صحيت مخضوضه علي صوت رنه موبايلي وتقريبا دي مش اول رنه دي كانت الرنه التاسعه لغوشه عيني بسبب إضائه الموبايل مخلتنيش عارفه اقرأ مين اللي بيرن المهم رديت ولقيتها سلمي صاحبتي
-انتي نايمه ولا ايه
=اه يسلمي في ايه ايه كل الميسد كول دي
-خلاص ياليلي الصبح ابقي اقولك طلاما نايمه
=انتي عبيطه يعني مصحياني الساعه خمسه الفجر وتقوليلي الصبح ماتنطقي ياسلمي في ايه
-ليلي مراد خطب
=مراد مين !
-هو انتي عندك مراد تاني!
=بقولك ايه انا مش مركزه والله انتي بتقولي ايه اصلا الصبح هكلمك وتفهميني مين ده ولا انتي بتتكلمي عن مين عشان انا اقسم بالله مافايقه
……وقفلت من غير مااسمع اي حرف تاني منها
قعدت استوعب هي بتتكلم عن مين!!!!مراد!
مراد حبيبي انا! قعدت اوهم نفسي انو لا هي تقصد حد تاني لايمكن يكون هو
احنا كنا مع بعض من تالته اعدادي لحد السنه اللي فاتت!
دخلت علي البروفايل بتاع لقيته منزل صورهم سوا وكاتب "ادامك الله لي واتمني من الله ان يجمعنا دائما وابدا علي خير"!!!!!!!!!
كانت هي ! خطب اللي كنا ديما في مشاكل بسببها !معقوله!
قومت من علي سريري ولبست الاسدال وطلعت علي سطح بيتنا وقعدت اتفرج علي السما
كانت ديما دي الحاجه اللي بنعملها سوا كل ما نحس اننا مخنوقين نروح اي مكان فاضي ونقعد علي الارض ونتفرج علي السما وجمالها
نزلت دمعه مني لحظه ما افتكرت جمله قالهالي "لو الكون ده كله اتغير والسما والارض انطبقو كده علي بعض عمرك ما هتتغيري عندي واوعك اني عمري ما هسيبك ياليلتي❤️"
غمضت عيني بوجع علي كل الوعود والذكريات والمواقف وكل حاجه كانت بنا وعلي كل الوعود الكدابه اللي قالهالي
افتكرت اخر يوم كلمته فيه واللي كان سبب اللي احنا فيه ده
فلاش باك:
=هو يعني ان شاء الله احنا مش هنخلص من السنيوريتا دي
-ليلي قولتلك مليون مره انا بعمل شغلي وبس هي بقي عايزه تقربلي تتزفت علي دماغها انا مليش فيه وانتي عارفه اني عامل حدود لكل اللي عندي في الشركه
=ايوه ايوه واضح جدا الحدود اللي سعادتك عاملها !مراد انت بتضحك عليا ولا بتضحك علي نفسك واضح جدا هي عايزه ايه منك انت مش مشوفتهاش لما جيتلك الشركه كانت بتغلي ازاي
-وطب ده يهمك في ايه !
=يهمني في ايه !لايهمني طبعا اللي اسمها غاده دي بتلف عليك وده واضح جدا وانت متجاوب معاها وده بيقربها للي هي عايزاه
-متجاوب معاها فين ده يابنت الحلال !ليلي الله يسترك الواحد راجع من شغله فيه اللي مكفيه ومش ناقص خناقك ده علي المسا عشان انا مليون مره قولتك ان مفيش حد بحبه غيرك حتي لو ميه بنت قدامي
=لا يا مراد انا معنتش مصدقاك وده من قلبي بجد
-معتيش مصدقاني! ليه هو انتي قفشتيني بخونك ولا عارف عليكي تلاته اربعه ولا قالب عليكي ولا حاجه !انا عمري وعدتك بحاجه وخلفت وعدي ليكي!
=مراد انت شوفت الكلام اللي بينكو
-كلام بنا!
=مستغرب ليه اه كلام بينكو !وانت بتقول ليها انك خلاص قرفت مني ومعدتش قادر تستحملني
-هو انتي بتهزي ولا بتتكلمي بجد
=وههزر ليه في حاجه زي دي
-لا ده الكلام بجد بقي
=مراد
-نعمين
=انا مش عايزه اكمل
