه بالجوع باش يتعلم
ناض الراجل مشا يصلي وبقاو هوما بجوجات الراس فالراس وحدة مادوات مع الأخرى تاسمعو الباب تحل وعاود تسد وصوت خطوات جايين جهتهم عرفوهم ديال صالح (ناس البادية غير من تقرقيب صنادل يعرفو شكون هههه)، هز الخامية ودخل عليهم ..
صالح : السلام عليكم
خدوج : وعليكم السلام، فين كنتي غايب امزغوب ليام
صالح : هادي رجلي من السبيطار
خدوج : هاويلي على سبيطار، اش داك ليه
صالح : واغير ولد خالي مراد كنا راجعين من الكورة وجات فيه حجرة شرگات ليه جبهتو وديناه خيط ورجعنا
خدوج : هأ، وماعرفتو هاد مسخوط الوالدين لي ضربو شكون؟ ويلي ويلي هاد الدوار مابقاو يحتارمو حد والولد براني ماگالوه
صالح : ماشنا تاحد، كان واقف صحة سلام تابالينا دم شرشر من راسو
خدوج : وااانوض لوي عليا يزار وديني لدار خويا نطل على ولدو
صالح : وا ماعدك فاين تمشي دروك، السيد گاليه الطبيب يرتاح وكلهم هاينعسو غا شدي لارض تا يصبح ويفتح
خدوج : خويا موحال يصبر ومايمشي تايلگا لي دارها
ياقوت عينيها فالتلفازة ووذنيها معاهم تاتصنت ليهم شنو تايقولو، صالح مشا تاهو يطرف حالتو ودخل الأب من الجامع وتجمعو على گصعة الطعام لگمو تاشبعو وناضو ينعسو، ياقوت دخلات لبيتها وسداتو عليها، فرشات بلاصتها فالأرض حيت البيت فيه غير مانطات ومخيذات مع الحيط وماريو بجهة وحدة فيه حوايجها، تكات فبلاصتها على ظهرها وعينيها فالسقف وتاتخمم ..
ياقوت : نااري ياصگعة كون عورتي ليه عينو، ويلي ويلي مابانت ليا غا ديك الكردة نسيفطها ليه بفف عطا الله الحجر الصغير، جاب الله ماشفني حد والشجرة كانت مغطية أما كون حصلت نودي وخالي مايدوزهاش ليا
غمضات عينيها ونعسات .. فالصباح على النبوري ناضت مها جراتها گدامها تا لدار مراد دخلو عليهم كاملين بايشوفو سلطان لقا فرحة تاتوجد ليه الفطور وتندب وتدعي ..
فرحة : بيت هادا لي دار فولدي هاد الحالة تقطع يدو ان شاء الله
ياقوت (نقزات) : ولاتدعيش اخالتي لاتدعيش ..