"لقيتي زيي"
بعتلها الماسدج وأنا عارف إنها عملالي بلوك ، ماعرفش ليه قولت أجرب مع إني متأكد إن التجربه مش هتفيد بحاجه ، هيا خسرتني وكان بإرادتها
أخر خناقه بينا قفلت الفون وقعدت يوم كامل مابفتحش ، افتكرت إني أول ما أفتح هلاقيها بتسألني
"كنت فين كل دا ، رنيت عليك كتير ، تليفونك كان مغلق ليه"
ملقتش أي حاجه ولا أي notification منها ، زاد العناد بينا ويمكن أنا اللي زودته لأني متعود إنها تحن وتدخل تصالحني وهيا عودتني علي كدا
دخلت الواتساب ماهتمتش أسأل عليها ولا حتي اشوف last seen عندها ، دورت عليها في أستوري الواتس ، أنا متأكد إنها بتلقح عليا بالكلام عشان أدخل أصالحها أو هتحسسني إنها مش قادره علي البعد
ماظهرش حاجه تخصها عندي في الأستوري ، دخلت علي الشات بينا لقيت صورتها متشاله
جريت بسرعه ادور عليها في سيرش الفيس مظهرش معايا حاجه ، رنيت عليها من رقم غريب مافيش رد ، أختفت من كل حاجه تربطني بيها
أول مره اخاف إني أخسرها ، ولأول مره احس إن وجودها مش مضمون ، كانت دايما تقولي "مهما يطول بينا الخصام أكيد هنرجع ، انت تتنازل مره وأنا أتنازل مره" ، بس دايما كانت هيا اللي بتتنازل ، أنا كرامتي أغلي من كل حاجه وهيا عارفه كدا كويس
كانت بتخاف تقولي همشي تسمع مني كلمه "مع السلامه"
انا لسه فاكر جمله " أنا بخاف اعاتبك لتكسر بخاطري"
قلبي دق يوم فراقها كأن الوقت مش عايز يعدي ، تقيل اوي علي صدري ، ماحدش بيسأل عليا ولا حد بينكشني ويقولي أحكيلي "التفاصيل" ، كنت دايما بحسسها إن أنا حاجه كتيره عليها بس كان لازم "تبقي" ذي ما وعدتني
-لقيت
وصلتني رساله منها بعد تلت أيام من رسالتي ليها ، معقول فكتلي البلوك ، أكيد يعني هتفكهولي وأكيد كانت بتراقبني وتطمن عليا من بعيد
كان فات ع فراقنا ٢٢ يوم ، كنت عايز أقولها ازاي لقيتي ، لا ماحدش هيحبك زيي
طب فاكره لما...
وقف تفكيري ، انا ماعملتش أي حاجه افكرها بيها
قولتلها " طب وأنا ! "
=المفروض انا اللي أقولك الجمله دي ، طب وأنا
-أنتي حبك قل ، باين من تصرفاتك ، لقيتي بديل صح !
=لقيت نفسي
-وأنا اديني عرفت قيمتها
=وأنا حبي ليك حسسني إني بلا قيمه
ازاي قلبها قسي كدا ، كنت بصالحها بأقل جمله ، كنت بصالحها بأستوري تلقيح إنها مهمه في حياتي ، فين البنت اللي بتعيط وتتمسك وبتخاف لتبعد ، مستحيل تكون اتغيرت ، أنا باصم بالعشره إنها هتستحملني "دايما"
ذي عادتي هحاول أقلب الطرابيزه عليها
-يعني أمشي ؟
=مع السلامه
لـ أميمه عبدالله
- عاالم مختلف )" 💛✨
