_أنا عاوز مُبرر واحد لرفضك لياسين يا سندس!
رفعت عيوني من على الكتاب اللِ بقرأ فيه وقُلت لبابا
_انسان مش غاوي شيء في الدنيا غيري!
ربّع إيديه وقال بعدم فهم وصدمة من ردة فعلي
_أفندم!، هو دا مُبرر، هو في أفضل من إنك تلاقي شخص فيه الشيء المُميز دا!
غمضت عيوني وقُلت وأنا بوضح وجهة نظري
_هستفيد إيه لما يكون غاوي بس مش بيسعى!
أنا غالية!، غالية أوي يا بابا، مش بَشُكر في نفسي لكن من أكبر الدلائل على كده إن ربنا نفخ من روحه فيا!
أنا مش بقول إن ياسين وحش، بالعكس بنات كتير تتمناه!
لكن للأسف، أنا مش من ضمن البنات دول!
تعرف ليه؟
اتنهدت فلقيته بيهز رأسه بإني أكمل
_أولًا بيشرب سجاير!
أنا بكرهها، وجدًا كمان، يعني بيستهتر بأوامر ربنا
للوهلة الأولى اترسم على وشه علامة استغراب فقُلت
_هو مش مطلوب مننا نحافظ على صحتنا لأنها غالية!
ولأن كتير غيرنا مُفتقد نعمة الصحة فلازم نِحس بالنعم دي مش نتجاهلها!
ياسين عامل عكس كده، بيضُر صحته بنفسه!
أنا مش أنانية، لكن ممكن أقولك ببُص على المدى البعيد
لما يكون عندنا أولاد مثلًا!
وولادنا يكبروا ويكون عنده ولد ويطلع بنفس العادة دي!
قبل ما نحاسب أولادنا على أي تصرف بيعملوه لازم نراجع نفوسنا كأباء وأمهات!
لأنهم بنسبة كبيرة بيقلدوا تصرفاتنا!
ثانيًا، ياسين بيحبني لكن مش بيسعى للحب دا!
مش بيحاول يصلح من العادات السيئة
أنا مش ضد أبدًا إنه يكون فيه عيوب كتير
لأن المُحبين بيتغاضوا عن العيوب، بل الحب الصادق أحيانًا بيعكس العيوب دي إنها مُميزات!
لكن أنا ممكن أكون خايفه على صحته، خايفه على المدى البعيد إنه يتعب!
أنا مش بحب أشوف اللِ بحبهم تعبانين أو زعلانين أو فيهم أي شيء!
فَ لازم أكون صادقة في حُبي ومشاعري فعلًا!
ممكن أي بنت تقبل العادة اللِ فيه دي، وتعتبر إيه في شباب كتير جدًا كده فَ تمام!
وممكن بنات تانية يشوفوا إني مكبرة الموضوع!
في الحقيقة بشوفه استهتار!
ابتسم لي وقال وهو بيتنهد
_بحب تفكيرك المُختلف!، تركيزك في التفاصيل اللِ مش الكل بيلاحظها!
انتِ حبيبة بابا جدًا يا سندس، وياسين لو كان قدامك دلوقتي وانتِ عيونك بتلمع وانتِ بتقولي إنه بتخاف على صحته!
كان هيكتب الكتاب بالغصب!
وضِحك
قُلت وأنا بضحك
_أنا مقولتش صحته بالأخص
غمز لي وقال
_قُلتِ بطريقة غير مُباشرة!
تليفونه رن، فِضحك وفتح الإسبيكر!
_ ازيك يا عمي
هو كده دايمًا بيقوله يا عمي!
مع إنه مش عمه ولا حاجه!
رد عليه بهدوء
_بخير الحمدلله يا ياسين
قال بلهفة واضحة في نبرة صوته
_حضرتك كلمت سندس
