_عُمر يا حبيبي
_أيه يا لوكه خير يا مصيبه اكيد عملتي مصيبة صح!؟
_انا يا عُمر أخص عليك يا عُمر ده أنا عمري ما عملتلك أي مصيبه قولي كده أنا عملت أيه قبل كده؟
_أمم أه طبعًا ده أنتِ أميره يا حبيبه قلبي أنتي بس حرقتي المطبخ قبل كده حرقتي القميص الجديد، بوظتِ التي شيرتات الجديده ف الغساله وبس كده.
_يااه يا عُمر قلبك أبيض يا جدع
_ماشي ياستي ثبتيني أنتِ كده، المهم الجميل عامل أكل أيه؟
_أممم هبهرك يا عُمر متقلقش خالص
_ربنا يستر عملتي ايه يا ملك
_أسكت بقا يا عُمر دلوقتي هتشوف اهو يالا تعالي حضر معايا الصحون علي السفره
_ماشي يا بختي
"عاوزه أقولكم أن عُمر ده حاجه كده سكر اصلا، بيساعدني ف كل حاجه، يعني أنا أطبخ وهو يحضر السفره، أنا أغسل الاطباق وهو يرصها، أنا أغسل الهدوم وهو ينشرها، أنا أنكد عليه وهو يصالحني♡".
_أمم عملتي أكل أيه أنا شامم ريحه غير مكرونه وبانيه
_عيب عليك يا حبيبي عملت أكله جديده خالص حاجه كده سُكر وفُله علي الآخر.
_ها أيه رأيك يا حبيبي؟!
_مكرونه نجرسكوا!!!!!!!!!!!!
_أه أيه رأيك بقا حاجه كده جمر صح يا عُمر هتاكل صوابعك وراها أنا واثقه من ده.
_أنتِ كده عملتي حاجه جديده لا فعلاً أيه الحاجه اللي مكنتش متوقعها دي خالص دي حاجه كده فوق الخيال يا ملك
_عُمر أنت بتتريق عليا؟
-لا خالص يا بنتي عيب عليكِ
_عُمر أنت مش عجبك الأكل بجد.
" فجأه لقيت عيونها بتدمع أنا مش عارف ليه بس هي بقت حساسه كده ليه، أنا مش عاوزها تبكي نهاائي أنا عارف أنها بتحاول تسعدني وكمان موضوع الخلفه مسيطر عليها أيه يعني مَر خمس سنين علي جوازنا أنا مبسوط جمبها وبيها، بس هي لاء هي مسلمتش من كلام حد حتي صُحابها، أنا مش فارق معاايا غيرها والله هي بنتي وحبيبتي عاوزها تفهم ده بس لو ليا رزق ف الدنيا هي رزقي♡".
_خلاص يا لوكه بقا بتعيطي ليه حقك عليا أنا يا ست الكُل، ده أنا بهزر معاكِ أخص عليا والله ده أنتِ عسل، وبطلي حزن بقا يا إما هشوف غيرك واحده كده مبتعيطش كل شويه.
_عُمر هو أنت ممكن بجد تتجوز غيري صح؛ علشان أنا مش بخلف صح، أنت ممكن تسمع كلام مامتك وتتجوز غيري صح يا عُمر والله مش هقدر أعيش من غيرك والله هموـت لو حصل كده، عُمر أوعي تسبني أنا مش عاوزه غيرك ف الدنيا مش عاوزه أشوف غير فرحتك، ومش قادره أحقق حاجه شبه دي، أنا واحده فاشله ومش قادره أسعد حبيبي، أنا أسفالك يا عُمر.
_أيه يا ملك الكلام اللي انتِ بتقوليه ده أنا مش عاوز أي حاجة في الدنيا دي كلها غيرك أنتِ وبس أنتِ بنتي وحبيبتي وصحبتي، أنا مش طالب من ربنا غيرك وأنك تفضلي جمبي وبس كده
أيه اللي فكرك بالموضوع ده بس هو مش أحنا قولنا ننسي الموضوع ده خالص ونخليه علي ربنا
_ميّ صاحبتي يا عُمر بترن عليا الصُبح بتقولي أنها حامل للمره التالته وهي متحوزه بعدي وأنا لسه مخلفتش يا عُمر أنا الوحيده يا عُمر إنا الوحيده اللي مش هتخليك أب يا عُمر آااه يا وحع قلبي آاااه يا عُمر مش قادره أنسي نظراتهم ليا يا عُمر قلبي بيتقطع وهما بيعيروني بكون شايفه السخريه ف عيونهم، بشوف مامتك لما تيجي هنا وتقول أيه مش ناوين علي بيبي، خلاص طالما مش هتخلفي سيبي عُمر يتجوز ويبقيٰ أب، مش هقدر يا عُمر والله، والله مش هقدر أشوفك مع غيري أنا عارفه أني أنانيه بس مش هقدر والله صدقني مش هقدر والله آاااه يا وحع قلبي آاااه يارب يارب أرزقني بطفل واحد يارب يطفي نار قلبي آاااه يا عُمر
