اسكربتات 3

الثاني عشر.

- ايه البوست اللي منزلاه دا ؟
" اي بوست فيهم؟ "
- بتشتمي المهندسين ؟
" والمعيدين معاهم "
- طيب مش ملاحظة ان العيلة كلها مهندسين
" ودا ملفتش انتباهكم لحاجة"
-طيب ورحمة امك ماهسيبك

طلعت اجري و طبعا مزعقتش خالص ولا عيطت ولا ناديت علي بابا ولا اي حاجة من دول
" ياهندسة انا آسفة والله"
- بقي المهندسين رخمين ودمهم تقبل علي اساس ان دمك  شربات يابت
" انا دمي قمر زيي"
- مش بيشكر في نفسه غير ابليس
" وه؟"
- طبعا خطيبك عشان  دكتور مش بتشتمي فيهم
" الدكاترة دول قمر ...ومابالك بقي لما يكون اطفال دا قلبي دا"
- امتي نتجوز ونرتاح منك
" انا قاعدة علي قلوبكم ...تيجي نعمل حوواشي"
- انتي بكرة عندك جامعة صح؟
" وايه العلاقة؟  آه عندي"
-يبقي نقوم ننزل نجيب الطلبات كلها من تحت قبل  ماماما وباقي العيلة الكريمة ييجوا.
" حمزة. ..احنا ليه عايشين في بيت عايلة بجد"
- لاني دا طلب جدك
" بس احنا عايشين في نفس البيت بس يعتبر العلاقة بسيطة من بعد موت جدتي وعمي ومراته بس اللي عايشين تحت مع جدي"
- احنا بنحب جدنا بس هو صعب وبيفرق في حبه بين اعمامك فطلعوا مش بيحبوا بعض واحنا بعيدين كل البعد عن ولاد عمك عشان كده ...بصي السبب في كده التفرقة والظلم ودول حاجة صعبة جدا '
" بس جدي اعتذرلهم"
- الاعتذار مش بيشفي ياجيهان ولاعمره هيشفي كل مرة شخص سال نفسه... ياتري ناقصني ايه عشان اتحب؟ طيب اعمل ايه عشان اتحب؟ ، شعور صعب ووحش جدا ...شعور مهما مرت الأيام عمرك ماهتنسيه
" عشان كده اعمامي مش بيكلمونا  غير بسيط ...بس انا بحب علاقتك ياحمزة انت ومني بس مش بطيق اخوها البارد دا"
ضحك ' وحذيفة مش ببطايقك اساسا'
" والله نفسي اعضه في ايده وامسكه من شعره"
- لما تعرفي تتطوليه الأول
" قصدك اني قصيرة. ..لا ياحبيبي انتوا اللي طوال "
- طيب يلا ننزل نشتري الطلبات
" اشطا يلا "
-------
- متأخرة كالعادة
" منار اسكتي علي الصبح انا مش طايقة نفسي اساسا ومحاضرات ايه دي اللي المفروض قبل 12 "
- انا قولت من الأول انك مش وش تعليم ...خلي خطيبك يتجوزك بسرعة
" ولا هنفع في الجواز انا فاشلة في كل حاجة الا الاكل والنوم "
- بصي مين دا؟ دكتور حذيفة ودكتور صهيب
" ايوه اعمل ايه يعني؟ "
- انا نفسي اتجوز واحد زي حذيفة
" دا؟  دا دمه سم اساسا مغرور و بارد وكائن لزج  وببتعامل مع الكل بتكبر و.....
- يابنتي حرام عليكي كل دا ...انتي متأكدة أنكم ولاد عم
" اه للاسف"
- طيب يلا نلحق المحاضرة

بقي حذيفة كائن قمر والله البت دي هبلة، انا نفسي افضحه واقول انه في ابتدائي كان بيكراش علي الميس بتاعت الانجلش ...وكمان مش بيعرف ياكل السمك عشان بيخاف من الشوك وبيخاف من القطط،  ولا اقولهم انه معقد ومش بيلبس غير قمصان سودا، لآ انا افضحه واقول ان عنده شرابات ميكي ماوس وبيلبسها في البيت ، وبيشرب لبن كل يوم الصبح.... هو بيبصلي بقرف كده ليه ...لا دا انا كنت البيست بتاعته وعارفة كل مصايبه فيفوق كده بدل ماافضحه هنا، خطيبي بيرن ارد ولا لا ، هو حذيفة دكتور  المادة من امتي؟ هو انا في محاضرة ايه ؟