- إيـه الحـلاوه دي؟!
اتكلمت وأنا سعادة الدنيا في قلبي- أنا عايزه ازغرط من الفرحه أخيراً بقيت شاطره في حاجه.
اتكلم وهوا بياكل قطعه من الكيكه- أنتي طول عمرك شاطره يا إيثار، طعمها يخبل والله دي بإيه؟
- بالقرفه كيكه بالقرفه، وعارف كمان عملت صوص شيكولاته معاها اهو.
جبت طابقين من الدرفه وبدأت أحط في كل طبق كيكه- هنزل ادوق بابا وماما علشان يفتخروا بيا ويعرفوا قد إيه أنا بقيت شاطره و كويسه و..
مسك ايدي الكنت بحط بيها الصوص علي الكيكه- اهدي يا إيثار.
بصتله وانا بدمع- يمكن يحبوني وقتها، يمكن يعرفوا أني مش علشان ما نجحتش في التعليم أني مش فاشله واني بعرف أعمل حاجات تانيه، يمكن ساعتها احس انهم فخروين بيا.
"نظرة الأهل أهم نظره، لو معاك نجاح الدنيا واهلك شايفينك فاشل هتفضل حاسس أنك فاشل، الأهل هما مصدر قوتنا بس أنا مش كده..
أنا واحده فشلي في تعليمي خلاني فاشله في عيونهم، خلاهم يفقدوا الأمل فيا لدرجة أنهم جوزوني وأنا لسه ما كملتش ١٩ سنه، هوا لازم نكون شاطرين علشان يحبونا؟"
حط ايده تحت دقنه وبصلي- احكيلي.
- احكي إيه؟
- شوفي حباه تحكي إيه واحكيه، أي حاجه محبوسه جواكي خرجيها.
بصيت لكوباية الشاي بحليب العملها ليا وقولت- مش بحب شكلي، بحسه أنه مش مترتب حواجبي تقيله اوي وعيوني ضيقه ووشي منفوخ اوي وتخينه ومش بعرف انقي لبس، مكنش عندي اخت اخد رأيها في لبسي، حتي ماما كانت مشغوله عني كنت بكره الدروس لأني بلبس فيها لبس خروج بفضل قاعده طول الليل مهتمه هلبس إيه طب لو لبست ده ممكن يتريقوا عليا طب لو لبست ده ممكن يقولو عليا فقيره علشان جيت بيه كذا مره قبل كده، عارف يا غالي أنا عمري ما حد سمعني زي ما أنت سمعني كده دلوقتي.
مسح دموعي وقال- بس انتي جميله يا إيثار.
- ده علشان أنت طيب فبتجبر بخاطري ومش زيهم.
- لا والله مفيش حد ربنا خلقه مش جميل ده يكفي أنك من صنع الله إزاي ربنا هيصنع شيء مش جميل؟
سِكت فكمل هوا- مش مهم يكون شكلك حلو قد ما مهم يكون شكلك موجود، مش مهم عيونك تكون ضيقه أو واسعه أو لونها إيه قد ما مهم أنك تكوني بتعرفي تشوفي، مش مهم يكون مناخيرك كبيره او صغيره قد ما مهم أنها تكون موجوده علشان تتنفسي من خلالها، مش مهم ودنك تكون شكلها حلو قد ما مهم أنك تعرفي تسمعي بيها، مش مهم يكون لون جلدك ابيض او أسمر قد ما مهم أنه يحميكي من العوامل الخارجية، احنا شكلنا ده كده كده زائل اما روحنا وآثرنا في أرض الله هوا الباقي .
"الحياه عمرها ما كانت كلها لوحه سودا دايما فيه بقعه بيضا ربنا بينورلنا بيها اللوحه."
حطيت صنية الشاي وقعدت قدامه وأنا باصه في الأرض- غالي أناا...اص..ل
ساب ال لاب وبصلي- قولي سمعك.
قولت علي طول- هوا ينفع اشتغل؟
سكت شويه وبصلي- عايزه تشتغلي في ايه؟
- مش عارفه بس أنا حاسه أني محتاجه اشغل وقتي الضايع ده.
بصتله وقولت- بس كده كده مش هينفع خلاص متشغلش بالك أي حاجه هتبقي محتاجه مؤهل عالي.
- إيه رأيك في الشيف إيثار؟
- مين دي؟
- أنتي.
- أنا؟ بس أنا مش شاطره غير في الحلويات بس وكمان مش كلها.
- وده يكفي أنا عندي محل كنت مأجره وصاحبه مشي، المحل ده هيبقي بتاعك هتكوني أنتي الشيف وانا همسك الحسابات وهتعملي كيك ودونت وحلويات شرقيه.
قومت قعدت انط علي الكنبه من الفرحه- الله بجد بجد أنا هبقي شيف وهكون مسؤله وماما وبابا يحبوني.
"لسه فكرة أني انجح علشان افرحهم دي هي حلمي احسسهم أن ليهم بنت فعلا يفتخروا بيها وسط الناس ."
- هوا ليه مفيش زباين؟ الأكل كده هيبوظ.
- هيجوا أن شاءالله، هيجوا الصبر.
- هيجوا فين تالت ايام ومحدش جيه يا غالي.
" دخلت وسبته هما كان عندهم حق أنا فعلا فشله!
روحت صليت الضهر ودعيت، لجأت لربنا وأنا عندي يقين أنه عز وجل عمره ما يخذلني."
- إيثار قومي بسرعه في زباين جم.
- بجد، طب شوف طلبهم ايه وتعالي قولي اجهزه.
"بصيت للسما من شباك المطبخ، أنت سمعتني يارب، سمعت صوتي الضعيف، الحمدلله..
اليوم ده جالنا خمس زباين وكل يوم العدد كان يزيد ويكتر وبدأنا نشغل ناس معانا وطورنا المحل وعملنا ديكور احسن وخصصنا جزء للمشروبات وفتحنا المحل الجنبنا كمان من كتر كرم ربنا علينا."
- غالي.
- ايه يا بنتي الخرجك من المطبخ.
- أنا جيت بس علشان ا..
قاطعني صوت عارفه كويس- إيثار؟
لفيت وشي وانا ببصلهم ومش قادره انطق بكيت وانا بضحك- عاملين ايه؟
- هوا أنتي الشيف إيثار ال الكل بيحلف بحلويتها؟
- فخورين بيا حبتوني؟
________________
- ماما أنا جبت درجه وحشه في امتحان الرياضه مع أني والله كنت مذاكر كويس أنا فاش..
قاطعته- صليت الضهر؟
- اه، وعارفه صليته بسورة طه الي حفظتيها لي.
حضنته جامد- الله أنا فخوره بيك جدا يلا تعالي نخفظ سورة الكهف كمان بقي علشان نصلي بيها سوا وبعدين نشوف حل في الرياضه الرخمه دي.
-ونزرع حباً لم نأخذه، حتي ننهي وصلة الآلام-
#بقلمي_مَريمه(مريم قنديل)❥
- عاالم مختلف )" 💛✨
