هو انتي مبتحرميش يا مريم؟!
=ها!
_ ها ايه يا بنتي ركزي معايا
= في ايه يا زفته عالصبح..شايفه الواد معندوش دم ازاي..واقف يهزر مع البنات
_ ما يهزر يا بنتي واحنا مالنا؟
= هو مش عارفه اني بحبه ولا ايه؟
_ هو ميعرفش انك عايشة عالكوكب اساسا
= لا عرف انكري انه اتكلم معايا مرة
_ يا بنتي ساعتها كان بيديكي المفاتيح اللي وقعت منك
= بت انتي مش صاحبة جدعة علي فكرة
_ عارفه ..يالا يا اختي خلينا نحضر اخر مراجعة ونروح
=يالا يا بومه يالا
هو ازاي مش حاسس بيا ازاي يبقي حواليه حد بيحبه الحب ده كله ومهتم بكل تفاصيله وهو مش حاسس بيه ما هو بيكلم البنات كلها وماشي يحب علي روحه جات علي قرمط يعني...
_ يالا يا فيروز متأخرة علي عم ابراهيم
= معلش كنت بصور حاجه يالا..ايه ده ده احمد هنا
_ شوف البت صوتها اتغير ازاي
= ازيك يا مريم عاملة ايه؟
_الحمدلله يا احمد انت عامل ايه
= الحمدلله
_ يالا يا فيروز انا استأذنت من عمي ان احنا هنتفسح شوية انهاردة
= بجد! طيب استنى اكلمه عشان استأذنه
_ابقي كلميه واحنا في الطريق استأذني منه
= طيب يالا يا عصافير الحب سلام
_ما تيجي معانا
= وعم ابراهيم اسيبه لمين؟! وبعدين يا اختي انا مبحبش ابقي عزول...هروح انا ادعيلي المترو يبقي رايق..سلام
_ سلام يا حبيبي خلي بالك من نفسك واول ما توصلي كلميني
=حاضر يا روحي سلام في رعاية الله
_ سلام
روحت وركبت المترو اللي علطول زحمة ده وما ادراك ما عربية الستات والسوق اللي في عربية الستات ووصفات الاكل اللي بتتقال كدا في الطريق..ونصايح الحب الفاشلة اللي بنقولها لبعض كبنات والحب في التليفونات تحس كدا انك جوا عالم تاني وصلت محطتي ونزلت...اخدت عربية لحد محل الورد اللي بيشتغل فيه من ساعة ما بابا توفاه الله تقريبا آخر مرة حد من قرايبنا زارنا او دخل بيتنا كان يوم عزا بابا من بعدها ما شوفتش حد فيهم..هو اينعم احنا مش محتاجين حاجه من حد وبابا عشان كان رتبة في الجيش ومعاشه مكفينا وزيادة الحمدلله بس برضو صلة الرحم واجبة عليهم خصوصا ان انا وحيدة ماليش اخوات عايشة انا وماما في الدنيا لوحيدنا مع خالتو سعاد هي الوحيدة اللي بتسأل علينا وبتزورنا علطول ودايما معانا وعندنا
_ صباح الخير يا عم ابراهيم عمل ايه انهاردة؟
= صباح النور يا مريم يا بنتي انا كويس الحمدلله وانتي عاملة ووالدتك عامله ايه؟
_ الحمدلله في زحام من النعم..الطلبية الجديدة وصلت؟
=اه..انتي جبتي الروايات والكتب الجديدة معاكي.
_ اه جبتهم معايا يالا روح انت بقي عشان ترتاح وتقدر تنزل
=ماشي يا بنتي سلام ولو احتجتي حاجه رني عليا
_حاضر في رعاية يالا
عم ابراهيم مشي وانا ابتديت اجهز طلبية الورد الجديد واحط الكتب علي رف المكتبة اللي كانت فكرتي انا بحب الورد جدا ودايما كنت بعدي كل يوم علي ابراهيم وانا راجعة من المدرسة عشان يديني وردة بعد ما بابا توفاه الله حياتي فضيت هو كان كل حاجه في حياتي الحنية اللي كانت في قلبه كانت تكفي الدنيا كلها..اتحايلت علي ماما كتير جدا اني انزل اشتغل هي مكنتش رافضة الفكرة هي كانت رافضة اني اشتغل في محل ورد بس انا فضلت وراها لحد ما اقنعتها كالعادة امي دي غريبة مبتجيش غير بالزن..خلصت الورد وابتديت اظبط المكتبة واحط فيها الكتب الجديدة..فكرة المكتبة دي كانت فكرتي لان بعشق الروايات والورد والاتنين مرتبطين ببعض اللي بيحب الروايات لازم بالضرورة يحب الورد...
