#حكايات_منار
حكاية " علشان تختار صح "
سعاد :انتى هتفضلى قاعدة جمبى كده بتاكلى جاتوه وبتشربى حاجة ساقعة وخلاص
منى :اعمل ايه يعنى يا ماما
سعاد :قومى اعملى زى البنات ما بتعمل
ووقعيلك عريس
منى :اقوم اشنكله يعنى فوقعهولك على بوزه يا ماما
سعاد :لا يا اخرة صبرى
قومى ارقصى
منى :ده انا معملتهاش فى فرح اخواتى هعملها فى فرح بنت ابن عم بابا الله يرحمه
ولو افترضنا ان جالى عريس بالطريقة دى
احترمه ازاى يا ماما ما انا كده مش هحترمه واكيد مش هعرف اتجوز واحد مبحترموش
وبعدين هتقولوله ايه وانتم بتجوزونى ليه
اتفضل يا ابنى الرقاصة اللى حيلتنا
سعاد :كفاية فلسفة وكلام فارغ وقومى
بلاش ترقصى لو مش عايزة
على الاقل روحى وتعالى فى القاعة كده اعملى منظر خلى حد يشوفك وياخد باله منك
منى :اروح واجى فى القاعة ليه بس يا ماما هو انا تايهة ومش عارفة اهلى فين
سعاد :يا بت كفاية مناهدة واسمعى كلامى
منى :كلام ايه بس يا ماما اللى اسمعه بعد اذنك
سعاد :رايحة فين
منى :هخرج بره اشم هوا اتخنقت
عمر :بتعملى ايه بره
منى :زهقت انت عارف بتخنق من الدوشة
انت بره ليه
عمر :كنت بكلم سارة
منى :انت برضه مصر تكمل فى موضوع سارة ده
عمر :ومالها سارة بس
منى :مبتحبكش يا عمر
عمر :وطلبت فرصة تحبنى فيها
اصبر عليها واديها وقتها يمكن تحبنى
منى :مفيش حاجة اسمها كده
مفيش حاجة اسمها فرصة يمكن تحبك
الحب حاجة كده من عند ربنا يا يحصل يا ميحصلش
مش لازم فى الاول حب كفاية اعجاب
بس هى مش باين منها اعجاب ولا تقدير
كلامها كله مراوغة وملاوعة هى بس مستخسراك
انا مش مرتاحالها
من كلامك هى مش مريحة
عمر :سارة دى سارة دى هى الراحة كلها
ده انا قلبى مبيرتاحش الا وهى جنبى
عيونى مبترتاحش الا وانا شايفها قدامى
منى :ما هو علشان كده انت مش شايفها صح
علشان شايفها بعيون قلبك
علشان خاطرى يا عمر فكر تانى فى حوار سارة ده
عمر :افكر ايه بس بقولك بحبها بحبهااااااا
منى :خلى بالك من قلبك طيب
علشان خاطرى يا عمر خلى بالك
حسن :يخلى باله من ايه
منى :من الطريق واحنا راجعين
حسن :وهو ماله انتى ومرات عمى هترجعو معايا
عمر :ماشى كلامك يا رياسة
انت خرجت بره القاعة ليه انت كمان
حسن :امك مستلمانى من اول الفرح شغالة تشاورلى على كل البنات اللى جوا
ودى حلوة ودى زى القمر ودى معرفش مالها
لما زهقت فقولت اخرج
وانتو خرجتو ليه
عمر :انا خرجت اتكلم فى الموبايل لقيت منى بره قولت اجى ارخم عليها
منى :وانا اتخنقت من الدوشة
حسن :انا جعان انتو مش جعانين
عمر :جعان طبعا
منى :لا انا كلت جاتوه
عمر :وهو الجاتوه ده اكل
ايه يا زعامة عايز تعمل ايه واحنا معاك
حسن :فى مطعم جمب القاعة تعالو نروح ناكل ونرجع يكون الفرح خلص ان شاء الله
منى :ماما...
حسن قاطعها :انا هقولها وهقول لبابا
سعاد بغيظ :انتى عايزة تموتينى ناقصة عمر يا بت ها ردى عايزة تشلينى
منى :بعد الشر عليكى يا ماما
سعاد :بقى انا اقولك ارقصى ولا اتحركى كده فى القاعة خلى حد يشوفك وياخد باله منك
تقومى تخرجى بره القاعة خالص
لا ومش بس كده تخرجى تاكلى مع ولاد عمك
عايزة اللى يشوفك يفكرك مخطوبة ولا متجوزة يا هبلة يا بنت الهبلة
منى :طيب بتشتمى نفسك ليه بس
وبعدين مش حسن قالك انتى وعمى
واصلا سهام جات معانا هى واسر
سعاد :يا فرحة قلبى كده الناس هتقول حسن جوزها واسر ابنهم وانتى خطيبة عمر
منى :ما احنا مش هنمشى نقول لكل الناس انها اختهم وانهم زى اخواتى
سعاد :ولما انتى عارفة يا اخرة صبرى انك مش هتمشى تقولى كده لكل الناس
تروحى معاهم ليه وتسيبى الفرح
منى :قولتلهم انى كلت جاتوه عمر قالى ده مش اكل
وانا الصراحة كنت جعانة
سعاد :فمشيتى ورا بطنك
منى :الله يا ماما ما لما انتى مش موافقة مرفضتيش ليه وخلاص
سعاد :علشان عمك ميزعلش ومرات عمك كمان
وانا من امتى برفض طلب لحسن
منى :يعنى انتى متقدريش تقوليلهم لا فتقطمينى انا علشان انا اللى تحت ايدك يعنى
سعاد وهى بتحدفها بالشبشب :اخفى من وشى يا منى انا هيجرالى حاجة بسببك
منى :بعد الشر عليكى خدتى دواكى طيب
سعاد :لا حضريلى حاجة اتعشى بيها علشان بعدها اخد الدوا
منى :شوفتى الجاتوه مبيشبعش ازاى كان ليا حق اخرج اكل
سعاد :اخفى يا منى على المطبخ واسكتى بدل ما هتموتينى ناقصة عمر بردودك دى
منى وهى بتبوس راسها :بعد الشر عليكى يا سوسو
ثوانى والعشاء يكون عندك
