Feng Yin Tian Xia မြန်မာဘာသာပြန် စဆုံး

အပိုင်း (၅၁)ကျိုးယာမင်းသမီး

အပိုင်း (၅၁) ကျိုးယာမင်းသမီး

ဟွားကျူ့ယွီ ရှောင်ယင်နဲ့သိတာ အချိန်အတော်ကြာလှပြီ၊ သို့သော် သူ့ရဲ့မျက်နှာပေါ်မှာ ရှုပ်ထွေးနေတဲ့ခံစားချက်တွေ အများကြီးရောယှက်နေတာကိုတော့ သူမ ပထမဆုံးတွေ့ဖူးခြင်းဖြစ်သည်။

အကြောက်တရား၊ မယုံကြည်နိုင်မှု၊ ပျော်ရွှင်မှုတို့ပြည့်နှက်နေပေမဲ့ ညှိုးငယ်ခြင်းတွေ၊ စိုးရိမ်ပူပန်ခြင်းတွေလည်း ပြည့်လျက် ဝမ်းနည်းပူဆွေးမှုတွေပါ ရှိနေခဲ့တယ်… သူ့ရဲ့မျက်နှာပေါ်မှာ ကွဲပြားခြားနားတဲ့ခံစားချက်တွေအများကြီး လျင်မြန်စွာပေါ်ထွန်းလာခဲ့သည်။ အဲ့ဒါက တကယ်ပဲ… စကားလုံးတွေနဲ့ဖော်ပြဖို့ ခက်ခဲလွန်းတယ်။

“အဲ့ဒါက တကယ်ပဲ မင်းဟာလား?” တုန်ရီပြီးအေးစက်တဲ့အသံဖြင့် သူ တိုးတိုးလေးထပ်မေးလေသည်။

“အင်း… ဟုတ်တယ်၊ ရှင် ဒီပစ္စည်းကိုသိလို့လား?” ဟွားကျူ့ယွီ ထိတ်လန့်သွားပြီး ကြောင်တောင်တောင် မေးမိသွား၏။

ရှောင်ယင် မျက်လုံးတစ်စုံကိုမှိတ်ချရင်း တုန်ရီနေတဲ့လက်လေးတွေနဲ့ အိပ်ရာပေါ်ကစောင်ကိုဆွဲကိုင်၍ ဟွားကျူ့ယွီကို ခြုံပေးလိုက်တယ်။ စကားတစ်ခွန်းမှမဆိုဘဲ သူ လျင်မြန်စွာထွက်ပြေးဖို့ ကြိုးစားလိုက်ပေမဲ့ လမ်းတစ်ဝက်မှာပဲ တစ်စုံတစ်ခုနဲ့ တိုက်မိသွားပြီး မြေပြင်ပေါ်သို့လဲကျလုနီးပါးဖြစ်သွားခဲ့တယ်။ ဂနာမငြိမ်တဲ့ပုံပေါ်နေပြီး ပုန်းခိုဖို့ထွက်ပြေးသွားသလိုမျိုး သူ့ရဲ့ပုံရိပ်လေးက မြန်ဆန်စွာထွက်ခွာသွားတော့သည်။

ရှောင်ယင်ထွက်သွားပြီးသိပ်မကြာခင်မှာ ဟွေရွှယ် လျင်မြန်စွာဝင်ရောက်လာပြီး သူမကို တစ်ညလုံးပြုစုပေးခဲ့တယ်။

နောက်ဆုံးတော့ နာကျင်မှုတွေ ဖြေလျော့သွားတဲ့အချိန် အရုဏ်ဦးရောက်တဲ့အထိ ဟွားကျူ့ယွီ နိုးကြားနေခဲ့တယ်၊ ထို့နောက် သူမ အတော်လေးငိုက်မျဉ်းအိပ်စက်လာနိုင်ခဲ့သည်။

သူမ အဆုံးမဲ့အမှောင်ထုကြီးထဲမှာ လျှောက်သွားရင်း ခန္ဓာကိုယ်ဟာပေါ့ပါးပြီး သက်တောင့်သက်သာဖြစ်လာခဲ့တယ်။ သူမရဲ့ရှေ့မှာ ရင်းနှီးကျွမ်းဝင်နေတဲ့မျက်နှာတွေ ဖြတ်သန်းသွားကြတယ်၊ သူတို့က သူမရဲ့မိတ်ဆွေတွေနဲ့ မိသားစုဝင်များဖြစ်ကြပြီး အတိတ်ကိုတသသလွမ်းဆွတ်လာတော့သည်။