-ما تحاسب يا كابتن انت، ايه اتعميت!
-انتي نازله جري وخطبتي فيا وليكي عين تتكلمي كمان! ؟
لو كنت وقفت اتناقش معاه دقيقه كمان مكنتش هلحق السكشن ف اكتفيت اني ابصله بإستحقار وكملت جري ع السلم عشان الحق اجيب البالطو من صاحبتي
وبعد اقل من خمس دقايق طلعت لقيت باب المعمل اتقفل ،هو يوم باين من أوله، دول بيقولو ان الدكتور ده معقد وممكن يطردني قدام السكشن كله ولو محضرتش هتاخد غياب، انا هخبط وخلاص
خدت نفس عميق وخبطت خبطتين وفتحت الباب ووقفت عشان اعتذر
-انا اسفه يا دكتور ع التأخير، انا...
قبل ما اكمل باقي الكلام كان التفت ليا بعد ما كان بيكتب على البورد، وقتها حسيت ان حد دلق عليا جردل مايه لما لقيته نفس الشخص اللي لسه مهزقاه ع السلم!
هو انا ينفع احول من الكليه صح!
بص ف الساعه وبصلي تاني بمنتهي الهدوء وقال
-امال لو مكنتيش نازله جري بقى
بصيت ف الارض وماقدرتش انطق
-فين البالطو
رفعت راسي - اهو يا دكتور
-امال مش لابساه ليه مش دخلتي السكشن
-انا اسفه هلبسه اهوه
-البسيه وادخلي
لبسته بسرعه وروحت قعدت جمب صحابي
-هو يعرفك منين
-خبطت فيه وانا نازله وهزقته
-يخربيتك، ده هيسقطك
-انا بومه انا عارفه
بصلنا وقال بعصبيه
-الصوت ياللي ورا
فبالتالي قفلنا بوقنا لحد ما اول سكشن خلص واللي كله كان عباره عن شرح نظري بيقولنا الماده بتتكلم عن ايه وايه الموضوعات اللي هناخدها ف السكشن
وعلى عكس عادتي اول ما خلص خدت ايد تقي صاحبتي وطلعنا جري من السكشن
-انا خايفه اوي يا تقي، تفتكري ممكن يشيلني الماده بجد
-هو اللي سمعته عنه انه بينقص جامد ف الدرجات بس درجات السكشن لوحدها اصلا ماتشيلش
-احنا اصلا بنعتمد ع درجات السكشن، يبقى على الله
-بس سيبك هو رخم اه بس قمر
-اتلمي يابت ،هو عشان شعره ناعم وحلو وعنده دقن وغمازه وطويل والبرفيوم بتاعه حلو يبقى قمر! لا ياستي استغفر الله
-هههههه يلا نقوم نشوف هناكل ايه عشان قدامنا محاضرات كتير
-ايه ده احنا هنحضر محاضرات كمان
-تاليا يا حبيبتي، انتي لسه شايله العملي دلوقتي، يبقى اي حاجه تسندك
-هو احنا ايه اللي دخلنا علوم، ما كنا نكتفي بالاعداديه، أو نتعلم ليه اصلا، الست مالهاش غير بيت جوزها
-طب وبالنسبه للعريس اللي متقدم؟
-الست مالهاش غير شهادتها
-على يدي، لأ بجد انتي ناويه تعملي ايه ف موضوع العريس
-هرفضه طبعا ،بس مش عارفه ازاي، اهلي المرادي مصممين
-هو حل واحد بنلجأله ف المواقف دي
-لسه صغيره وعايزه اكمل تعليمي معروفه يعني
-انتي عارفه لو شيلتي حاجه بعد ده كله
-هيعملو مني بانيه
-صحيح ابقى فكريني نسأل محمود هو دكتور خالد ده هيديه ف السكشن بتاعه ولا لأ
-اوك
رجعت البيت تعبانه جدا بعد يوم طويل ف الكليه، فتحت الموبايل وانا بغير هدومي لقيت مسدجات كتير، فتحت تطبيق الواتساب لقيت جروب بإسم الدفعه بتاعتي ، طلعت ف الشات لقيت إن دكتور خالد هو اللي عامله
-ياربي هو هيطلعلي ف كل حته
فتحت شات صحابي وبدأت اكتب
-يا عيال، هو دكتور خالد عامل شات ليه؟ وليه الدفعه كلها موجوده فيه
رد محمود - عشان هيقولنا ع التكيفات المطلوبه عليه و ضاف الدفعه كلها لأنه هو اللي هيدينا كلنا ف السكشن
