معا حتى النهاية (المراهقة الفاتنة 3)

البارت 34

ليليان : ماما نتي عارفاني ماتانحملش شي حاجة سميتها الكوزينة وزايدون يلا بغا لي يطيب ليه يجيب خدامة، أنا ماغانتزوجش بيه باش نخدم عليه وهاد الزواج باين من اللول كيفاش وعلاش
فرحة : يابنتي الله يهديك ديري عقلك، أمين مكتاب ليك وهانتي غاديه ان شاء الله ويلا دخلتي هادي لراسك غاتعيشي معاه مزيان وماغاتلقاي تا مشكل، والكوزينة را خاصك دخلي ليها ونتي فدار باك ماشي تاتمشي عندو وأنا كنت مساهلة معاك فهاد الموضوع غير على قبل قرايتك وحيت فششناك داكشي باش ونزيدك انا كنت بحالك يديا ماتانحطهمش فالما وكلشي تايوجد ليا ويجي تا لفمي ونهار تزوجت باك عاد رجعات ليا هضرة ماما وندمت لاش ماسمعتهاش، كنت نقول بحالك فاللول تا كليت عليها العصا وجيت هنا والحمد لله لقيت عگوزتي ظريفة وحنينة شدات بيديا وعلماتني بشويا بشويا وهانتي كاتشوفي گاع لي تعلمتو نفعني، ونتي تما غاتكوني غير نتي وياه الراس فالراس يحسابك غايخليك نتي لي مرا جالسة مربعة يديك وينوض هو يشقا عليك ويطيب؟ علاش هو غايتزوج كاع يلا غايبقى يطيب لراسو، وشوفي غير خالتك دنيا تاهي ماكانت عارفا لاتحني لا تدني ولفاتني غير أنا هازا عليه وواحد النهار كنتي صغيرة وسافرنا حنا وباك سيمانة والله يابنيتي تا بعد المرات تاتنعس بجوعها والدراري تاياكلو غير السقاتة تا عمك تايحنجر فالزنقة ويدخل واشمن حياة هادي؟ وفاش شافت داكشي مامسلكش دخلات معايا للكوزينة وتعلمات شويا، ومن التالي ابنتي حنة يديك لي غاتنفعك نتي قبل كلشي، تصوري معايا يقوليك وجدي ليا شي شهيوة ونتي ماتعرفي منين تجي ليها اش غايقول عليك؟ فنيانة ومعگازة ووووو .. غاترضاي قدامو؟ غاترضاي تسمعي هاد الكلام؟ ماشي كيبحال يلا كنتي معلمة ماعندو مايقول عليك وغاتسكتيه بيها
فرحة كادوي وتعبر وتعطيها أمثلة وفكل مرة تقارن بين الحادكات والمعكازات وليليان كاتصنت ليها وتنهد تا اقتانعات بكلام ماماها وقررات تبدا تجلس حداها وتنقل منها ومرة مرة تصاوب شي حاجة من يديها تا تعلم وداكشي لي كان بدات من هاد النهار وفرحة تاتوريها وتعطيها مرة مرة تقاد وفاش تشوفها خسرات شي حاجة تعاود ترجع معاها، قادو العگبية ولي كانسميوها عندها الكاسكروط وتجمعات هي وياها عليه بوحدهم اما كلشي خارج، دنيا لخدمتها وزهير ومراد للأرض ومعاهم ادريس والتويميات مع هند فدار عمتهم ..
ليليان : احم ماما
فرحة : نعام؟
ليليان : ماما بغيت نكمل قرايتي، مابغيتش نجلس فالدار ماشي تا لاخر عام ونحبس
فرحة : اوا ابنتي ماعندي مانقوليك أنا فهادشي، شوفي مع راجلك
ليليان : ماشي راجلي ا ماما 😡 مازال ماولا راجلي ومستحيل نتشاور معاه فشي حاجة
فرحة : ليليان راه تقرات الفاتحة ديالكم وبقا ليكم فقط العقد ولي مابقاش ليه بزاف ديال الوقت يعني هو لي كايرجع ليه القرار، يا يبغي يا مايبغيش
ليليان : بفففف عمري تصورت نتحط فهاد الموقف وخاصة معاه هو
فرحة : اييه الايام دوارة، الواحد مايعرف شنو مخبيا ليه ونتي ابنتي خبات ليك حاجة زوينة شكون بحالك
ليليان : لا لا باينا زينا نييت
فرحة : اممم ولكن يلا شفتي مع باك يقدر يعاونك ويدوي ليك معاه
ليليان : بابا ماتايدويش معايا وتا الشوفة ماتايشوفها فيا وبيتيني نمشي نطلبو كي درتي ليها ا ماما
فرحة : وشنو فيها يلا طلبتيه؟ ياك غير باك هاداك ماشي شي حد غريب
ليليان (الصمت)
فرحة : ايييوا لي بيتي ابنتي، مهم ماعلينا، خاصنا نبداو نوجدو للعرس من دابا باش يقدنا الوقت، عندنا بزاف مايتقدا وغانشوف مع مراد يدينا للمدينة نتقداو ولا نتسناو تاتجي دنيا وتعاونا، فففف ماعرفت واش نهضر مع عگوزتك ولا بلاش وأصلا نهار الخطبة كانت منفخة وماعاجبها حد يخخ بنادم عمرو يتبدل باقا هي نادية لي عرفت
ليليان : لي بان ليكم ديروه، ماتسولوني على تا حاجة
فرحة : هأ وعلاش بسلامة؟ ياك نتي العروسة
ليليان : خليني ا ماما دابا ففف
ناضت كاتنفخ دخلات لبيتها وخلات فرحة مبرقة عينيها وكاتمص فشفايفها وتحرك راسها وناضت جمعات الماعن وجبدات ورقة وستيلو وبدات تخطط تما وفبالها حاجة وحدا عرس بنتها خاصو يكون مطرطق والسلام ..
ليليان ربعات رجليها فبلاصتها ودفارها ففمها تاتعض فيهم وفنفس الوقت تاتفكر كيفاش تقنعهم يخليوها ترجع تقرا وتشد اجازتها ..
ليليان : أصلا باشمن حق يحرموني من قرايتي، ماكفاهمش مزوجيني بزز مني يخخخ وزينا قالت ليك خاصني نطلب راجلي اوا صفات 😡
وهي كادوي مع راسها صونا تيليفونها وهزاتو بزربة على امل يكون شي حد فصحابها تفكرها واتاصل بيها، ولكن غير شافت الاسم واختفت لهفتها وجات بلاصتها الرعدة والقفقافة والنفس المجهدة، تيليفون صونا وقطع وعاود صونا عاد فاقت من القلبة وجاوبات ..
ليليان : ألوو
أمين : وعليكم السلام! فين كنتي؟ من گبيلة تيليفون تايصوني
ليليان : غ غير ماسمعتوش
أمين : اممم شنو كاديري دابا؟
ليليان : وعلاش كاتسول؟ اش مشا ليك
ماجاوبهاش وتاهي بقات ساكتة تا طلع معاها اش قالت والنبرة باش جاوباتو ..