معا حتى النهاية (المراهقة الفاتنة 3)

البارت 31

زهير ضيق عينيه وحط يدو على لحيتو بحال يلا تايخمم فشي حاجة وفنفس الوقت تايشوف فولدو..
زهير : وأنا ماموافقش على ديك البنت هادي اللولة، والثانية بنت عمك لي كاينا وهي لي بيت ليك ونتا ماغاطيحش بكلامي وكلام عمك للأرض اولا؟
أمين : كلامكم فوق راسي ولكن ..
زهير (قاطعو) : ماكاين ما ولكن، غاتزوج ببنت عمك وهادا آخر كلام عندي وماتخلينيش نخيرك سمعتي ماتجبرنيش
أمين : علاش تادير هاكا الواليد؟ كيفاش غانعيش حياتي مع وحدة ماحاملا فيا الشعرة
زهير : كي تايعيشو جميع الناس، البنت اليوم رافضة وغدا موافقة ونتا ربيها على يديك وسدينا وهادشي يبقا هنا حيت يلا سقت الخبار دويتي مع عمك غانتفاهم معاك مزيااااان
أمين عقد حجبانو وحس براسو بدا يتعصب وهادشي ماغايكون فصالح تا حد بالعكس غير غايزيد الطين بلة وغاولي فشي حاجة خايبة مع باه، تنفس بجهد وحاول يكالمي راسو، ورجليه بداو يشطحو قدامو وهادشي كامل داز على عينين مراد لي كان برا وماشافوهش فاش رجع وسمع الحوار ديالهم، بقا شويا باش مايعيقش عاد دخل عندهم وداير راسو مافاهم تا حاجة ..
مراد : واحد السلام عليكم
أمين وزهير : وعليكم السلام
مراد : أمين نتا هنا، مزيان نيت لي لقيتك
جلس مراد فكرسي آخر مقابل ليهم وزهير تايغمز لولدو باش مايدويش، هاد الأخير لي قرب ينفاجر ومابغاهمش يخططو ليه فحياتو كي بغاو بحال يلا باقي دري صغير وماعارفش كيفاش يتصرف وتايتسنا الكبار يوريوه ..
مراد : ايمتا ناوي ترجع للخدمة اولدي؟
أمين : غدا ولا بعدو يلا كثرت ان شاء الله
مراد : خليها تا لبعدو واخا؟ غدا غاتكون الخطبة ديالك نتا وليليان، غدا العائلة وناس الدوار غايعرفوكم غاتزوجو ونتا فاش ترجع لخدمتك دفع الطلب ومعاه وراقكم واخا؟
أمين ماجاوبوش غير حادر راسو وتايسمع، فنفسو ماكرهش يتزوج بيها وهادشي لي ديما كان تايحلم بيه ولكن كان بغاها بإرادتها، تكون تاهي باغاه ماشي بزز منها، فاش ماردش عليه اضطر زهير يجاوب بلاصتو ..
زهير : ضروري، ماعرفناش شحال ديال الوقت غاياخذ هادشي اللهم نعجلو بيه
مراد : أمين شوف اولدي عارف هادشي جاك على غفلة وماكنتيش داير بحسابو وكنتي مخطط لحوايج خرا، ولكن نجيك من اللخر، بنتي بيتها ليك نتا، نتا لي غاتصونها وغاتعرف كيفاش تصرف معاها وزيد عليها الموضوع ديال خوها غاتبقا واحد الحساسية بيناتهم وخاصة فهاد الفترة، يقدرو من بعد فاش تزوج بيك وتعيش معاك تما ويبقاو يتلاقاو غير مرة فشحال يتجاوزوها ويبداو يتعاملو مع بعضياتهم عادي كأن شيئا لم يكن فهمتيني ياك
أمين (تنهد) : فهمتك اعمي
مراد : على ماكنت شايف تانتا كنتي باغيها وكنتي ناوي تفاتحني فهاد الموضوع ولكن دابا شايفك مافرحانش ويلا مابيتيش صافي على خاطرك، دير بحال يلا هادشي ماوقعش، نتا شوف حياتك وتاهي غاتبقا فدار باها تايسهل ليها الله فشي ولد ناس آخور
زهير : اشاوا تاتگول اخويا، بالعكس أمين موافق أولا لا اولدي، ولد عمها أولى بيها
أمين : اه بصح أنا احم واخا صافي
مراد : مزيان الله يرضي عليك
بقاو جالسين بثلاية تايتذاكرو فموضوع زواج وأمين عقلو غايب تايفكر فليليان كيفاش غايقوليها الموضوع صافي تقرر ومابقاش مجال للرفض ومن جهة خرا جهاد لي ماعرفش اش يدير معاها، استأذن منهم وخرج تايدور فالدوار يشم الهوا ويفكر فشي حل يرضي كلشي ..
فالليل تجمعو على العشا، ومراد خلاهم تا سالاو الماكلة وحطو الديسير عاد هضر معاهم وقاليهم علاش اتافق هو وخوه وولد خوه .. وفالغد فاقت فرحة ودنيا بكري باش يضورو بالحالة على قبل لوايساتهم لي غايحضرو وتا أم امين لي هضر معاها فالليل وخبرها وخوه رضا تاهو ومرتو وولادو من غير يونس لي ماقدرش يجي وإيمان وياقوت تاهوما ماغايجيوش على قبل سلطان لي مافخبارو والو من هادشي، ماكرهاتش تا خوها يحيى يحضر هو وولادو ومرتو وتا مها ولكن كلشي جا بزربة ونجاة شادا حق الله ماكاينش كيفاش يجيو تا للعرس ان شاء الله، مراد خرج يتقدا لي خاص وزهير جر امين يشريو الخواتم تحت طلب دنيا لي بغاتهم يلبسوهم فالخطبة ماشي تاللعرس كما جرت العادة فالدوار، بجوجات مخشيين فالكوزينة تايطيبو ..
دنيا : فرحة! ليليان مافخبارها والو على اليوم ياك؟
فرحة : لا
دنيا : وعلاش ماقلتي ليها تا حاجة؟ منين جينا مادويتيش معاها حرام عليك باراكا غير مراد لي مقاطعها تزيديها تانتي
فرحة : باش تربى
دنيا : قولي تحقد وتكره ماشي تربى، هي مادارت والو لي تستاهل عليه هاد المعاملة
فرحة : فنظرك نتي مادارتش حيت مشاركة معاها ولكن فنظري أنا ومراد غلطات وزادت فيه بلا قياس ولكن دابا غايتقطعو ليها دوك جنحين باش كاطير
دنيا : عنداكم تندمو على هادشي، ونهار تخوي عليك دار بقاي دمعي عليا
فرحة : دنيا شوفي، بنتي ماكرهتهاااش، بنتي تخطات حدودها وتعمات وكان ضروري شي حاجة ترد ليها عقلها وهادشي لي دار مراد، واش يحسابك حنا ماتانتقطعوش حيت ماتاندويوش معاها؟ ولكن يلا جينا نحزروها ماغانكونو ستافدنا تا حاجة ..