-الله، وأنا اللي كان عندي امل اتنقل السكشن بتاعك
-متحاولش، انا خايف يطلعلنا ف المحاضره كمان
-اه، تبقى كملت
الاسبوع عدي بسرعه لحد ما جه ميعاد سكشن الكيميا من تاني، بس المرادي كنت ف السكشن قبل الميعاد كمان، هحاول اكدب نفسي واقول انه مر بعينه ع السكشن كله لحد ما وصل ليا وبعدين طلع اللاب توب عشان يبدأ السكشن
وبعد نص ساعه شرح قومنا عشان نشتغل العملي
-تاليا، احنا الاتنين ناخد نفس رقم الملح اللي هنكشف عنه وكل واحد يروح ف جروب بس نشتغل مع بعض، عشان لو خد باله ان احنا صحاب وواخدين نفس الملح هينفخنا
-خلاص اتفقنا، روحي خدي ملح رقم ١ وانا هروح اخد بعدك، و اقفي انتي ع البنش اللي ورايا ونشتغل سوا
-اتفقنا
نفس الخطه اللي بنعملها ف كل سكشن كيميا بناخده، خلصنا الشغل وعرفنا اي هو الملح المجهول وكتبنا الداتا ف الكتاب
-يلا بقى عشان نروح نصحح ونمشي
-هو ماينفعش تصححيلي معاكي
-هيسال كتاب مين ده
-اوف، طب يلا
وقفت قدام البنش بتاعه وحطيت الكتاب من غير ما اتكلم، لقيته قفل الكتاب وفتح اول صفحه وقرأ اسمي بصوت مسموع
-اممم تاليا
فتح الكتاب تاني وصححه وادهولي وهو بيقولي
-حلو الانضباط صح
ابتسمت ببرود
-طبعا يا دكتور
خدت منه الكتاب وخرجت وقلعت البالطو وانا بنفخ
-انا مش عارفه بيجيبولنا المعيدين دول منين
-بس لأحسن يسمعك
-قال حلو الانضباط قال نينينيني
-امشي يابت من هنا هتودينا ف داهيه
-طيب
-بقولك ايه، ماتيجي ننزل بعد الكليه نجيب شويه لبس عشان الشتا
-ماليش نفس والله يا تقي واليوم اتقفل اصلا
-عشان خاطري، هنجيب من عند البيت اصلا مش من هنا، وبعدين لما نخرج المود هيتعدل
-طيب نخلص بس اليوم ونشوف
مبطلتش زن لحد ما نزلنا نجيب لبس فعلا
-انا مش فاهمه لبس الشتا ايه ده اللي هنجيبه الجو ولعه اساسا، شهر ١٠ اتغير اوي عن زمان
-يابنتي المحلات كلها منزله اللبس اهوه، وبعدين نستنى لحد الميدتيرم وبعدين الفاينال ومانجيبش صح
-لا ننزل نتحرق ف الشمس ،استنى ادخل السوبر ماركت اجيب مايه وعصير
-اوك انا هستناكي هنا، هاتيلي بيبسي معاكي
-طيب
دخلت السوبر ماركت واخدت المايه والبيبسي ودخلت عشان أحاسب بس للاسف كان في واحد واقف وقافل الطريق
-لو سمحت ممكن تعديني
لف جسمه وبصلي اتصدمت! معقول يكون الدكتور، هو ماشي ورايا ولا ايه، والصدمه التانيه لما رد عليا
-تاليا! إزيك عامله ايه
-الحمد لله يا دكتور
وقبل علامات الاستغراب ماتروح من على وشي كان قال
-ايه اللي جابك هنا، انتي ساكنه ف المنطقه دي
-اه ساكنه ف شارع.....
-طيب محتاجه مني حاجه
-لأ شكرا
-بعد إذنك
-اتفضل
وقفت حوالي دقيقين بحاول استوعب اللي حصل
معقول ده دكتور خالد! لا اكيد ده حد شبهه، طب هو عيان طيب ولا ايه، ثواني هو ايه اللي جابه هنا
لما اتاخرت لقيت تقي دخلت ورايا
-انتي بتعملي ايه ده كله يابت
-ثواني هدفع الفلوس
-امال كنتي بتعملي ايه
-تعالي بس
-هاه قوليلي بقى.
-دكتور خالد
-ليه بس السيره دي
-كان هنا
-نعم ياختي
-اه والله ،وكان لطيف جدا
-تاليا انتي سخنه صح
حسست على راسي ف شيلت ايدها
-انا بتكلم جد علفكره
حكيتلها اللي حصل
-ازاي انا مش مصدقه
-يابنتي انا حسيته شويه وكان هيقولي تعالي اوصلك
-غريبه
