Feng Yin Tian Xia မြန်မာဘာသာပြန် စဆုံး

အပိုင်း (၄၇) လတ်စသတ်တော့ အရာအားလုံးကို ကြိုတင်စီမံပြီးသားပေါ့

အပိုင်း (၄၇) လတ်စသတ်တော့ အရာအားလုံးကို ကြိုတင်စီမံပြီးသားပေါ့

နောက်ဆုံးတော့ ပွဲတော်ဟာ အဆုံးသတ်တော့မယ်။ ပွဲတော်၏အဆုံးသတ်ညမှာ မြောက်ပိုင်းဘုရင်မင်းမြတ်ဟာ ပွဲတော်အတွင်းကျင်းပခဲ့သည့် များစွာသောယှဉ်ပြိုင်ပွဲများ၏အောင်မြင်သူတွေကို ဂုဏ်ပြုဆုပေးဖို့ သူ့ရဲ့မှူးမတ်အပေါင်းအပါတွေနဲ့အတူ ဧည့်ခံပွဲတစ်ခု ကျင်းပပေးလေသည်။ လက်ရှိ သူမရဲ့အဆင့်အတန်းက ‘အိမ်ရှေ့စံမင်းသား၏အချစ်ဦးလေး’ဆိုတော့ ဟွားကျူ့ယွီလည်း ဖိတ်ကြားခံရတာ အမှန်ပဲပေါ့။

ဧည့်ခံပွဲစတင်တော့မယ့်အချိန်မှာ ဟွားကျူ့ယွီ ရှောင်ယင်နဲ့အတူ ခန်းမအတွင်းသို့ဝင်လေသည်။ မတော်တဆ ကောင်းကင်ယံကိုမော့ကြည့်မိလိုက်တော့ အနောက်ဘက်မှနေဝင်ဆည်းဆာလေးကို သူမ လှမ်းမြင်လိုက်ရတယ်။ ကောင်းကင်ကြီး၏တစ်ဝက်လုံးဟာ ပုပ်သိုးနေသည့်ဒဏ်ရာမှ ယိုစိမ့်ထွက်လာသည့်သွေးရောင်ကဲ့သို့ အနီရောင်တောက်တောက်နဲ့ ဝင်းလက်တောက်ပနေ၏။

ယနေ့ညက ဆိတ်ငြိမ်နေမယ့်ညလေးတစ်ညမဟုတ်မှန်း သူမ သိနေမိ၏။ ယနေ့ည ဒီမြက်ခင်းစိမ်းပြင်ပေါ်မှာ လူတွေရဲ့သွေးတွေ ဘယ်လောက်ထိပြန့်ကြဲနေဦးမှာလဲ?

ယမန်နေ့ညက သူမကိုလက်ဆောင်ပေးခဲ့တဲ့ လက်ကောက်လေးကိုဝတ်ဆင်ခဲ့ဖို့ ရှောင်ယင် သူမကို အထူးသတိပေးလာခဲ့သည်။ သူမ ဘာမှလုပ်စရာမလိုဘူး၊ သူ့ရဲ့ဦးဆောင်မှုနောက်ကိုပဲ လိုက်ဖို့လိုတာ၊ ဒါနဲ့တင် သူမရဲ့ကတိစကားကို ဖြည့်ဆည်းပြီးဖြစ်တယ်လို့ သူ သူမကိုပြောလာခဲ့တယ်။

မြောက်ပိုင်းဘုရင်မင်းမြတ်၏တဲအိမ်က တစ်ခြားတဲအိမ်တွေနဲ့ မတူလှဘူး၊ အလွန်တရာမှ ကြီးမားကျယ်ပြန့်ပြီး ခမ်းနားကြီးကျယ်လွန်း၏။

သူမ တံခါးပေါက်သို့ဝင်ရုံလေးရှိသေး၊ ဟွားကျူ့ယွီ စားပွဲရှည်တန်းကြီးတွေကို လှမ်းမြင်လိုက်ရ၏၊ စားပွဲတိုင်းပေါ်မှာ ကလေးငယ်တစ်ယောက်၏သွယ်လျတဲ့ လက်မောင်းနှစ်ဖက်ကဲ့သို့ ဖယောင်းတိုင်တန်းနှစ်တန်း ထွန်းညှိထားလေသည်။ ဖယောင်းတိုင်ပေါင်းရာချီ ထွန်းညှိထားတာမို့ ခန်းမကြီးတစ်ခုလုံး ထိန်လင်းကာ နှစ်မြို့ဖွယ်အမွှေးရနံ့နှင့် ပြည့်နှက်နေတော့သည်။