معا حتى النهاية (المراهقة الفاتنة 3)

البارت 62

وعاوناتها تا قادات حوايجها ..
فرحة : ليليان
ليليان : أنا حاملة ا ماما 😢
فرحة : ششش علاش تاتبكي دابا؟ مسحي دموعك تانخرجو من عند الطبيبة ابنتي
لحقو على الطبيبة للبيرو وجلسو قدامها وشافت فليليان لقات عينيها مدمعين وحسات بشي حاجة ماشي هي ..
الطبيبة : غانكتب ليك شي تحاليل ديريهم ابنتي وجيبيهم ليا وتا فيتامينات خوذيهم
كتبات فالروقة ومداتها لفرحة وطلبات منها تخرج تسنا ليليان برا ووافقات فرحة وخرجات ..
الطبيبة : مالك ابنتي؟
ليليان : والو
الطبيبة : ماباينش فيك فرحتي بهاد الخبر
ليليان : غير تصدمت شويا وصافي
الطبيبة : بنتي الاولاد راهم نعمة والله سبحانه وتعالى ماعطاهم ليك إلا لأنو كايبغيك، فراسك ابنتي كاينين ناس بغاو الاولاد بالريق الناشف ومستاعدين يبيعو لي قدامهم ولي وراهم ويخسرو دم جوفهم باش يحصلو على هاد النعمة؟ أنا غانعاود ليك على واحد الصديق ديالي كانو عندو 4 ديال الوليدات وكان واحد النهار مسافر بيهم وفالطريق ماتجي فيهم غير رموك هو ومرتو تهرسو والوليدات ب4 ماتو فالبلاصة، فهمتيني شنو بيت نوصل ليك
ليليان : عارفا وفهمتك 😢 وتانا ماقلتش العكس وماشي مابغيتش هادشي لي فكرشي
الطبيبة : عندك مشكل مع راجلك؟
ليليان حركات ليها راسها وهبطاتو تاتبكي والطبيبة تنهدات بعمق وناضت من فوق الكرسي دارت لعندها وجلسات قدامها شادا فيديها ..
الطبيبة : كل مشكل وليه حل
ليليان : إلا مشكلتنا حنا، واقفين على الطلاق
الطبيبة : وماتعرفي هاد الوالد جا فالوقت المناسب كحبل نجاة لزواجكم
ليليان : ماغانسامحوش
الطبيبة : واخا ماعارفاش سبب الخلاف ولكن لي نقدر نقوليك هو فكري فولدك قبل راسك، الطفل ابنتي محتاج لجوج تناس فحياتو باباه وماماه، محتاج لحنانهم بجوج، الطفل من أول نهار ليه فالمدرسة أول حاجة تايسولوه عليها هي الأب ديالو واش نتي تخيلتي شنو غايكون جوابو فهاد الحالة؟ وقدام صحابو لي ديما غايهزو عليه نظرة وحدة أنه بلا أب ولا نقولو باباه ماعايشش معاه فنفس الدار ونتوما مفارقين وفاش يجي عندك غايسولك عليه ونتي باش غاتجاوبيه؟ اولدي أنا وباباك عند أول عقبة تفارقنا وماصبرناش على وديتك ودابا نتا لي غادفع ثمن هادشي حياتك كاملة، ولا يقدر يبقا كي الكرة بيناتهم كل واحد فيكم يلوحو لاخور وكل مرة صاكو تالحوايج مجموع وتايتسنى فنوبة شكون عندمن غايبقا، أغلبية الأزواج فاش تايتحطو فهاد الموقف تايكونو أنانيين تايفكرو غير فنفوسهم وفراحتهم ومتناسيين راحة ولادهم والنفسية ديالهم لي غاتدهور ما إن يوعاو ويوليو يعرفو ويميزو، أنا ماقلتش سامحيه دغيا ولكن ربيه شويا باش يتعلم ومن بعد لمي شملك، الصبر ابنتي هو أهم حاجة فالعلاقة، ورا تايقوليك يلا شفتي جوج مقادين ومطولين عرف الحمل على واحد هو لي صابر وزايد فالصبر، مسحي دموعك وحمدي الله وشكريه وفكري بعقلك ابنتي وديما مصير ولدك أو بنتك ومستقبلو ديريه قدام عينيك
الطبيبة تادوي وليليان تاتصنت ليها تا كملات وشكراتها وخرجات فحالها لقات ماماها تاتسناها، خلصو ونزلو فحالهم ..
فرحة : شنو قالت ليك؟
ليليان : عطاتني شي نصائح وصافي
فرحة : وشنو باليك؟
ليليان : من بعد ا ماما
ركبو فاللوطو بجوج ورجعو للدار .. دخلو بثلاثة، جلسو فالكراسا لي وسط الدار ومراد تايتسنى بنتو دوي وتقول ماعندها ..
فرحة : باينا إيمان مازال مارجعات من لافاك
مراد : مزيان باش نهضرو نيت فراحتنا، ابنتي اش باليك دابا؟
ليليان : مابان ليا والو ابابا
فرحة : شنو زعما؟
ليليان : الولد أنا بغيتو وغاندير مافجهدي نكبرو ومانخلي تاحاجة تنقصو
فرحة : وباه؟
ليليان : ماغانمنعوش منو، كايبقى ولدو من صلبو ووقتما بغا يشوفو مرحبا
مراد : هادشي نيت لي كنت باغي نسمع، الله يعاونك ابنتي، خاصاك شي حاجة دابا؟
ليليان : والو، كلشي عندي
مراد : العشية نرجعو حنا، دابا نخرج للجامع نصلي الظهر
خرج مراد وبقات الأم وبنتها، ليليان حطات يدها على كرشها ومبتاسمة ..
ليليان : مازال مامتيقة اماما بلي أنا حاملة، واش بصح روح جديدة تاتنمو فالداخل ديالي
فرحة : احساس زوين بزاف ابنتي لهلا يحرم شي وحدة منو، تانا فاش حملت بضياء كنت هاكا، فاللول مابغيتش ولكن من بعد تقبلت الأمر وكنت فرحانة
ليليان : تانا فرحانة بزاف
فرحة : دابا الخبار غاتنشر وغاتوصل لأمين وضروري مايجي يشوفك ويمكن يطلبك تاني
ليليان : يطلب تاعيا، الرجوع ماكاينش أنا دابا خذيت حقي وزيادة، وحقي هو ولدي ا ماما (فخاطرها : عارفاه تاهو غايفرح بزاف حيت كان يتمنى نحمل ونولد ليه وشاء الله نحمل وأنا مفارقا معاه، خسرت باباك وربحتك نتا اولدي، غاتبقا تفكرني فيه وغانحسو بصح معايا وغانشوفو فيك نتا، غاتعوضني على النقص وتعمر ليا حياتي)
بقات حاطة يدها على كرشها وتاتضحك بوحدها وفرحة دخلات للبيت تكى شويا وخلاتها هي تادوي مع كرشها ..
ليليان : فاللول كنت رافضة فكرة الاولاد ولكن دابا كلشي تغير، ههه حاسا براسي تعلقت بيك قبل مانشوفك، يكفي نحس بيك وتحس بيا ..