Feng Yin Tian Xia မြန်မာဘာသာပြန် စဆုံး

အပိုင်း (၅၈) စဆုံး

အပိုင်း (၅၈) အစအဆုံး

အခွဲ-၁

အစေခံမလေးဟာ ရန်လိုတဲ့မျက်ဝန်းတွေနဲ့ မေးလာခဲ့သည်။

ညဉ့်လေပြည်ထဲမှာ တဖျပ်ဖျပ်ပျံ့လွင့်နေတဲ့အင်္ကျီလက်စလေးနဲ့အတူ ကြီးကျယ်ခမ်းနားတဲ့ကြိုးကြာဌက်ပမာ လှေဦးထိပ်မှာ ဆင်းသက်ကျလာရင်း ဟွားကျူ့ယွီ၏တစ်ကိုယ်လုံးဟာ ထောင့်ငါးထောင့်ပုံမီးအိမ်လေးတွေ၏ နွေးထွေးသောအလင်းရောင်တွေအလယ်မှာ ထွန်းလင်းတောက်ပနေတော့သည်။

ဟွားကျူ့ယွီ၏သာမာန်မျှဝတ်ရုံလေးကို သတိထားမိရင်း အစေခံမလေးဟာ မာန်မာနထောင်လွှားလာခဲ့သည်၊ သို့သော် ဟွားကျူ့ယွီကိုရှင်းရှင်းလင်းလင်းမြင်လိုက်ရပြီးနောက် ဟွားကျူ့ယွီ၏အလှတရားကြောင့် သူမ အံ့သြမှင်သက်သွားတာလား ဒါမှမဟုတ် ဟွားကျူ့ယွီရဲ့ကိုယ်ရောင်ကိုယ်ဝါကြောင့် ကြောက်လန့်သွားတာလား မသိပေမဲ့ အစေခံမလေးဟာ နောက်သို့ ခြေလှမ်း၂လှမ်း အလိုအလျောက်ဆုတ်ပြီးဖြစ်သည်။

“ဒီပုံတူပန်းချီကားက မင်းတို့အိမ်တော်ကမမလေးတဲ့လား? ဒါဆို မင်းတို့အိမ်တော်ကမမလေးက ဝိန်ဝမ်းပဲဖြစ်မယ်” ဟွားကျူ့ယွီ မီးအိမ်ကိုပင့်မြှောက်ပြီး အပြုံးလေးနဲ့ဆိုလိုက်တယ်။

သေချာပေါက်ပဲ၊ ဝိန်ဝမ်း နေမကောင်းလို့မဟုတ်ဘဲ သူမမှာ ကြိုတင်ချိန်းဆိုထားချက်တစ်ခုရှိတာကြောင့် ဟွမ်ဖူဝူရွှမ်း၏ဖိတ်ကြားမှုကို ငြင်းဆန်ခဲ့တာ။ သူမရဲ့အစေခံမလေးက ကျီဖုန့်လီရဲ့လှေပေါ်မှာဆိုရင် ဒါဆို ဝိန်ဝမ်းကလည်း ဒီလှေပေါ်မှာပဲ ရှိနေတာဖြစ်ဖို့များတယ်။ ဟွမ်ဖူဝူရွှမ်း သိသွားတာနဲ့ ဘယ်လောက်များ ဒေါသထွက်လိုက်မလဲမသိဘူး။

“ရှင် စောနတုန်းက မမလေးရဲ့မီးအိမ်ပေါ်တက်နင်းသွားလို့ မီးအိမ်က ရေကန်အောက်ထဲနစ်မြှုပ်သွားပြီ၊ ရှင် မမလေးအတွက် ပြန်ယူပေးရမယ်” ဟက်ဟက်ပက်ပက်မရှိတဲ့လေသံဖြင့် အစေခံမလေးက ဆိုလာခဲ့ပြီး သူမ၏မျက်ဝန်းတစ်စုံက နောင်တအပြည့်နှင့် ရေကန်အောက်သို့ စိတ်အားထက်သန်စွာကြည့်လို့နေသည်။

ဟွားကျူ့ယွီ ရေကန်ပေါ်ငေးစိုက်ကြည့်လိုက်တော့ တောက်ပတဲ့မီးအိမ်လေးတွေဟာ ပြန့်ကြဲပြီး လွင့်မျောနေတော့သည်။ ထိုမီးအိမ်လေးက ရေကန်၏အောက်ခြေထိ နစ်မြှုပ်သွားပြီဖြစ်တာမို့ သူမ ဘယ်လိုဆယ်ထုတ်ရမှာလဲ? အစေခံမလေး၏မျက်နှာပေါ်က အကြည့်ကိုမြင်လိုက်ရုံနဲ့ ထိုမီးအိမ်လေးက ဝိန်ဝမ်းကိုယ်တိုင်ပြုလုပ်ထားတဲ့မီးအိမ်ဖြစ်ဖို့များမှန်း သိနေမိ၏။