- بُص أنا هفهّمك بالعقل ، ينفع واحد شاف واحدة في القطر يقرّر يتجوزها؟
- آه ينفع
- طب بهدوء طيب ، إيه اللي عجبك فيها؟
يعني ليه قررت تتجوزها وتقول هيّ دي اللي هعيش معاها؟
- شكلها حلو وهيّ بتقرأ
- يابني انت هتجنني؟
هتتجوز واحدة وتلبس فيها طول حياتك علشان شوفتها بتقرأ ! مايمكن كانت بتتسلّىٰ أو بتقرأ علشان شافت معاك كتاب فـ قالت تشقُطك !
- أول مره اشوفها كانت في القطر ياذكية، ولولا انها عمومًا بتقرأ ماكنتش يومها طلّعت الكتاب من شنطتها وقرأت منّه
- ماشي معاك حق بس يابني افهم، الموضوع مش سهل زي ما انت فاكر
- ولا صعب زي ما انتي فاكرة
- ياسلام! طب هتروح تتقدملها إزاي بئا وانت حتىٰ ماتعرفش إسمها؟
اترسمت علىٰ وشه ابتسامة - ضُحىٰ ، إسمها ضُحىٰ
- آاااه قولتلي
انت بئا كلمتها واتعرفتوا وقال ايه جاي احكيلك علشان انتي اختي حبيبتي وانت أصلًا خاربها
- سمعتها بتتكلم في التليفون وبتقول لحد "ليه كدا ده انا ضُحىٰ حبيبتك" يا أوڤر
- وَلا !
- ياستي والله ما اعرف عنها أي حاجة غير عنوانها وإسمها
ذُهلِت - وكمان تعرف عنوانها؟
- واللّٰه أنا ما عارف مين فينا الكبير ، يابنتي قولتلك كانت راكبة معايا القطر من القاهرة لـ اسكندرية ونزلت في نفس المحطة معايا -بابتسامة تكاد تفقع مرارتي- وبصراحة مشيت وراها بعربية حمزة كان مستنيني وعرفت البيت
- وإنت عرفت منين طيب إنه بيتها
اتفاجئ - بتهزري؟ هو ممكن مايطلعش بيتها؟
- وارد جدًا ، ممكن تكون جاية زيارة لحد مثلًا
- طب واحنا هنتأكد ازاي؟
- مش عارف، انتي خوفتيني
- بتفكير - طب انت قولتلي هي راحت شارع إسمُه ايه ولا ناحية ايه؟
- عارفه بيت عمتك سَعدة؟ مش فيه شارع طويل كدا قدّامه ! هيّ ساكنة في آخر الشارع
جت عالطِبطاب - طب حلو أوي ، من هنا ورايح تاخد الشارع ده وتهرِسُه رايح جاي
ونفس اليوم اللي سافرتوا سوا فيه تروح المحطة وتفضل هناك وتدوّر عليها ، ممكن تكون بتسافر كل إسبوع
وكل وقت والتاني هنروح نزور عمّتك علشان حبيبتك ياعم وعِدّ الجمايل
عطاني بوسة - أختي حبيبتي
هو في الحقيقة مش علشان حبيبتُه هوّ ، ده علشان حبيبي أنا
علشان مروان
بن عمتو سَعدة
اللي بحلم بيه من وانا لسه عيّلة في ابتدائي ، كبرت وعرفت انه مش كل الأحلام بتتحقق ووقعت كتير وقومت كتير وشوفت في حياتي كتير لحد ما قرّبت اتمّ الـ ٢٥ سنة بس الحلم ده بالذّات اللي متبّتة فيه ومش قادرة ماحلمش بيه
ده الشَّخص اللي بيتدعالُه بإسمُه كل يوم في القيام
ده الشخص اللي بخاف عليه من نسمة الهوا لو عدّت طرَفت عينيه
ده الشخص الوحيد اللي بسمَح لنفسي اكون أوڤر في حبُّه واعيش هيَام البنات ده علشان يستاهل
اللّٰه يجمعنا علىٰ خير
- علىٰ كدا كنتي ويت مع مين؟
- مصطفىٰ طبعًا، انا ليا غيرُه حبيب قلبي؟
بصيت للتليفون بقرف - ملزّقة
- عقبال ما تلزّقي انتي كمان
- ياختي ربنا بس يرزقني زوج صالح وانا هوريكم التلزيق علىٰ حق
- ما تاخدي مرَوان يا مريم بدل ماهوا قارفنا في البيت ومابيسكُتش ، خوديه اتجوزيه أو اقتليه أو وديه فـ داهية عادي
- فيه بني آدمه محترمة تقول علىٰ أخوها الكبير كدا؟ وبعدين احنا اخوات اتجوزه ايه بس عيب اللي بتقوليه ده
- خلاص خلاص هتفتحيلي محاضرة ولا اي انا كنت بهزر
- قولي بس لعمتو اننا جايين النهاردة بالليل انا وماما نزوركم
- إشطاا
