Tilted Rays of Sunshine (AS#6) [completed]

5

Iniwan ko sila Ayessa sa grocery store. Sobrang sama ng loob ko at ang gusto ko na lamang ay umuwi para makapagpahinga.

Nakakapagod ipaglaban ang karapatan mo sa mga taong ang tingin sa mga sarili ay laging tama. Na lahat ng tao ay kapantay nila sa buhay.

Naninikip ang dibdib ko dahil sa kanilang pakikipag-away sa akin. Talagang pinagtulungan pa nila akong tatlo!

Lalo na si Ayessa! Akala ko pa naman, kaibigan pero may ugali pa rin pala talaga! Lahat idinadaan sa pagtulong kuno pero gusto lang talaga magpakitang tao!

Bumili muna ako ng samalamig sa tindahan malapit sa school. Pakiramdam ko'y sasabog ang ulo ko kapag hindi ko ito napakalma.

"Cake!"

Sa boses at pagtawag pa lang sa akin, kilala ko na kung sino iyon. Nilingon ko si Lomi na mag-isa na lamang at mukhang kalalabas lang ng gate ng school namin.

Kung hindi siguro ako bad trip ngayon, baka yakapin ko pa siya at kiligin dahil binati ako ng crush ko. Kaso hindi ko magawa dahil kalat pa rin sa aking sistema ang pagkayamot sa kaninang pakikipagtalo.

Nawala agad ang mapang-asar na bungad ni Lomi sa akin nang makita niya ang seryoso kong ekspresyon. Nang makalapit ay tutop ang bibig at napatingin sa aking iniinom.

"B-bad trip ka?" Nahihiya niyang tanong.

Hindi ko sinasadyang mairapan siya at umupo sa isang upuan sa labas ng kainan. Tahimik akong sumisimsim sa aking inumin. Sa gilid ng aking mata, kita ko ang pananatiling pagtayo ni Lomi sa gilid tsaka unti-unting umupo sa aking tapat.

Walang nagsalita sa aming dalawa. Ramdam ko pa ang pagpintig ng aking utak kakaisip sa aming gagawing cooking laboratory.

Hindi kami magkakaayos kaya paano kami makakapagluto niyan?

Mali pala. Ako lang pala ang hindi ayos sa kanila dahil pinagtulungan nila ako! Nagkampihan sila!

Lalong nalukot ang aking mukha sa simangot at nagsalubong na ang kilay na tumitig sa mesa sa pagitan namin ni Lomi. Ramdam na ramdam ko ang kagustuhan niyang magsalita kaya naman sinalubong ko na ang mata niyang kanina pa nakatitig sa akin.

Ang kaniyang matang namimilog ay mabilis na napakurap at nag-iwas ng tingin. Kasunod ang pagpula ng kaniyang pisngi at tainga.

Bumuntong hininga ako at tinawag siya. "Ba't ka nandito?"

Bumaling siya muli sa akin. Gulat at sinisipsip ang labi. "A-ah... uh," luminga siya sa paligid tsaka tumayo. "B-bibili rin ako!" aniya tsaka bumili ng aking iniinom din kanina.

Pinanood ko siya hanggang sa makabili siya tsaka humarap muli sa akin. Tumikhim siya pagkasipsip sa kaniyang ininom. "H-hindi ba't bff na kayo ni Maye? Bakit hindi mo siya kasama?"

At sa tanong niyang 'yon, lalong nag-init ang dugo ko. "Hindi ko siya bff" I hissed at him.

"Ay gano'n..." sumimsim siya sa inumin tsaka nagsalita ulit. "Ang hirap mong damayan... mukhang hindi kayo okay... uh..." nahihirapan niyang sabi.

Napabuntong hininga ako at nakuha ang kaniyang gustong iparating. He wants to know what happened at mukhang nahihiya pa siyang makiusyoso.

Ikinwento ko kay Lomi ang nangyari. Nagugulat pa siya kapag tumataas ang boses ko. Naiinis kasi talaga ako! At buti na lang narito si Lomi, makakapaglabas ako ng sama ng loob!

"Ay grabe talaga mga babae... oh tapos? Magkano ba ang naging bigayan niyo?" tanong niya na akala mo'y interesadong-interesado sa akin kwento. 

"250! Jusko, baon ko na iyon buong linggo!" sagot ko.