ــ ممكِن ترسميني؟!
بَعـَتلها الرساله دي واستنيت دقيقه لما ترد
دي بنت عندي في الاصدقاء بترسم شخصيات وغيرُه
دخلت كتبتلها الرساله دِي، وبعدها بدقيقتين دخَـلت تاني كتَبت:
ــ انا بجد نفسي حَد يرسمني.
لما بعتلها الرساله دي كمان جه فـ بالي انها اكيد هتطلب مقابل
ده احنا بيننا بلاد ومكانش قدامي غيرها اطلب منه الطلب ده
بعتلها رساله كمان محتواها:
ــ هشحنلك بخمسين.
عارفه ان كلامي بايخ بس قلت حاجه علي ادي،
بعد شويه دخلت اشوفها عمَـلت اي،
لقيتها شافت الرسايل ومردتش
غصب عني دخلت علي صفحتها لقيتها ناشره اسكرين بكلامي وبتهزر هي وصحابها، دخلتلها تاني لقيتها عملتلي بلوك.
معرفتش امسك نفسي من العياط وكنت فـ حاله لا يُـرثى لها
لما جيت احط نفسي مكانها واعذرها معرفتش اجيب اعذار
لو مش فاضيه كانت تقولي بعد اسبوعين تلاته اربعه مثلاً ، كانت تقول اي حاجه، انما مش كده
اصلا فكره اني اقولها نفسي فـي كذا تخليها تحاول عالاقل.
الموضوع ده فضل فتره خانقني وكل اما افتكره ازعل جداً
فقررت فـ يوم ارسم، طبعاً الموضوع كان صعب الى حد ما
اخدت كورسات واتعلمت من كذا حد غير اني كنت بتابع ناس وبروح وباجي وواحده واحده بدأت ارسم بس مستوايا مكانش اللي هوّ
كان عشان بس ارسم العينين كنت باخد فتره طويله بحيث اني اخليهم قصاد بعض ومش واحده اكبر من التانيه ولا غيـرها الموضوع كانت متعب ومحتاج مجهود فعلا.
بعد سنتين من اللي حصل بدأت ارسم اشخاص، في الاول لما كنت برسم كان الواحد ممكن ياخد مني يومين تلاته
واحده واحده بقت اقل لحد ما بقيت برسم الشخص في اقل من تلات ساعات
اول حد رسمته طبعاً امي
مش هقدر اوصف فرحتي ولا فرحة امي لما رسمتها
شكلها وهي بتحضنها غصب عني خلاني اعيط،
كان نفسي احس بالإحساس ده وانا مرسومه
عارفه ان الموضوع مش مبهر للدرجادي بس كان مبهر بالنسبالي
دخلت مسابقات وأخدت جوايز متتعدش
كان فيه كتير جدا بيبعتوا صورهم ويطلبو مني ارسمهم، كنت بحدد لكل واحد يوم عشان اكيد ببقى مشغوله برسم ناس تانيه.
كل يوم كنت برسم حد من عيلتي
بدأت انشر صوره صوره وناس كتير كانت مبهوره بيا وبالصوره اللي بتبقى كامله من كل الجوانب
بعد سنه جمعت عدد كبير جدا من اشخاص بعلمهم الرسم وكل حاجه تخص الرسم
كنت كل يوم برسم اتنين تلاته فيهم، مش هقدر اوصف الفرحه اللي بشوفها
كنت حابه اعملهم حاجه عارفه كويس انها هتفرحهم
او حاجه بسيطه زي دي، حاجه اتمنيت انها تحصل بس امنيتي متحققتش.
رسمتهم كلهم مكنتش مستنيه حد فيهم يعمل حاجه
كفايه انـي بعلمهم وكفايه الفرحه اللي بشوفها في عيونهم لما يطلبوا مني ارسم حد من اهلهم وارسمهم.
بعد سنتين كمان كانت المره الاخيره اللي هشوفهم فيها
لقيتهم بيطلبوا مني اجيلهم كمان مــــَره
اتفقنا علي كل حاجه وكنت مستنيه اليوم اللي هشوفهم فيه وفـ نفس الوقت مش عوزاه ييجي عشان مش هشوفهم تاني، اصل هم اهلي التانيين يعتَبر.
ــ اليوم اللي اتفقنا عليه جه
دخلت وانا بعيط عشان دي اخر مره هشوفهم، لما جيت ابصلهم وانا بعيط اتفاجئت بحاجه مكانتش تخطر علي بالي،
صــوري في كل مكان حرفيا، مرسومه بالايد، ايوه ده رسمهم انا عارفه طريقة كل واحد فيهم كويس
كانت كل اما عيني تيجي فـ اي مكان الاقي صوره مختلفه ليا
والله حتـى سقف المكان كان مليان صور ليا
فــرحتي وقتها حرفيا مكانتش تتوصف
ببص لكل واحد فيهم وانا بعيط من كتر الفرحه اللي كنت فيها
كنت بعيط وانا بحضن كل واحد فيهم، فخوره بيهم ومبسوطه ان اللي عمل كده ناس انا اللي معلماها الرسم كمان، اليوم ده اتسجل بكل دقيقه فيه
اتسجل فـي ذاكرتي وذاكرِتـهُـم.
ـــــــ
صحيت من شرودي وانا ببص علي الصور اللي اترسمتلي من طلابي بعد اما نقلتها بيتي، وإن كل ده حصل بسبب رساله وطَلَب امنــيه بسيطه جداً كان محتواها:
ــ ممكن ترسميني؟!
لِـ #تقوىٰ_السيد
- عاالم مختلف )" 💛✨
