Feng Yin Tian Xia မြန်မာဘာသာပြန် စဆုံး

အပိုင်း (၆၁) စဆုံး

အပိုင်း (၆၁) စဆုံး
အခွဲ-၁ ဘယ်သူနိုင်မှာလဲ?

“ဒီအဆိုပြုချက်ကို အားလုံး သေသေချာချာစဉ်းစားကြဖို့ မျှော်လင့်ပါတယ်၊ မင်းတို့ဆိုင်တွေအတွက် ငါပေးမယ့်စျေးနှုန်းကို တစ်ချက်လောက်ကြည့်ကြည့်ပါဦး၊ မင်းတို့ မကျေနပ်ဘူးဆိုရင် ငါတို့ဆွေးနွေးလို့ရနိုင်တယ်လေ” ဟွားကျူ့ယွီ ပေါ့ပေါ့ပါးပါးရယ်မောရင်းပြောဆိုစဉ်မှာ ချက်ချင်းပဲ အစောင့်တစ်ဦးက အားလုံးကို စာချုပ်တစ်ခုစီ ပေးဝေလေသည်။

အားလုံးဟာ စာချုပ်ကိုကြည့်ရင်း အခန်းဟာ ရုတ်တရက် လွန်စွာမှတိတ်ဆိတ်သွားကာ ပြတင်းပေါက်အပြင်ဘက်မှ ပုစဉ်းရင်ကွဲသံက ပို၍ဆူညံနေသယောင် ဖြစ်စေခဲ့သည်။

ဟွားကျူ့ယွီတစ်ယောက် ထိုင်ခုံပေါ်မှာ အေးအေးလူလူထိုင်၍ အလောမကြီးဘဲ လူတိုင်းရဲ့အမူအယာ ပြောင်းလဲသွားမှာကို တိတ်တိတ်လေးစောင့်စားနေခဲ့သည်။ သူမ ဘေးဘက်သို့ခေါင်းလေးစောင်းလိုက်တော့ အနက်ရောင်ဆံနွယ်မျှင်လေးတွေက ပုခုံးသားတွေပေါ်သို့ ကျဆင်းသွား၏။ သူမရဲ့ဆံနွယ်တွေကို ဆံထုံးအမြင့်ကြီးအဖြစ် ထုံးချည်ထားတော့ ဆံနွယ်မျှင်တစ်ချို့က ခါးဆီထိကျဆင်းကာ သူမရဲ့ယပ်တောင်လှုပ်ရှားမှုနဲ့အတူ ညင်သာစွာ ယိမ်းနွှဲ့နေတော့သည်။

လက်ရှိမျက်မှောက်မှာရှိနေကြတဲ့သူတွေက ဒီလောက်လှပတဲ့အမျိုးသားမျိုးကို တစ်ခါမှ မမြင်ဖူးကြဘူး။

မြူမှုန်တွေကြားက လှပတဲ့ပန်းလေးတစ်ပွင့်ကို မြင်လိုက်ရသလိုမျိုးဖြစ်သွားကာ သူ့ရဲ့နောက်ခံဇာစ်မြစ်ကို ယူဆဖို့ခက်ခဲသလို ထင်ရာမြင်ရာခန့်မှန်းတွေးတောဖို့လည်း မဝံ့ရဲကြတော့ဘူး။

စာချုပ်ပေါ်မှာ ရေးသားထားတဲ့ငွေသားပမာဏက မည်သူမဆိုတတ်နိုင်တဲ့ပမာဏမဟုတ်ဘူး။ ဒီလူက အဲ့လောက်ကို ချမ်းသာကြွယ်ဝတဲ့လူများလား?

လက်ထဲမှာစာချုပ်ကိုကိုင်ထားလျက် အားလုံးဟာ နှုတ်ဆိတ်နေကြသည်။ သူတို့တွေဟာ ကမ်းလှမ်းမှုကို ငြင်းဆန်ချင်နေတုန်းဆိုပေမဲ့ ဘယ်သူကမှ စပြီးမပြောရဲကြဘူး။

အဆုံးသတ်တော့ တစ်စုံတစ်ဦးက သူမ၏လက်ထဲကယပ်တောင်ကို သတိပြုမိသွားပြီး မျက်နှာဟာ ချက်ချင်း ပြောင်းလဲသွားတော့သည်။