ـ بسس بسس .
ـ كملت طريقى ومبصتش على مصدر الصوت فلقيت اللى بيبسبسس تانى .
ـ بسسس بسسس .
ـ التفت وياريتنى ما التفت ليه دا القمر واقع من السما نزل الارض ولا ايه ... فوقت على صوته وهو بيقول .
ـ يا آنسه بقالى ساعه بنادى عليكى عليكى علشان ..
قاطعته واتكلمت لو عايز تقول انى حلوه وقمر فاحب اقولك انى عارفه ...
ـ حلوه إيه بس مش كدا كنت عايز اقول ..
قاطعته وقولت :لو عايز رقم بابا فاحب اقولك انـ
قاطعنى المرادى وقال :ايه حيلك بلاعه اتفتحت انا مش عايز اقول غير ان المفتاح اللى وقع دا بتاعك .
ومد ايده بالمفتاح ...
يكسفتى السوده انا دايما متسرعه كدا بصيت فى المفتاح وطلع مفتاحى مديت ايدى واخدته منه وفى ثوانى كنت جريت من قدامه ..
ـ سمعت ضحكته وهو بيقول مجنونه والله .
روحت البيت وكنت كل اما افتكر الموقف كنت ادفن دماغى فى المخده من الكسوف انا منى لله يارب ارحمنى من غبائى وتسرعى ..
طلعت اتعلم تنشير الغسيل جنب امى وهى بتنشر ،
فبدندن وانا بنشر التيشرت فلقيت اللى قرصنى اتوجعت وبصيت لامى وقولت بصوت عالى نسبياً:حراام يا ماما والله انا مش بعرف انشر اغنيها مش بعرف انشر ولوكنت عايزه اتعلم بعد القرصه دى والله ما متعلمه خالص وادى البلكونه نشرى براحتك بقا وسيبتها ودخلت .
بعد اسبوع لقيت امى بترن عليا مش عايزه ارد امى دايما بعد المكالمه دى بتخلينى يا اعمل الغداء لتخترع اى شغلانه وخلاص ..
المكالمه قبل ما تخلص كنت فتحت انا مش حمل قرص تانى من امى الو ايوا يا ماما إيه لا و حياتك هنشره غلط وهتيجى تهزقينى ، بامانه يعنى مفيش قرص تمام هقوم انشره وامرى لله .
امى عند عمتى والقاعده هتطول فانا هنشر وامرى لله .
لبست الخمار وطلعت حطيت سبت الغسيل على الكرسى بحيث اطول اخد مش كل شويه اوطى وبسم الله الطويل ورا والقصير قدام ونبدا نرص الغسيل وسط تفكيرى وانشغالى احط البناطيل فى الحبل التالت ولا الرابع لقيت اللى بيبسبسس احنا اه قدامنا جيران بس عمر ما حد بسبس كلهم محترمين ..بصيت شمال ويمين لحد ما لقيت القمر احم قصدى الشاب دا يكسفتى هو بيعمل هنا إيه معقول تكون ام محمد كانت عندها الشحط دا ومقالتش .
فوقت من دوامه التفكير لما فضل يبسبس بردوا .
ـ اتكلمت بنرفزه :إيه بتنادى لقطه حضرتك .
ـ اتكلم بسماجه :طب ماتقولى اسمك علشان اناديكى بيه .
ـ اتكلمت بعصبيه : ولا تنادى باسمى ولا تبسبس وادخل وسيبنى اكمل تنشير الغسيل.
ـ ضحك وانا بصاله بنرفزه بيضحك على ايه الاهـ..بل دا .
اتكلم بعد ماخلص ضحك وقال: باماره القرصه اللى انتى لسه واخدها من اسبوع علشان زاطله .
ـ اتكلمت بعصبيه وصوت عالى : عااااا انت شخص بارد ومستفز و بتدخل فى خصوصيات الناس اعرف ما اعرفش دى حاجه ترجعلى فاهم وادخل علشان ما اناديش على ام محمد واخليها تزعقلك وبعدين انت مين يا شحط انت .
ـ شحط بقا انا شحط دا انا البنات كلها هتموت وابصلها .
ـ اتكلمت بسخرية: طب هوينا يا اخويا وروح كلم البنات دول وروحت كان فيه فى سقايه الزرع مايه روحت دلقتهم عليه اصل البلكونات قريبين من بعض ،هدومه اتبلت مايه
روحت داخله جرى على جوا .
سمعت صوته بيزعق فرحت والله انى قدرت انرفز البار..د دا .
وباليل طلعت كملت تنشير بسرعه قبل ما اشوفه ودخلت لقيت امى جات وابويا جيه معاها اتعشينا سوا ودخلت نمت .
تانى يوم صحيت على حركه غريبه فى البيت قومت اتسحبت يمكن يكون حرا..مى ولا حاجه فتحت باب اوضتى براحه وطلعت دماغى بصيت فى الصاله لقيت ام محمد عندنا احيه تكون جايه تشتكى لامى والله انا مش حمل قرصه واحده .
دخلت بسرعه وعملت نفسى نايمه بعد فتره سمعت باب الشقه قفل قولت لنفسى اجهز نفسى لعذاب مرات ابويا لان دى لو امى مكنتش عملت فيا كدا .
ـ دخلت فتحت شباك اوضتى وجات قعدت تصحينى حسيت من نبره صوتها ان الدنيا تمام عملت نفسى لسه صاحيه .
ـ صباح الخير يا مصر.
ـ صباح الزفت على دماغك الساعه 12 وانتى لسه نايمه قومى يالا.
ـ ايوا انا كدا عرفت انك امى صحيت اهو .
فطرنا وجرجرتها فى الكلام وعرفت مين الشاب اللى عند ام محمد وطلع مين تخيلوا طلع ابن اختها اللى متجوزه من بعيد وهو جاى يصيف عند خالته ويدور على شغل .
ويارب امى ماتكونش قالتلها يجى يشتغل فى المكتبه بتاعتنا بس اكيد امى ما بيتبلش فى بوقها فوله راحت قالت على الشغل وانا متاكده علشان يرخم عليا هيوافق بيه .
"انا بسنت وعندى 22 سنه ماسكه المكتبه بتاعت بابا و اهو بالمره اسلى يومى ".
