- غرام جهزتي الشنط؟
" ايوا ياماما ، ماما هو احنا لازم نروح عند طنط نورهان "
- اه لازم وانتي عارفة كويس اني نورهان اكتر من اخت ليا و دا فرح ابنها فلازم اشاركها واساعدها في فرحتها
" بس دا لسه علي الفرح 3 أسابيع عالاقل ليه نروح ونكون تقال عليهم"
- غرام. ..نورهان وولادها مش غرباء علينا وكمان نورهان وبنتها في أفراح اخواتك كانت معايا خطوة بخطوة وجت باتت عندنا مدة كمان
" ياماما عارفة والله بس طنط نورهان مازالت غريبة يعني مش اختك ولا ....
- غرااااام... مش بحب اعيد وازيد في الكلام كتير مش عايزة تيجي ليه؟ وائل رفض صح
" ايوا ياماما رفض وكمان اتخانقنا انا وهو وحلف مروحش عشان في شاب هناك و كمان هنبات هناك "
- طيب اسمعيني ياغرام عشان مش هعيد الكلام دا تاني ...خطيبك ميحلفش عليكي وانتي في بيت اهلك ومفيش حد هيخاف عليكي قدي تمام. ..كمان بلاش تخليه يتحكم فيا دايما اه تكوني رقيقة ومتفاهمة بس في حاجات كتيرة لازم تعتزي برايك فيها و بلاش تمحي شخصيتك وتمشي وراه ، والأهم من دا كله ...احنا هنعيش في بيتنا القديم اللي قصاد بيت نورهان يعني مش هندخل نقعد في بيتهم والشاب الوحيد اللي موجود هو العريس اللي رايحين نحضر فرحه ياهانم ، يلا عشان ساعة وهنمشي "
دا النقاش المعتاد بيني وبين ماما. ..هي بتكره وائل جدا معرفش السبب ليه لحد دلوقتي بس انا مهمنيش غير اني اتخطبت لوائل هو الكراش بتاعي أكبر مني بسنتين كنت بشوفه في الكلية دايما هو شخص وسيم جدا وشيك وذكي والكل معجب بيه ...مصدقتش نفسي لما كلمني مرة عالماسنجر وطلب رقم أخويا عشان ييجي يتقدملي رغم اني لسه في تالتة بس وافقت كنت طايرة من الفرحة ومازالت فرحانة منكرش انه ممكن يكلمني مرة واحدة في اليوم وتكون نص ساعة ويقفل وأوقات كتير مش بتتكلم لظروف شغله بس بسكت عشان هو اساسا بيشتغل عشاني وعشان نتجوز وطبعا خناقتنا دايمة ...عاملي بلوك عشان قولتله اني رايحة عند طنط نورهان ... معرفش هو من حقه يرفض ولا لا بس هو بيمنعني من حاجات كتيرو باسم الغيرة الأول كنت بفرح بس انا دلوقتي حاسة بضيق تحكمات كتيرة جدا وضغط وخناق وانا بسكت واتحمل عشان ميزعلش ... بس المرة دي طنشت بقي وسمعت كلام ماما لاني طنط نورهان في مقام خالتي. ..طنط نورهان هي وماما اصحاب جدا من سنين اتولدوا وكانوا جيران وفي سن بعض بس مكانتش صداقتهم قوية كانوا جيران وبس وكبروا واتجوزوا وكل واحدة فيهم انشغلت بحياتها لحد ما مرة عرفنا ان جوز طنط نورهان طلقها وسابها واتجوز صاحبتها الانتيم وقتها ماما شافتها قاعدة في بيت ابوها ومعاها ولد وبنت ماما قالتلي الولد كان 10 سنين والبنت 6 سنين وانا وقتها كان عندي 5 سنين ... ماما وقفت جنب طنط وجابتلها شغل من البيت وطنط كنت بتشتغل شغل تطريز وخياطة والحمد لله ربنا كرمهم ودلوقتي عندهم مصانع لبس ، انا بحسد ماما علي صداقتها هي وطنط نورهان، هما اصحاب جدا دايما مع بعض رغم المسافات بينهم الا انهم قريبين جدا من بعض ...بحسهم تؤام بيحسوا ببعض ويقدروا بعض ويهتموا لزعل بعض ، صداقتهم قوية جدا جدا وكان نفسي بس يكون عندي شخص بشوف زعلي أكبر مشكلة في الحياة، اختي الكبيرة واخويا اتجوزوا وعايشين في مراكز تانية بس بيحبوا طنط جدا وبيزورها كأنهم امهم وماما فرحانة جدا بكده ... انا بعيدة جدا عنهم كلامي محدودة جدا مع طنط وأولادها بس بحب العلاقة الهادية دي ...تاني يوم سافرنا كانت المسافة بينا وبينهم حوالي ساعتين. ..وصلنا ودخلنا شقة بيت جدي القديم اللي ورثتها ماما عشان هي البنت الوحيدة. ..
نورهان: وأخيرا وصلتي ياسماح ...وبعدين سلمان منتظركم في المحطة
- انا مشفتوش والله يانورهان رني عليها قوليله يرجع ... انتي اللي نضفتي الشقة
نورهان: امال سايبها متوسخة يعني ...وكمان طبختلك ملوخية يالارانب اللي يتحبيها وشوية محشي مكرونة قمر زيك
- يابنتي انتي مش هتكبري انتي ولادك هيتجوزا
نورهان: لا معلش انا صغيرة وحلوة وقمر وانا مهما كبرت صغير انا مهما اكلت رفيع
