_ شيرين ؟
_ لأ للأسف الرقم غلط
_ طب مريم ؟
_ لأ بردو الرقم غلط
_ طب إسراء
_ اممم أي حاجة فيها الروح وكدا ؟
_ بصي ... أياً كان اسمك انا عايز أقولك أني هنت*حر قولي لماما في جبنة رودس بالرومي جديدة في التلاجة اقسم بالله الي هيمد ايده عليها لاطلعله
_ ما شاء الله في تطور في المحتوى .. حركة جديدة دي ؟
_ لا خالص
سمعت صوت مسدج، فتحت الواتساب وشهقت وأنا شيفاه واقف فوق مبنى أقل حاجة خمستاشر دور!
_ أنت مجنون !!!!!!!
_ تؤ
وبعت فيديو و هو بيحرك رجليه في الهوا و بيبتسم
_ لا دا مش جنان .. انت سيكوباتي
_ بغض النظر اني مش عارف معناها بس شكلها حاجة رايقة .. تسلمي يا أختي
_ أنت عبيط! ايه الي مقعدك عندك ! انزل
_ لأ .. عاوز أحكيلك حكايتشي
_ حكايتشك؟
_ اممم حكايتشي
_ ليه!
_ عشان أخلد ذكرايا في الاذهان والناس متنسانيش
قلبي وجعني لثواني لثواني قبل ما الاقيه بيضحك
_ لا طبعاً بهزر .. بصراحة كدا .. كنت شاري كارت فكة فقولت استخدمه قبل ما اموت و كدا كدا هيخلص على الساعة اتناشر
_ فضربت اي رقم بقا وعلى الله
_ بحب الارقام الي بادئة بـ ٠١٠
_ أنا اتصالات أصلاً
_ بقولك ايه .. شكليات
اتنهد وسمعت صوت وكأنه بيقعد
_ أنا اسمي عز في رابعة هندسة لا تكوني فاهمة اني بني ادم عادي ولا حاجة
_ امممم ابتدينا
_ في سنة أولى حبيت بنت اسمها شيرين ... يااااه يا شيرين
_ للدرجادي كنت بتحبها ؟
_ بحبها ايه ... دي كانت عيلة لازقة انا مشيت الدنيا معاها عشان كانت دحيحة
_ اممم
_ وفي سنة تانية حبيت مريم .. ياااااه يا مريم
_ للدرجادي كنت بتحبها
_ دي بقا كنت خطفتها من واحد صاحبي عشان شيلني في البلاي استيشن
_ انت ازاي نتن كدا
_ وفي سنة تالتة حبيت إسراء
_ يااااااه يا إسراء
_ للدرجادي حبتيها ؟
_ انت دمك تقيل وبايخ
_ بقولك ايه انا رايح ام* وت انتي شكلك مش مهتمة بيا و بمشاعري
_ روح
_ على فكرة .. في حجات تتحس ومتتقالش خدي بالك
_ اوماله
_ طيب ممكن احكيلك باقي الحكاية يمكن تتعاطفي معايا ؟
_ اخلص
_ أنا كنت الأول على دفعتي
_ وبعدين ؟
_ وبس .. ايند اوف استوري .. انا اقصد ان احنا هنخلف عيال شاطرين و كدا
_ احنا مين
_ انا وانتي
_ أنت عبيط ! ... هو انا بسأل ! ... انت فعلاً عبيط
_ ياااااه ... انا كنت ولد امور ... واستيل أمور طبعاً بس ..
_ بس الزعل غير ملامحك
_ لا الشمس .. الصيف السنادي رهيب .. اشتريت صن بلوك ومفيش فايدة اما زهقت بقا روحت حطيتها في فينو وكلت
_ هي ايه !
_ الصن بلوك ..
_ يا رب الي في بالي يطلع غلط وميكونش قصدك على تونة صن شاين
_ عليها دولفين ؟
_ .....
_ على فكرة بقا كان عليها عرض في كارفور
_ .....
_ يا ... يا ... هي كان اسمها ايه ! ... يا أبلة
_ أبلة!!!!
_ وانا صغير ماما مكنتش بتحط قدامي المانجا كاملة كانت بتحطهالي في طبق ... اصل امي من احفاد امينة شلباية .. وانا كان نفسي أكل المانجا بقشرتها
_ قصة مؤثرة فعلاً
_ بابا عمره ما حضني عشان كدة انا قتلت ولاية كاملة ورملت النساء ويتمت أطفال وكلت كشري الساعة تسعة ونص الصبح
_ قتلت ولاية كاملة ؟
_ ايوه
_ رملت نساء ويتمت أطفال
_ بالظبط
_ وكلت كشري
_ الساعة تسعة ونص الصبح
_ موضوع خطير فعلاً
_ فعلاً ... هييييح وانتي اخبارك ايه
_ انت هتصاحبني !!!!
