ابني عنده ٨ سنين ونص شافني بتكلم في التليفون بعيد شوية عن مكانه وطولت..
لما رجعت سألني بتكلمي مين
قلت له ده شىء يخصني وميصحش تسأل عن خصوصيات غيرك
قالي أنت مامتي لازم اعرف كل حاجة عنك
(ده مفهوم غلط قطبي جدا في العلاقات إن القرب بيتقاس بمدى المعرفة لكل أحوال الآخر)
فقلت له لا يا حبيبي من حبك ليا تحترم مساحتي ومتسألش عن شىء يخصني لوحدي ومش هتستفيد حاجة من معرفته
ده من الأمور اللي الرسول صلى الله عليه وسلم أمرنا بيها (ولا تحسسوا..)
يعني منسألش عن الأحوال الغايبة عنا ولا نتلمسها بفضول..
مساحة الابن من الأم مش زى مساحة الزوج من الزوجة..
هى مساحة قرب.. والقرب مش معناه بلع بعضينا
ومن ناحية تانية مينفعش تقبل إنه يرد ويقولك خصوصيتي ومش هرد زى ما رديت
ساعتها بنعلم الولاد معنى احترام الأم ونوضح المفهوم بشكل أوضح
المساحات اللي بنشاركها هى اللي منها هنستفيد شىء.. فالأم لما بتسأل، بتسأل حماية وحفاظ عشان قلة الخبرة عند الاطفال .. الولد لما يسأل بيسأل فضول وعدم فهم للمساحات ومش هيستفيد شىء
ومع الوقت هيتفهم شكل العلاقة بين الأم والابن
ومفهوم الرجولة والمروءة العام
وشكل العلاقة بين الزوج والزوجة
الغيرة منه جميلة ومحمودة
لكن التعامل بفضول بناءا على الغيرة غلط
وده بيعلمه بالوقت يهذب غيرته..
من غير ما يميتها
بأكد تاني إن الغيرة من الولد فطرية ومحمودة وجميلة
لكن احنا بنهذبها
في أوقات بنثني عليها لما تبقى في مساحة سليمة وصحية
زى مثلا لما اكون كاشفة وشي ف العربية عشان ضلمة وانا سايقة ولما الدنيا تنور ويبقى ف زحمة يقولي ماما البسي نقابك في رجالة
ساعتها بثني عليه وبقدره جدا إنه غيران عليا واتصرف بشكل صحي بناءا ع غيرته
المهم..
بعدها بشوية بقول لموسى محتاجاك تجيب لي حاجة من العربية
فقالي مش قادر ..
هنا بقى وضحت له المفهوم الغلط التاني في معاني الرجولة
قلت له واجبك كراجل تقوم على رعايتي وخدمتي .. وميصحش تبقى راجل وتسيبني اطلع اجيب انا الحاجة ..
هى دي الرجولة يا حبيبي
إنك تحافظ عليا وترعاني وتشوف طلباتي
مش إنك تسألني بتكلمي مين وبتعملي إيه وبس 😏
.
.
بيتأمروا ومن هما صغيرين وعايزين يأنتخوا.. دوام تثبيت دورهم ومروءتهم مع الوقت ربنا يبارك فيها وتزيد 😂♥️
.
.
ابني الكبير عنده ١٣ سنة
بيميل للأنتخة برضو زي كل راجل طبيعي
على طول بخليه يقوم بالمهام الصعبة ف البيت من شيل وحط وفتح باب ووقوف مع صنايعية
وعلى طول بيتأفأف طبعا
لغاية ما شوفته في رحلة طالعينها سوى
لقيته متحمل المسؤولية
وبياخد يشيل مني الشنط
ولما وصل قبلي البيت كلمني قالي لما توصلي بلغيني انزل اشيل معاك
انا مؤمنة إننا بنبذل وبنحاول..
مش بالضرورة نلاقي نتيجة ع فكرة
يا ما ناس أفاضل وولادهم مخرجوش بنتيجة واضحة من تربيتهم وسعيهم..
لأن التربية رزق
لكن انا مؤمنة في السعى في التربية
انا ببذل وبقول وبغير مفاهيم
ومش بيأس مهما بشوف عكس كلامي
وبستعين بالله لما مبلاقيش نتيجة
ولما بشوف شوية أثر ايجابي منعكس عليهم بعرف إنه مش بشطارتي ابدا
"قل بفضل الله وبرحمته فبذلك فليفرحوا
هو خير مما يجمعون"
#ريهام_حلمي
- عاالم مختلف )" 💛✨
