-لا أنا اللي هغسلهم سيبيهم.
-غريب أنت بردو يا هشام بقالك فترة كده؟ مش دي واجباتي زي ما بتقول.
-عادي يا علياء عايز أعملهم انهاردة.
-ماشي بس كده هتعود على الدلع ده.
-اتعودي براحتك ولو على الدلع هغسلهم أنا كل يوم إي رأيك؟
-أنت مش طبيعي على فكرة.
-عيشي اللحظة، اللحظة وبس.
-ماشي.. صحيح، أنت مروحتش تجيب نتيجة التحاليل، ده عدى إسبوعين أهو!
-روحت وقالولي إن العينات مع دكتور وهو سافر وهيرجع كمان شهر.
-ومن امتى الدكتور بيأخد عينات معاه! ده معمل مش كويس على فكرة.
-كده كده إحنا عارفين هدفنا من التحاليل دي ومتهمناش.
-عندك حق.
أنا وعلياء متزوجين من سنتين، وربنا مرزقناش بأولاد، بالنسبة لينا إحنا فـ الموضوع عادي نصيب، لكن بالنسبة لأهلنا وكلامهم اللي بقى مش كويس وكل واحد عايز يشوف لينا ابن، روحنا نعمل تحاليل علشان نثبت لنفسنا إن التأخير مش من عندنا وإن زي ما إحنا مقتنعين إنه نصيب مش أكتر! والنتيجة مكنتش في صالحنا أو بالأصح، مكنتش في صالحي أنا.
أنا وعلياء معرفناش بعض إلا بعد الخطوبة لكن أنا حبيتها ومش قادر أتخيل إنها ممكن تسيبني في يوم علشان كده خبيت عليها يمكن غلطان بس مقدرش على بُعدها عني لحظة واحدة.
-هشام أنا هخلص شغل البيت كده وهبقى أنزل لماما انهاردة شوية، ممكن؟
-طبعََا ممكن، أجي أخدك امتى؟
-يعني على الساعة سبعة كده.
-تمام، ابقي سلميلي عليها لغاية ما أجي.
-يوصل إن شاء الله.
دي أول مرة أكذب فيها على هشام، أنا آه هروح لماما بس قبلها لازم أروح المعمل، محستش بصدق في كلامه امبارح، يعني اي الدكتور هيسافر ويأخد عينات معاه! هي عينات الناس لعبة! ألاه.
لو طلع ظني غلط يبقى الحمد لله لكن هزعل إني شكيت فيه للحظة.
ولو طلع ظني صح.. أنا مش قادرة أتخيل ممكن أكون عاملة ازاي!
-السلام عليكم ورحمة الله وبركاته.
-وعليكم السلام ورحمة الله وبركاته، أقدر أساعد حضرتك إزاي؟
-لو سمحتِ كان في تحاليل عملتها أنا وزوجي من إسبوعين تقريبََا، وعايزة أعرف النتيجة.
-طيب ممكن الوصل؟
-آه طبعََا اتفضلي.
-مظبوط يا فندم كان زوج حضرتك جيه وعرف النتيجة لكنه مأخدش الورق.. اتفضلي.
-غريبة.. طيب في حد يقدر يفهمني مكتوب اي يعني؟
-اتفضلي يا فندم الأوضة اللي على الشمال.
-السلام عليكم ورحمة الله وبركاته، لو سمحت ممكن حضرتك تفهمني مكتوب إي في التحاليل دي؟
-وعليكم السلام ورحمة الله وبركاته، اتفضلي اقعدي يا فندم.
تمام.. كل شيء بالنسبة لحضرتك تمام، أما بالنسبة لزوجك..
-خير يا دكتور؟
-زوج حضرتك عنده عقم، وهو ده السبب في عدم الإنجاب.
-تمام.. شكرََا لوقت حضرتك يا دكتور.
مكنتش أتمنى أبدََا إن ظني يطلع صح.. ويكون هشام بيكذب عليا فعلََا! طب هو خاف من إي! خاف من شكله قدامي مثلََا! أنا زعلانة منه وعليه.
-السلام عليكم ورحمة الله وبركاته، إزيك يا حماتي.
_وعليكم السلام يابني، إزيك يابني فينك وفين علياء؟
-فين علياء! هي مجتش عندك انهاردة ولا إي؟
-لا يابني مجتش.
-غريبة ده هي الصبح قايلالي إنها هتجيلك وقالتلي أجي أخدها على الساعة سبعة، طيب عن إذنك يا حماتي هشوفها وابقى أطمنك.