_ لو سمحتي انا رايح ام*وت .. احترمي مشاعري
_ انا اسفة
_ فيها ايه اما تتجوزي واحد منت*حر يعني ايه! لا هي اول ولا آخر مرة تحصل
_ والله! ناس عملتها قبل كدا عادي!
_ ابن خالي لسه عاملها من اسبوع
_ فين دا ؟
_ في مدينة نصر عمارة سبعة شقة تلاتة بس ايه حماته دي ست قرشانة تقولنا الستاير عليكوا وهي معروفة انها على العروسة .. انتي رأيك ايه ؟
_ في ايه ؟
_ في الستاير .. مين يجبها انا ولا انتي ؟
_ انت عايز تنت*حر صح ؟
_ انتي عاوزة ايه
_ عايزة اجي ارميك من عندك
_ تعالى دا الدنيا طراوة هنا واهو اكملك الحكاية
_ استغفر الله العظيم يا رب
_ مش معقول !!!! .... بقالنا سبع ساعات بنتكلم ؟
_ تؤ تؤ .. بقالك سبع ساعات بتتكلم
_ انا مش عارف انا ازاي الوقت سرقني كدا
_ ابتدينا
_ انتي اكيد غيرهم
_ امممم
_ اكيد مختلفة
_ الي بعده
_ انتي اكيد من عالم تاني
_ خلصت كدا ؟
_ هم بيقولوا غير كدا .. انا الاب ديت منزلش عندي لسه
_ دا انت سمج
_ الا انتي اسمك ايه
_ ليلى
_ ليلى ... ياااااااااه يا ليلى
_ ايه تاني!
_ كارت الفكة قرب يخلص .. هقفل ورنيلي
_ وايه الي يخليني أعمل كدا ؟
_ والله أنط
_ ما تنط
_ هنط
_ متنط !!
_ مش من قلبك على فكرة
_ وانت عرفت الي في قلبي منين!
_ انا يا ليلى حاسس اني اعرفك من زمان
_ .......
_ قديمة مش كدا
_ جدا
_ بصراحة كدا .. انا مكسل أنزل الادوار دي كلها ومفيش سبت جمبي اشتري كرت .. خليكي جدعة
_ بتكلم ولا كأنك ابن خالتي
_ لااااا بقولك ايه ...جو ابن خالتي و ابن خالي و دا متربي معايا دا لااا .. مش بتاعي .. بقولك ايه انا اصلا صعيدي
_ لا اله الا الله ! دا عبيط بجد لا حول ولا قوة الا بالله !
_ يلا هقفل ورنيلي
_ لأ
_ عشان أكمل الحكاية
_ يا ولي الصابرين يا رب.
سكت شوية وسكت أنا كمان و لقيت الخط اتقطع، بصيت في الشاشة لقيتها فعلاً عدت السبع ساعات، ازاي فاتوا بالسرعة دي وازاي مخدتش بالي .. اسئلة مش بفكر اني الاقي ليها اجابة
بصيت في الفون لدقيقة كاملة قبل ما ارفعة ..
سمعت صوت الجرس وبعديها فتح
_ الو مين ؟
_ والله ؟
_ مش هتبطلوا معاكسة ابداً في ولاد الناس ؟
_ تمام هقفل
ضحك
_ خلاص بهزر معاكي .. متبقيش قفل كدا
_ ها ؟
_ ها ايه ؟
_ تمام
_ يا بنتي استني .. طولي بالك .. اتحايلي عليا دا انتي تقيلة جداً ايه دا !
_ مش هتكمل الحكاية
_ هكملها .. بس مش هنا
_ اومال فين ؟
_ عندكوا
_ عندنا فين ؟
سكت وسمعته وهو بيضحك
_ أنا عز الدين المهندس الي اتقدملك الأسبوع الي فات ورفضتيه من على الباب كدا
مكنتش مصدقة الي حصل لكنه كمل
_ على فكرة انا حوار الجواز دا مسعتش فيه ولا كنت رايده، بابا كان بيجبرني عليه وحطني قدام الامر الواقع معاكي، بس انا نرجسي شوية فـ جو اني اترفض زعلني فقررت اني انت*حر بقا وكدا
_ .........
_ ها ؟ ... كرييتيڤ ؟
ضحكت وانا بدمع ومش مصدقة
_ انت عملت المسلسل دا عشان تقولي كدا ؟
_ يعني .. قولت منبقاش one hundred percent صالونات
_ .........
_ هو السكوت كان علامة ايه؟
ابتسمت وانا بقول بهدوء
_ رضا
_ رضا ... يااااااه يا رضا
_ والله !
_ دي حكاية تانية هحكيهالك عندكوا في الصالون
*****************************
#نانسي_اشرف ♡
- عاالم مختلف )" 💛✨
