#حكايات_منار
حكاية " بالعكس "
النهاردة خطوبة رودينا صاحبتى
احنا كنا متفقين انك هتيجى معايا
ده طبعا قبل ما نتخانق
مش عارفة هل يزال الاتفاق قائم ام تم الغائه نظرا للخناقة اللى بينا
عرفنى هتيجى ولا اطلب اوبر
حازم وهو بيكلم نفسه بغضب :الباردة دى مقالتش اسفة حتى ولا حقك عليا
وبعدين ايه هل يزال الاتفاق قائم دى
هو انا خاطب موجهة لغة عربية
انا اللى جيبته لنفسى سيبت كل بنات الدنيا وخطبت لوح التلج دى
كان مالها سارة بنت عمى ولا منى اخت احمد صاحبى
ولا نيرة بنت خالتى
طول عمرها هى وخالتى عينهم منى
وانا اللى قولت لا بلاش جواز القرايب
روحت جيبت لنفسى مصيبة بتكفر ذنبى وغلطى فى حق نيرة
بعتت رسالة تانية اكيد بتصالحنى فيها
لو هتيجى يا ريت تلبس قميصك الرمادى او الأسود علشان يليقو على فستانى
حازم اوعى تلبس قميصك الكافيه
ويا ريت تعرفنى جاى ولا لا قبل الساعة ستة
علشان لو مش جاى الحق اطلب اوبر
حازم :الباردة المستفزة
دى بتتشرط كمان اكلمها امتى والبس ايه
هو اكيد ذنب نيرة اللى هى بتطلعه على جتتى ده
اعمل فيها ايه دى بس يا ربى
هتموتنى مشلول من برودها قبل ما اتجوزها
هتخرجنى من الدنيا قبل ما ادخلها معاها لوح التلج المستفزة
خلاص يا حازم انت اتفقت معاها انك هتروح معاها ومش هترجع فى اتفاقك انت راجل والرجالة مبترجعش فى اتفاقاتها
كمان مينفعش تروح من غيرى دى مش بعيد ترجع بعريسين تلاتة
يا نهار ابيض تروح هى لوحدها واقعد انا اغلى وانا بتخيل كام حد شافها وتنح وسنح
لا انا اروح معاها اضمن
اكلمها اقولها
لا انا ابعتلها رسالة باردة زى ما هى عملت
ستة ونص بالدقيقة هبقى عندكم لو ملقتكيش جاهزة مش رايح معاكى ولا هتروحى لوحدك يا عملى الاسود
هلال :منورنا يا حازم يا ابنى
حازم :بنورك يا عمى
نيرمين :اشرب يا حازم العصير على ما اشوف كارمن متأخرة عليك ليه
حازم :علشان لوح تلج
هلال :بتقول ايه
حازم :بقول الجو تلج يا عمى
هلال :تلج ايه فى الحر اللى احنا فيه ده
نيرمين :تحب اقفل باب البلكونة يا حبيبى لو سقعان
حازم :لا يا طنط تسلمى
خليه علشان ابقى متعود ومبردش لما ننزل
استعجليلى كارمن بس علشان منتأخرش
كارمن :هتفضل ساكت كده
لو مضايق اوى كده جيت توصلنى ليه انا كان ممكن اطلب اوبر على فكرة
حازم بغيظ :علشان انا مش جاى اوصلك بدل الاوبر يا لوح التلج
انا رايح معاكى زى ما اتفقنا
انا امتى خلفت اتفاق معاكى
كارمن بابتسامة :عمرك
حلو القميص الكافيه عليك ولايق على فستانى
حازم :بس انتى قولتيلى ملبسوش
كارمن :قولت كده علشان تلبسه
حازم :بتشتغلينى يعنى
كارمن :وليه متقولش بستغل غضبك منى لصالحى
حازم :يعنى انتى عارفة انى غضبان منى
عدتينى بكلامك ده
قصدى عارفة انى متعصب منك
كارمن :اه ومتأكده انى رسايلى عصبتك اكتر
حازم :لا مش معقول كده
انتى عندك مخزون البرود اللى فى العالم كله
كارمن وهى بتضحك :شتمتنى كتير صح
اوعى تكون دعيت عليا
لو ربنا استجاب هيبقى ذنبى فى رقبتك
حازم :انا اللى امى داعية عليا
او نيرة
هو ذنب وبخلصه اكيد
كارمن :مالها نيرة
حازم :ملهاش بتسلم عليكى
كارمن اسكتى
لأنك كل ما بتتكلمى بجد بفكر اقلب العربية بينا واخلص من المأساة دى
