My ShiFu Kiss Me!!!( Completed )

26(U+Z)

*ဆရာယွီမောင်၏ ဓားသိုင်းလေ့ကျင့်ချိန်*

သွမ့်ရုံချင်း၏ ဤကနေ့ မနက်ခင်းမှာဖြင့် မမျှော်လင့်ထားစွာ အရင်နေ့များကထက်ပင် ပိုမိုကာ ရှည်ကြာနေခဲ့သည်။မနေ့ညက မယ်တော်ပြောပြလာသည့် ဝူမျိုးနွယ်များနှင့် သွမ့်မျိုးနွယ်များအကြားရှိ အကြောင်းတရား အမှန်ကို အလုံးစုံ သိခွင့်လိုက်ရသည့် နောက်မှာတော့ ဝူရှကို အမြန်လေးပင် တွေ့မြင်လိုနေခဲ့သည်။

အကယ်၍ သူကသာ သွမ့်မျိုးနွယ်များ၏ ကိုယ်စား တောင်းပန်ဝပ်တွားပေးလေမည်ဆိုလျှင်ရော ဝူရှမှာ ပြီးဆုံးခဲ့လေသည့် အပစ်ဟောင်းများအတွက် လစ်လျုရှုပေးနိုင်လိမ့်မည်လား။ဝူရှက မည်သို့သော စိတ်မျိုးနှင့်များ သူ၏နံဘေးကို ဆိုက်ရောက်လာခဲ့ရပါသည်နည်း။

ဝူမျိုးနွယ်များအပေါ် သွမ့်မျိုးနွယ်များ၏ တိပလွန်းလှသည့် အပစ်ကြွေးများအကြောင်းကို မခြွင်းမချန် သိခွင့်ရလိုက်သည့်နောက်မှာတော့ ဝူရှမှာ သူ့ကို စိတ်ပူလွန်းလှ၍သာ တာလီကို ရောက်လာခဲ့လေသည်ဆိုသည့် အနှီအကြောင်းပြချက်ကပင် ယုံကြည်ဖွယ်မရှိ ဟန်ဆောင်မှုတစ်ခုအလား မဝံ့မရဲ ခံစားနေမိလေပြီ။

အကယ်၍ ဝူရှနေရာတွင်သာ သူဖြစ်နေခဲ့လျှင် တွေးမိသည်။သွမ့်လူမျိုးများ၏ အပေါ်မှာ အသွေးအသားထဲအထိ စွဲနစ်နေအောင် အမုန်းကဗ္ဗည်းတိုင်များ စိုက်ထူနေမိလိမ့်မည်က အသေချာဖြစ်သည်။လက်စားချေလိုခြင်း အစီအစည်ကိုလည်း အထူး တာဝန်ကြီး တစ်ခုအနေနှင့်ဘဲ ငြိုးခဲထားမိလေပေဦးမည်။အဆုံးမှာတော့ ဝူရှက ဗုဒ္ဓတစ်ဆူမဟုတ်။

သူ၏ ဦးနောက်တစ်ခုလုံးထဲကို တစ်စစ တိုးဝင်လာခဲ့သည့် အနှီအတွေးပေါင်းများစွာနှင့်အတူ...
ဝူရှနှင့် တွေ့ဆုံရန် စတင်ဖြစ်ပေါ်ခဲ့ရသည့် ထိုလမုန့်ပွဲတော်ညက လုံယွဲ့ဂေဟာကို သွားရောက်မိခဲ့စဥ် အချိန်တစ်ခုကိုပင် အတွေးတို့က ဆိုက်ရောက်သွားမိပြန်သည်။

ထိုနေ့ညက သူ့အား တမင်ရွေးချယ်ခဲ့လေသည့် ဂေဟာမယ်မှာ ဝူမင်ဝမ်ဖြစ်သည်ကိုလည်း ဆရာများထံမှ အတည်ပြုထားခဲ့ပြီ။သို့သော် သူမကရော ထိုညမှာဘဲ သူ့ကိုလက်စားချေရန် သက်ပစ်လျှင် ရခဲ့လျှက် တီမုန့်မြစ်ကြောင်းအတိုင်းကိုသာ ရည်ရွယ်ချက်ရှိရှိနှင့် မျှောချပေးလိုက်ကာ ဝူရှနှင့် တွေ့ဆုံစေခဲ့သည်။