_صدقني حاسس بيك و بوجعك.
_ أنت عارف يعني إيه نفسك في عيل يشيل اسمك، تلعب معاه تحس إن ليك سند في الدنيا تتسند عليه، لما تعجز تلاقي اللِ يشيلك.
_ طب متتجوز يا جاسر.
_ مهما كان شوقي للخلفة، مش هقدر أبدًا أجرحها يا يحيى.
_ أنتو متجوزين باقيلكم ١٨ سنة، أكيد هي هتفهمك و أنت اتحملت كتير.
_ أنا بحب فرح جدًا مش هقدر ابدًا أوجعها؛ هي قالتلي لو حابب تتجوز و تخلف مش همنعك بس أطلقها، و أنا عمري ما هقدر علىٰ بعدها.
_ معلشي يا جاسر وحد الله و كفاية بكا.
كنت بتصل عليه أشوفه اتأخر ليه؛ باين إن الخط اتفتح و هو ميعرفش، أنا عارفة إنه نفسه يخلف، هو اتحمل كتير جدًا عشاني، ١٠ سنين بتعالج من العقم و مفيش فايدة الدكاترة قرروا إنهم يشيلوا رحمي لما الأمر ساء ؛ مفيش علاج لحالتي المرضية، اتحمل كمان ٨ سنين بس هو كتر خيره.
لما سمعت كلامه و صوته و هو بيبكي، عرفت قد إيه أنا أنانية إزاي أمنعه من حقة، إزاي أخيره بيني و بين الخلفة و أنا عارفة و متأكدة إنه هيختارني، ياااه علىٰ قسوة قلبي معرفش إزاي قسي عليه كده.
_ معلشي يا فروحة اتاخرت عليكِ.
_ ولا يهمك يا حبيبي أنا خلصت العشا هسخن العيش و ناكل.
قرب مني و باسني في راسي و همسلي
_ ربنا يديمك ليا.
دخلت المطبخ أخلص العشا و عقلي بيفكر في معاملته معايا، هو ازاي حنين أوي كِدَ معايا بالرغم إني قاسية عليه؛ حرمته من أكتر حاجة نفسه فيها ازاي قلبة طيب و حنين.
_ أحليٰ واحدة تعمل كبدة اسكندراني، تسلم إيدك يا حبييتي.
_ لسه كلامك حنين عليا.
_ عمره مهيتغير هيفضل كلامي حنين عليكِ و قلبي هيفضل يدق و يحب قلبك.
_ بس قلبك بيتوجع هو جمب قلبي.
_ يبقى متعرفيش حاجة.
_ بقولك؛ ايه رائيك في هاجر بنت الحاج إبراهيم.
_ معرفهاش بس اللِ أعرفه إن ما شاء الله بناته كلهم محترمين.
_ يعيني هاجر لسه ٣٣ سنة و مطلقة، طليقها كان صعب جدًا في تعامله معاها.
_ ربنا يفرحها و يرزقها بـ زوج صالح.
بصيتله و بحاول أطلع أكتر كلمات هتوجع قلبي و تقطعة حتت.
_ بكرة بإذن الله هروح أخطبهالك.
بصلي بصدمة و حط الكوباية اللِ كانت في ايده علىٰ السفرة.
حاولت استجمع قوتي
_ كنت بتصل عليك أشوفك اتاخرت ليه، باين إن الخط إتفتح و غصب عني سمعت كلامك مع يحيى.
