ប្រពន្ធក្មេងបង Billionaire (Completed)

EP50 (ភាគបញ្ចប់) : មិនដែលគិតថាហត់នឿយឡើយ ដែលមានអូនជាប្រពន្ធ♡

" ហេតុអីក៏ពួកគេទៅយូរម្ល៉េះ? កាន់តែជិតយប់ហើយ! " ថេយ៉ុងដើរមកច្រត់ដៃនឹងចង្កេះផ្អៀងករង់ចំមើលផ្លូវពីរនាក់ដែលបាត់ទៅ ព្រោះអាហាររៀបចំរួចហើយ តែពួកគេចង់ញ៉ាំព្រមគ្នាជប់លៀងដំណើរកម្សាន្តលើកនេះ។

" នោះពួកគេមកហើយ!! " សាន់ឆេលើកដៃចង្អុលទៅ ហើយរត់មកឈរជិតថេយ៉ុង។ Yiboកំពុងដើរចូលមកជាមួយចាន់ដែលនៅទំលើខ្នង បោកឲ្យនាយអៀវគេមកទើបគេព្រមត្រឡប់មក សន្យាមិនទាន់បានប៉ុន្មានផង ក៏ចេញចរិកងងក់មកទាល់តែបាន វាហាក់ដូចជានិស្ស័យរបស់គេដែលមិនទាន់អាចកែប្រែបាន តែនាយក៏មិនបានប្រកាន់វ័យច្រើនដូចគ្នា នាយសុខចិត្តធ្វើជាអ្នកដែលចាំស្ដាប់ ចាំតាមលួងគេគ្រប់វេលា។

" ពេលរត់ទៅពេបមាត់ច្បែប ពេលមកវិញញញឹមរីកដូចផ្កាត្រូវទឹក!! " ចាន់រំកិលខ្លួនចុះពីលើខ្នងនាយសង្ហារ ដើរមកជិតមិត្តតូចទាំងពីរនាក់ តែក៏ត្រូវពួកគេថាឲ្យហើយលើកដៃរុញថ្ងាសគេបកក្រោយទាំងពីរនាក់យ៉ាងស្រុះដៃគ្នា។

" អេ៎ បានប្ដីលួងហើយមិនសប្បាយចិត្ត? យ៉ាងមិច ចង់ឲ្យយើងយំជំនួសសើច? " ចាន់ចាប់ដៃពីរនាក់នោះចេញ ញេញធ្មេញចេញចង្កូមដាក់ទៅវិញ នៅឆ្លៀតលើកបាតដៃទះគូទពួកគេមួយដៃទៀត ទើបរហ័សរត់មកឈរជិតៗប្ដី ខ្លាចក្រែងត្រូវពីរនាក់នោះចាប់វ័យវិញ។

" អូនឯងនេះខូចណាស់!! " Yiboងាកមកចាប់ទាញច្បូតច្រមុះរបស់គេ រកក្មេងកំពូលក្បាលខូចដូចចាន់ទៀតមិនទាន់ឃើញទេ វៃគេហើយរត់មកឲ្យនាយជួយ អាងថានៅជិតនាយគេផ្សេងមិនហ៊ានវៃខ្លួន។

" របស់ពិសេសមកដល់ហើយៗ!!! " សុងហានស្រែកចេចចាច រត់ចេញពីក្នុងផ្ទះជាមួយដបស្រាមួយដប ធ្វើឲ្យក្មេងៗទាំងបីនាំគ្នាបើកភ្នែកសគ្រប់គ្នា ជាពិសេសថេយ៉ុងព្រោះស្រានោះជាស្រាដែលគេលួចប៉ារបស់គេមក ហើយសុងហានទៅរកឃើញពីណាមក? គេខំលាក់ឡើងចង់ធ្លាក់អណ្ដាតណា៎!!

" ស្ដីគេហ្នឹង? ស្រាកូរ៉េ? " ចាងប៊ីនយកដបស្រាពីសុងហានមកមើលទាំងចងចញ្ចើមឆ្ងល់ថាសុងហានបានស្រានេះពីណាមក ជុងហ្គុកដើរមកកៀកស្មានាយមើល ក៏ងក់ក្បាលយល់ស្របថានេះជាស្រាកូរ៉េមែន។